O le meaalofa ua taua’aoina nei e le ali’i faipisinisi fa’apolokalama Komipiuta o le Microsoft Bill ma Melinda Gates, ua la’ua toe taua’aoina atu le $750milionsUS mo le tele o togafitiga e tete’e pea i le AIDS, TB ma le Malaria.

O lea meaalofa sa mua’i faia fo’i lea foa’i i le 10 tausaga talu ai e i la’ua nei, ona o le manatu lava ia matua fa’auma lea ituaiga ma’i leaga tele mai le soifuaga o tagata e vaivai le tamaoaiga.

I sana tautalaga i le taimi na taua’aoina ai lea tinoitupe tele mo lea fa’amoemoe lelei, sa ia fa’apea ai, “O nei vaitaimi ua malomaloa le fa’agasegasea o malo ta’itasi uma o le lalolagi, ua le lava le tamaoa’iga, ae paga lea ua fa’ateleina ai le fa’afitauli i totonu o lotoifale o nai aiga e vaivai le tamaoaiga, ua avea fo’i lea mau, ma mea ua le toe amana’ia ai le tausiga o le soifua maloloina mo le mamalu lautele, o lea la ua ala ai lenei foa’i.”

O se tala lea a Bill Gates i le fonotaga a le World Economic Forum sa faia lea i Suitiselani i le amataga lava o lenei tausaga fou. E pei ona matauina, o le alagatupe lea e fa’aaogaina i tausaga e 10 o lumana’i nei, ma e fa’aaogaina mo galuega mo le lautele, po’o ni sosiaete fo’i tuma’oti o le latou manulauti ia tete’e malosi i le AIDS, TB ma le Malaria [Mumu].

O le ulua’i foa’i na faia i le 10 tausaga talu ai 2002, ua fa’aalia mai na sefea mai ai le 100,000 o le soifua o i latou ua maua i le AIDS, TB ma le Malaria, o le isi lea fa’ama’i e fe’avea’i e namu.

O le fonotaga lea a le WEF o lo’o faia i le Nofoaga o Fa’ase’ega i Davos, Suitiselani, Europa. I lea lava fonotaga, e tusa ma le 2,600 sui usufono mai atunu’u ta’itasi o le lalolagi o lo’o auai, ma o i latou ia e mafai ona aumaia nisi o pepa fa’atumu e talosagaina ai se vaega tupe mo se fesoasoani mai lea tinoitupe na foa’ia e Bill Gates e fa’aleleia atili ai Polokalame tete’e malosi atu i nei fa’ama’i e tolu, e matua olaola i atunu’u o le teropika e pei o le tau lea e i ai Samoa na lua ma le vasa pasefika atoa.

Ua fa’ailoa mai i le tinoitupe muamua lea sa fa’ameaalofa i le 2002 na fa’atupeina ai le togafitiga o le to’a 3.3miliona o tagata ua mae’a maua i le AIDS, suesueina ma togafitiga le 8.2 miliona o tagata i le ma’i TB ma fa’atau ai fo’i ta’inamu e 230 mo aiga ina ia puipuia mai i latou mai le fa’ama’i o le Malaria [Mumu].

I se saunoaga a Bill Gates e tusa ai o se aoga o lana foa’i lona lua lenei ua ia fa’aalia ai e fa’apea, “Ina ua amatalia le teugatupe lenei mole Global Funding, sa ou filifili e leai se isi auala e mafai ona vave o’o ai se fesoasoani i tagata uma o i ai le mana’omia i le lalolagi, nai lo lenei. O lenei ua toe fa’aalia mai nei fa’amaumauga uma, e fa’ailo ai le aoga o le tupe na taua’aoina muamua, o lea fo’i ua toe fa’atulaga ai lenei foa’i lona lua. O se galuega lelei ma le aoga tele lenei!”

O le foa’i muamua na amatalia ai le Global Funding i le 2002 e $650miliona, na faia lava fo’i i Davos i Suitiselani, peita’i, sa fa’apea fo’i ona lipotia mai nisi ua latou fa’aaogaina sese le seleni lea i le tausaga ua te’a, ma ua mafua ai fo’i ona le toe fa’ao’o ane e nisi o Kamupani mai Siamani a latou tupe foa’i. Peita’i i le tausaga nei, o le tula’i ese ai le susuga Michael Kazatchkine lea sa avea ma ta’ita’i ae o le a toe fa’ao’o ane le ali’i sa mua’i avea ma Teutupe Gabriel Jaramillo e avea ma peresetene o le WEF.

I le tautalaga lava lea a Bill Gates ua ia fa’aalia ai, “E le mafai ona le tutupu mea fa’apenei ona ua tetele na’ua tinoitupe ua foa’ia atu mo fa’amoemoe lelei e fa’atino ai, peita’i, e le tatau ona tatou so’ona va’ai na’o mea fa’aletonu e alia’i mai, ae ia va’ai pea ma matau mea lelei ua mafai ona fa’atino ai!”

“E ui i taimi faigata ua o’o mai, ae leai lava se isi auala e toe vave fa’aleleia ai le lalolagi, nai lo lou foa’i mo se galuega lelei mo isi.” O le Fa’alapotopotoga lea a le ali’i Pilionea o Bill Gates ma Melinda Gates ua la’ua foa’ia le sili atu ma le $26piliona o tupe e fa’atupeina ai togafitiga i gasegase ma nisi polokalama aoga o le tausia lelei o le soifua maloloina, atina’e o atunu’u e vaivai le tamaoaiga, ae maise o polokalama mo A’oga ale fanau. O le ali’i lenei e ona le polokalama o le Microsoft ua tatou fa’aaogaina i so’o se atunu’u o le lalolagi e faia ai tusitusiga i luga o masini komipiuta!

saunia: Leua Aiono Frost