Ads by Google Ads by Google

7 Ta’avale malo na loka e leoleo ina ua le usitaia poloaiga

E ono Ofisa ae fitu taavale, na taofia e le Ofisa o Leoleo, i le Aso Lulu na te’a nei, ina ua le usitaia se Poloaiga Faalauaitele a le kovana, e faasa ai ona toe feoa’i taavale a le malo i tua atu ma taimi faigaluega, sei vagana taavale ua mae’a ona tuu i ai le faatanaga.O taavale na loka e leoleo na aofia ai taavale e lua mai le Matagaluega o le Soifua Maloloina; ma taavale ta’itasi mai le Ofisa o Leoleo; Ofisa o Aoga; Ofisa Pulea Meatotino a le malo; Ofisa o Tautua ma Auaunaga mo Tagata Lautele ma le Ofisa o Faatoaga.Na ta’ua e le alii kapeteni ia Taaloloioufaiva John Cendrowski, o ia lea o lo o fa’auluulu i ai le vaega a le Ofisa o Leoleo, e gafa ma le mata’ituina o femalaga’iga i luga o le alatele, “O taavale uma ia na loka mai e leoleo, o taavale ia ua le usita’i i le poloaiga e faasa ai ona feoa’i i luga o le alatele mo le 24 itula, se’i vagana ua i ai se faatanaga, pau la matou tiute o le faamalosia o le tulafono.”Saunoa Taaloloioufaiva e faapea, na pau le auala e mafai ai ona toe tatala i tua taavale nei, o se faaaliga mai le Ofisa o le Kovana.Na faailoa e kovana Lolo Matalasi Moliga i sui o le kapeneta i le Aso Faraile na te’a nei e faapea, soo se taavale lava a se matagaluega ma ofisa a le malo e loka e leoleo, o le faatonusili e gafa ma le mataupu lea.Ina ua fesiligia e le Samoa News le Faatonusili o le Matagaluega o le Soifua Maloloina ia Motusa Tuileama To’atolu Nua e uiga i lenei mataupu, sa ia saunoa ai e faapea, “Sa ou faailoa i lo’u ofisa e faapea, o le taavale lava e loka e leoleo i le le usita’i i le poloaiga a le kovana, o le aveese mai le taavale lea ae ave i Manu’a e faaaoga ai, o la’u tala lea sa fai i le taimi ae le’i taofia e leoleo se taavale a le Ofisa, ae talu ai o lea ua tupu, lona uiga ua fetaia’i nei a’u ma se lu’itau i le faaiuga e tatau ona ou faia”.Sa ia taua foi e faapea, ua maea nei ona tofia se Komiti faapitoa a lana Matagaluega e iloiloina se faaiuga e faatatau i lenei mataupu, ma tuuina atu sa latou fautuaga ia te ia, ma o le fautuaga lava e tuu atu e le Komiti, o le mea lena na te faia.Ae ina ua fesiligia le Faatonusili o le Matagaluega o Aoga a le malo ia Vaitinasa Dr. Salu Hunkin-Finau e faatatau i lenei mataupu, sa ia taua ai e faapea, e silia i le faalua ona fono lana matagaluega ma faailoa i ai le poloaiga a le kovana, i le faaitiitia lea o le soona faaaoga o taavale i le tuana’i ai o taimi faigaluega.“Ua uma ona saunoa le alii kovana, afai e taofia e leoleo se taavale a se ofisa ona ua le usitai i le poloaiga, ae saili ai le mafuaaga e le talafeagai, e tatau ona faamalolo le tagata faigaluega sa alu i le taavale, ma ou te talitonu o le mea foi lena e tatau ona fai,” o le saunoaga lea a Vaitinasa.Sa ia taua foi e faapea, o le a se’i fesiligia muamua le tagata faigaluega na alu i le taavale i le mafuaaga na faaaoga ai le taavale, poo se mafuaaga tatau pe leai fo’i.