9 Fa’au’u mai le Vasega “Talimalo Lelei!”

Mai le vasega amata e to’a 29 o sui tama’ita’i talavou ma tina, ua fa’apaleina nei na’o le to’a 9 i le fa’ai’uga, ma ua taua’aoina fo’i latou tusi pasi ina ua atoa lelei le 40itula o tau’avea vasega patino i le soifua “Talimalo Lelei.”

 

I le tautalaga fa’apitoa a le Fa’atonu Sili o Polokalama Fa’atautaia a le Matagaluega o Talavou, Tama’ita’i ma Tina Pa’u Roy Ausage, sa ia fa’ailoa ai se tasi o aga a le atunu’u, na ala ai ona fafau lenei kosi ia tau’avea e fa’aleleia atili ai tomai o tina ma talavou, e fesoasoani e maua ai ni latou galuega, “O le talimalo o se tasi o mausa a tagata ma aiga Samoa, e matua lava tapena aiga Samoa uma i o latou Maota Talimalo, i so’o se taimi lava!”

 

“O aga nei e le fou i aiga Samoa, ae o le toe fa’afouga ua taga’i toto’a i ai le matagaluega, ona o faletalimalo ma le tele o pisinisi i le tatou atunu’u, e i ai nisi o le tatou lava atunu’u, ua fa’asea mai, ‘E le lelei le auaunaga ma le tautuina o i matou i le fale’aiga lea, ma le faletalimalo lea!’ O se timata la lenei ua tapena i ai, ia le toe maua lea fa’asea i o tatou lava tagata, ma fa’aleleia ai le taligamalo e ofo atu mo a tatou turisi e gasolo mai.”

 

O le fa’aleoga lea o le naunauta’iga o le Matagaluega o Talavou & Tina, ma e le o sasi lava le folasaga, ua matauina, e aoga lea kosi, ona o se molimau a le tina na tofia mai le vasega e fa’aleo so latou agaga e tusa o le kosi sa latou tau’avea ma ua mae’a lelei.

 

O le tautalaga fa’apitoa fo’i a le tama’ita’i faia’oga, Alanieta Lavenawasa, sa ia fa’ailoa atu i lana ulua’i vasega fa’au’u, “Ia outou o, ma ia outou iloa lelei o lo’o tou tau’avea le igoa o le matagaluega na a’oa’oina outou, ia outou fua mai ni fua lelei o a’oga uma ua mae’a timata ai outou silafia!”

 

Peita’i, ina ua tu’uina le avanoa i le vasega, sa latou foa’ia ai mo le latou faia’oga se meaalofa na toe tutulu ai le tama’ita’i faia’oga o Ala ma sa ia toe fa’apea ane ai, “Ua outou manatu i le maila fa’aopoopo lea, ona ou toe fa’apea atu lea, ou te fesoasoani mo outou ina ia saili ni avanoa faigaluega e tou te faigaluega ai! Ia outou manuia, tutu la outou sulu ma tu’u i luga!”

 

Peita’i i le molimau fo’i a Uiese Lemoe, sa ia fa’ailoa ai, “E 15 lelei lava ituaiga gaugauga o le Napekini e fa’aaoga i ‘aiga a tagata, ua mae’a a’oa’oina mai matou te faia e le faia’oga, atoa ai ma matou foliga ia mama ae sili ona lae’ia i le ataata e talimalo ai i taimi uma, e fa’ataunu’u ai tiute fa’a-talimalo lelei.”

 

O i latou ua mae’a umia tusi pasi o lea vasega e aofia ai: Adl Qutonilibasa, Sieri Lefaoseu, Nadia Li, Uiese Lemoe, Sarah So’oa’emalelagi, Catherine Lemoe, Fa’avavau Fa’atau, Mekrita Laumatia ma Taulaga Tatupu.

Comment Here