Archive - Nov 15, 2011 - Le Lali / Linking Samoans / Our Troops

Ua fa’aalia e nisi o fitafita tuai ma o latou aiga lo latou sapasapaia o le fuafuaga a le ali’i kovana, e sainia ai se polokalama a fa’alauiloa ai suafa o fitafita ua maliliu i le taua, e ala i le fa’aaogaina o laisene e fa’apipi’i i luma o ta’avale a tagata o latou aiga.

O le vaiaso nei na taua e le ali’i kovana ia Togiola Tulafono, na te sainia ai se poloaiga fa’a kovana e fa’aaogaina ai le polokalama lea e taua o le “Gold Star Family”, lea o lo’o fa’aaoga e le tele o Setete o le malo tele, ina ia fa’aaoga fo’i i totonu o Amerika Samoa.

Na te’ena e le ali’i fusu mai Samoa lea o lo o tu’uaia i lona faiaiga ma se teineititi e 16 tausaga le matua tu’uaiga a le malo fa’asaga ia te ia ina ua tula’i i luma o le Fa’amasinoga Maualuga i le taeao ananafi.

Ma ua fa’atulaga ai loa le ulua’i iloiloga o Aokuso Fa’amanu, e 20 tausaga, mo le aso 19 o Tesema.

O le tama’ita’i loia o Ruth Risch-Fuatagavi na tula’i mo Fa’amanu i le taeao ananafi.

O lo o taofia pea le ua molia i le toese i Tafuna ina ua le mafai ona ia totogia le $100,000 na fa’atulaga e le fa’amasinoga e tatala ai o ia i tua.

Ua fa’alauiloa e le afioga i le Fa’amasino Sili ia Michael Kruse i sana poloaiga na tu’uina atu i le aso 1 Novema, i sui o le Asosi Loia a Amerika Samoa atoa ai ma le Vaega o Fa’amasinoga, le tatau ona fa’atulagaina taimi e iloilo mataupu eseese uma lava i luma o le fa’amasinoga mo se fa’aiuga mulimuli e aofia ai ma mataupu Apili.

Na taua e nisi o sui o le Asosi o Fitafita Tuai e aofia ai ma le latou peresetene lo latou lagolagoina o se fuafuaga ua fa’alauiloa e le ali’i kovana, e avea ai le Asosi o Fitafita Tuai ma se tasi o Matagaluega a le malo.

“O se fuafuaga lelei ma atamai ua fa’alauiloa mai e le ali’i kovana mo fitafita tuai, ma o se fa’aiuga fo’i o le a mafai ai ona tu’u fa’atasia le Asosi o Fitafita Tuai ina ia avea ma tino e tasi,” o le saunoaga lea a le afioga Tauiliili Lauifi, le peresetene filifilia o le Asosi a le VA.

Ua i’u nei su’esu’ega a leoleo, ma ua loka nei i le to’ese i Tafuna ia le ali’i o Solomona Pati po o Simati Pati, lea na fiu e sa’ili mai lava i le 2007, se’ia o’o mai i le aso ananafi, ina ua pu’eina o ia i totonu o le fale o Fa’amasinoga Fa’aitumalo.

O le ali’i Palemia o Eleni, George Papandreou, ua fa’ailoa mai le mau a le itu agai a lana faigamalo, ina ia tula’i 'ese mai le tofi Palemia, ona ua mae’a pasia e i latou e fa’ataunu’u lana mau na fa’apea e mautinoa ai le maua o le 'aitalafu e $178piliona e toe fa’aleleia ai le tamaoaiga o le Malo o Eleni, ae o lea ua tula’i mai o le a le mafai ona maua lea nogatupe mai Malo o Europa.

O lenei taumafaiga ina ia mafai ona fa’aopoopo nisi upu i le tatou gagana samoa, ina ia mafai ona fa’afaigofie ma fa’apu’upu’u le taumafaiga e fa’aliliu mai tala fa’aperetania i le gagana samoa!
Ia fa’ao’o mai lou lagona e ala i se tusi e fa’ao’o mai i le Fa’atonu, po’o le Imeli to’asavili@yahoo.com tatou te feutaga’i ai i nei galuega lelei mo i tatou uma lava!

Upu - FOREST -VAOMATUA

Upu Fou Fa’asamoa: FOLESI : Fa’aaoga pea i tusitusiga le fa’asamoa o i luga, ae fa’aalia mai sou finagalo e talia gofie ai o tatou taofi.

Fa’ailoa mai, tatou feutaga’i ma le fa’aaloalo lava!

O uiga ia o le lo’omatua o Naomi, atonu e le o fiafia i ai le aiga ona o lona tautala sa’o, leo malosi, ma e le fo’i lava sana tala e lafo i le tagata pe a o’o i taimi e sese pe sasi ai. Atonu fo’i o ona uiga ia, e alofagia ai e le tele o tagata ona o lona tautala i mea lelei ma upu e lafo sa’o e le fa’a’alo’aloa. O le itu lea o le lo’omatua na ola a’e lava ma ia.