Ads by Google Ads by Google

8 Pepe Mo le Tasi le Ulugali’i

O lo’o ua toe alia’i fo’i le mataupu fita lea i Saina, ua fesiligia ai fo’i le faiga fou lea, o le taumafai o le ulugali’i ina ia fa’akonekarateina nisi o tama’ita’i e fa’ato ma fanau mai ai pepe mo se ulugali’i e tasi.

Ua toe mataituina lea fa’afitauli, ona o se ulugali’i milionea o Saina, ua la’ua mautinoa lava e le fanau le tina, ma ua faia loa le taotoga o ni tama’ita’i se to’a lima ma fanaua mai ai pepe a e 8 lelei, i le aso e tasi mo lea ulugali’i.

O le tausiga e le fesiligia, e mautinoa fo’i o i ai uiga ma foliga o le tama, ae peita’i, o le isi ‘afa o pepe uma nei e 5, e le o i ai ma se toto o le tina o le a na tausia ma le fa’amaoni, o lana lava fanau.

Ua fa’ailoa mai, o le faiga lea e ta’ua o le ‘Serakati’ po’o le fa’ama’itaga o se tasi tina ae fanau mai ‘ave e le tina ma le tama na fa’aaoga ona fua fanau e fa’ama’itaga ai lea tina fa’akonekarate. O se solitulafono lea faiga i le Malo o Saina.

E tusa ai ma se tala fa’amaumau mai Saina i le a’ao o Guangdong, Saina, ua fa’ailoa mai ai lea ulugali’i mau’oa ua molia nei i le tulafono ona o le fa’afanauina mai o la’ua alo e to’alima fa’a-serakati. O le to’atolu lava o le fanau a lea ulugali’i, sa fanau sa’o mai lava e le tina i lona amataga mai le o la’ua nonofo.

E ese mai lena tulaga, ae ua faailoa mai e toeititi atoa le $1miliona yuan ua fa’aalu e le ulugali’i i le taumafaiga e maua le isi lima pepe fa’a-serakati lea ua molia ai la’ua i le tulafono a Saina. O le tupe tele na fa’aalu i le faiga o le auala e mafai ai ona molia le fua ola o le tama i le manava o tama’ita’i nei e to’alima ina ia ma’itaga ai i latou.  Fai mai o le totogi o lea ta’otoga e tasi e $157,000yuan.

O le tulafono ua i ai nei a Saina, e tasi lava lau pepe mo le ulugali’i e tasi, ae o i latou e solia lenei tulafono, e i ai latou sala tupe e totogia, ma e fa’asolo atu ina fa’afalepuipuia pe a le usiusita’i lava i lea tulafono.

Ua fa’ailoa mai e le Nusipepa i lea a’ai o Saina, “Ina ua fiu lava lea ulugali’i e taumafai ona toe ma’itaga le tina, ona faliu loa lea e faia lea tulaga ma le mautinoa lava ua solitulafono ai, ina ia toe maua mai se isi vaega tele lea o le fanau.

Ua fa’ailoa mai, e o’o lava i le tina na fia fanau, sa faia uma lava i le falema’i le fetilaisaina o fuamoa ma fua fanau o le tama, ona fa’ato’a taoto lea o tina nei e to’a ono o tama’ita’i e aofia ai ma le tina o le aiga. E to’atolu pepe na fanau mai e le tina na le fanau, ae tofu le isi to’alima ma le ta’itasi, ua maua ai le aofa’iga o le fanau e to’avalu, ae na soifua mai uma lava mai le masina o Setema ma Oketopa 2011.

O lea aofaiga e to’avalu i latou e fa tama fa fo’i teine.  E tusa ai ma se fa’amatalaga mai se sui o le Provinicial Family Planning Commission, sa ia fa’ailoa mai ai se manatu o le latou fo’i itu e tusa ai o lenei to’avalu o le fanau ua maua mo lea ulugali’i, “O lo’o ua fesiligia nei le solituina o le tulafono tau le fa’aaogaina o le faiga fa’a-serakati ae maise o le tulafono ia tasi lava le pepe mo le ulugali’i e tasi.”

Ua fa’ailoa mai fo’i ua su’esu’ea fo’i e le matagaluega o le soifua maloloina lenei mea ua alia’i mai, ma ua fa’ateleina lava fa’amatalaga ua maua mai i luga o feso’ota’iga tau initeneti e tusa ai o lea aofaiga o pepe ua maua i le vaitaimi e tasi  e lenei ulugali’i.

Mai fa’amatalaga uma ua tu’ufa’atasia i luga o le initeneti, e le o le to’atele o tamaiti ua maua mai le taimi e tasi lea e fesiligia e tagata, ae o le tulaga o le faia o le serakati mo auala e fa’ateleina atili ai pepa e tausia i luga o lenei lalolagi, ae maise o a’afiaga o lagona o tina nei, ua mae’a sainia konekarate e ave’esea atoa ai a latou aia tatau i a latou pepe na fe’avea’i mo le 9 masina, ma fagaina i totonu o latou tino, ma o le afa fo’i o i latou lea e ola ai lea tamaititi.

E ui la ina e i ai le tulafono a lea malo e fa’asaga aga’i i le faia o serakati ma mea e maua ai fanau a nisi ulugali’i, ae o le isi itu atoa o le uepasite o lo’o ofo mai ai avanoa lelei e mafai ai ona avea se tama’ita’i ma se tasi o tina e fa’aserakati, ma o se faiga e ofo ai, pe na fa’apefea ona avatu nei tina uma i le taimi e tasi mo lea fuafuaga.

O lenei faiga, ua aga’i lava i luga le faitau aofa’i o ta’otoga ia i lenei vaitausaga, ma ua iloga mai, o le to’atele lava o tina ma tama nei e aumaia ai fua fanau e fa’aaogaina mo lea polokalama, e manana’o ina ia fa’ateleina ai a latou ‘oa, ae o nisi e manana’o ia fa’atau ma totogia e nei ulugali’i so’o se ituaiga o soifuaga manuia e manana’o i ai nei tama’ita’i.

Ina ia le maua ta’ita’ia lava nei Kamupani o latou faia ta’otoga nei, o le tele lava o i latou e auina i Thailand ma Initia tama’ita’i ua ofo e fanaua nei pepe e faia ai latou taotoga, ona fa’ato’a toe taliu ane ai lea tausia o latou maitaga e ulugali’i lava nei e manana’o i pepe pe a fananau mai.

Ua fa’ailoa mai, e latalata lava i le Miliona le totogi mo le tama’ita’i po’o le ali’i o lo’o faia i ai le taotoga mo ni fua fanau ma ia fa’aaogaina fo’i lona manava e fa’aola ai le pepe ma fanau mai ai. E sili atu le taugata o le pepe tama i le fa’atulagaga o i ai mo le malo o Saina, aua e sili atu le taua o le pepe tama nai lo le teine i lea lava malo.

O lona uiga, e iloa mai lea tulaga, e na’o aiga mau’oa lava e mafai ona latou totogia nei ituaiga o taotoga e faia mo ni tama’ita’i ma taulele’a e fia auai i faiga fa’apenei. I le taimi nei, ua mae’a fa’afaigaluega e lenei ulugali’i le to’a 11o tamaitai tausi pepe ma va’ava’aia lelei i latou nei, a’o taumafai i la’ua e fa’afetauia le tele o le mau fa’asalalauga fa’alaua’itele ua faia i lo la’ua aiga ma le la’ua fanau e to’a 8 ua i ai nei, ae le taulia ai le osofa’i atu o le Malo latou e tusa ai o le la’ua solitulafono ua iloga matilatila nei.

Ua tele fo’i nisi o fa’amatalaga ua fa’asoesa solo i luga o feso’ota’iga tau initeneti e fa’ailoa ai fa’asea a tagata lautele, ona o lea e foliga mai, e na’o tagata mau’oa lava o le latou malo e mafai ona latou solituina le tulafono, ma maua ai latou fanau e to’atele lava, ae le faia i ai e le malo se mea!

O le tala mai a se tasi i luga o le initeneti, ua ia fa’ailoa ai, “Ona o le ulugali’i lea e mau’oa tele, o lona uiga la e tatau ona avea atoa le 80% o la’ua aseta uma ua mae’a tu’ufa’atasia mo le malo.”

O se tala na saunoa i ai se tasi e iloga ai le moni o lona manatu ina ua ia fai mai, “O le tulafono latou e ala ona faia, ina ia puipuia mai tagata lautele lea e le lava le fa’asoasoa i le tamoa’iga ua maua, ae o i latou e tele le tupe, e mafai ele tupe ona fa’atau so’o se mea, e o’o lava i le tulafono.”