E 9 fautasi ua faamaonia mai e le komiti o lo o tuufaatasia le polokalame o le faatauaina o le siosiomaga, gataifale, ea ma tagata, o le a tausinio i le tuuga lea ua faamoemoe e faia i le aso Lulu o le vaiaso fou, e faaiu ai le polokalame a le Kovana sili, lea sa amata mai i le masina o Setema e faataua ai le faamamaina o le siosiomaga o le atunuu.

O le fonotaga a le komiti ma sui o fautasi uma ua lautogia mo lenei faamoemoe sa faia i le aso ananafi, na faamautu ai loa vaega mulimuli a’o le’i oo atu i le aso e faataunuuina ai le tuuga.

O le tuuga e pei ona faamaonia e le komiti, e amata i le itula e 10:00 i le taeao o le aso Lulu, 27 Novema, 2013, fuafua lea i le taimi e pe lelei ai le tai, ma faigofie ai i auvaa mo a latou tapenaga.

O le tuuga ua faamoemoe e amata atu i le vaega lea e masani ona tini ai tuuga fautasi i luma tonu o le ASCO Motors i Pago Pago, ona faasolo atu ai lea i le pine i Aua, ma aga’i atu ai i le isi pine i gatai atu o le paka i Onesosopo, ma toe liliu mai ai loa i tua ane o le faletalimalo tuai o le Rainmaker o lo o i ai foi le isi pine, ma toe fo’i atu ai loa i le tini.

Ua i ai faailoga tupe ua tapena e le komiti mo fautasi uma o le a tautogia mo lenei faamoemoe, ma o lenei tupe e pei ona faamalamalama i le taimi o le fonotaga, o se auala lea e faaoo atu ai le fesoasoani a le malo ma matagaluega o lo o tuufaatasia lenei polokalame, i afioaga uma o lo o auai i le tuuga fautasi, o afioaga foi nei ua finagalo malilie latou te faamama nisi o vaega o a latou afioaga e pei o auvai, tafatafa o le alatele, sami, po o isi foi vaega o le siosiomaga.

E ta’i $1,000 tupe fesoasoani mai le komiti mo fautasi ta’itasi, faaopoopo i ai ma isi faailoga tupe e maua e le auvaa, fuafua lava i le tulaga o le a i ai pe a maea le tuuga. Mo se faataitaiga, o le fautasi e mua na te maua le faailoga tupe e $5,000; o le tulaga lua e $4,000; o le tulaga tolu e $3,000; ma le tulaga fa e $2,000.

O isi fautasi e i tua atu o tulaga e fa pito i luga o le a latou maua faailoga e ta’i $1,000.

O le a sainia foi e auvaa se feagaiga ma le komiti, e faailoa atu ai lo latou malilie, o le a latou faaauau pea ona galulue mo le faamamaina o nofoaga eseese i totonu o nuu ma afioaga, ina ia faatumauina ai pea le mama ma le matagofie o le siosiomaga o le atunuu.

O nofoaga eseese ua filifilia e nisi o auvaa e aofia ai auvai i totonu o nuu, matafaga ma le sami mo nisi o nuu, ae o auala galue ma le siosiomaga mo nisi o afioaga.

O le polokalame lenei o le a faaauau pea i tausaga uma ma le faamoemoe o le komiti ma matagaluega a le malo o lo o faatautaia lenei faamoemoe, o le a fiafia pea afioaga e galulue ma le malo i le faamamaina o totonu o latou afioaga.

O fautasi o le a tausinio i le tuuga: Vatia; Aua; Pago Pago; Fagasa; Nuuuli; Vailoatai; Fagaalu; Matasaua ma Samoana.