Ua tusa nei ma le 9 masina talu ona maea le fonotaga mulimuli a le Komiti o le Palola, e iloilo ai talosaga a pagota ua agavaa ona magalo ma faasaoloto mai i latou mai le toese i Tafuna, a’o faanofo vaavaaia ai pea i latou i lalo o poloaiga  mai le faamasinoga.

E tusa ai ma se ripoti ua maua e le Samoa News na taua ai e faapea, mai sui e toalima o le Komiti o le Palola e tatau ona i ai, o le isi toalua o loo malaga i fafo mo a la talavai, ae o le isi toatolu o loo i ai pea lea i le atunuu, peitai e le o mafai ona nofoia le komiti mo ana fonotaga masani lea e tai 6 masina ma fai, ona e le o lava se kalama e mafai ai e le komiti ona iloilo mataupu ma fai faaiuga.

O le mataupu e uiga i le Komiti o le Palola na mapuna a’e i luga ina ua tauaao e le Samoa News se tusi mai se alii pagota o loo tuli sana faasalaga faafalepuipui i le taimi nei, ma ia fesiligia ai le mafuaaga ua ala ai ona le atoa sui o le komiti o le palola latou te iloiloina talosaga a pagota.

O le alii pagota ia Michael Agasiva o loo tuli sona faasalaga faafalepuipui e 5 tausaga, ina ua faamaonia e le faamasinoga maualuga le solitulafono o le faaoolima i le tulaga lea sa tuuaia ai o ia e le malo.

Na taua e Agasiva i lana tusi e faapea, o loo manino le tulafono, e tai ono masina ma fono le komiti o le palota, peitai o le fonotaga mulimuli a le komiti na gata mai i le masina o Iuni 2011, ma ua aafia ai aia tatau o pagota ua agavaa ona tuuina atu o latou igoa i luma o le komiti mo le iloiloina.

“Ua tatau ona fai se faaiuga e toe tofia ai nisi totino o le komiti, ina ia mafai ai e le komiti ona faataunuu ona tiute e pei ona faatulaga mai e le tulafono,” o se vaega lea o le tusi a Agasiva.

E le gata i le komiti o le palola, ae na faaaoga foi e Agasiva lana tusi lea e talosaga ai i le afioga i le kovana sili ia Togiola Tulafono, ina ia alu atu sana asiasiga i le toese ina ia mafai ai ona ia silafia faafitauli o loo tutupu ai.

O se tasi o faafitauli na taua e Agasiva o loo tulai mai i le toese, o le toatele lea o pagota e momoe i totonu o le sela e tasi, lea e i le va i le toa 5 i le toa 6, ae momoe foi i luga o le sima malulu.

Na maua le avanoa e fesiligia ai e le Samoa News se tasi o totino o le komiti o le palola, lea e lei finagalo e faailoa lona suafa, peitai sa ia faamaonia mai e faapea, e le o atoa  sui o le komiti i le taimi nei, e lei tofia foi e le kovana nisi e sui tulaga i sui ua le o toe avanoa.

Na faamaonia mai foi e le sui lea e faapea, e tatau ona tai ono masina ma fono le komiti o le palola i tausaga uma lava, peitai e le o tupu lena mea ona e le o atoa  totino o le komiti.

Fai mai le molimau, mai sui e toalima o le komiti o le palola, toe toatasi o loo i ai pea lava i le atunuu, ma le isi toalua o loo malaga i fafo mo a la talavai, ma sui e toalua e tatau ona tofia e le kovana ina ia atoa ai le toalima.

O sui e toatolu o le komiti o litaea o loo i ai pea e aofia ai le taitaifono ia Rev. Ned Ripley, Malaki Togiola ma Rev. Faatui Laolagi.

Ina ua fesiligia le loia fautua a le alii kovana ia Douglas Fiaui e uiga i lenei mataupu, sa ia taua ai e faapea, o loo faatali pea se faaiuga a le kovana mo le tofiaina o nisi sui o le komiti, peitai o se tulaga lelei pe afai ae tei ua tofia i le taimi o le fono faapitoa lea ua valaauina e le alii kovana.

O le fono faapitoa e le silia ma le 30 aso le umi, ma o loo malolo mo le 2 vaiaso ma le faamoemoe e toe amata i le aso 26 Mati.

faaliliu Ausage Fausia