E 6 masina lea ua tuuina atu e le afioga i le Kovana Sili ia Lolo Matalasi Moliga i le Komiti Faafoe fou a le Faalapotopotoga o le Eletise ma le Sauvai, le ASPA, latou te faia ai se gaioiga e faaitiitia ai le tau o le eletise i le atunuu.

O lea lu’itau na faalauiloa e le alii kovana i le taimi na faatautoina ai Alii mautofi mai Itumalo ma Falelima i le taeao ananafi, ina ua oo lana saunoaga i le tulaga e tatau ona i ai le soifuaga o aiga i le atunuu, faatusatusa i le malosi o lo o i ai le tamaoaiga o le taimi nei.

Na taua e le tofa Lolo e faapea, ao tau amata ai galuega a le malo, e tatau i tagata uma ona tulai mai e fai so latou sao mo le unaia o le malo ma lona atina’e i luma.

O lea lu’itau mai le alii kovana, sa tuuina atu i le vaiaso nei i le maea ai lea ona ia tofia o Totino fou o le Komiti Faafoe a le ASPA, faatasi ai ma le latou taitaifono fou, le susuga ia Perelini Perelini, lea sa avea muamua ma ‘Chief Operation Officer’ i tausaga ua mavae.

O le aso ananafi na usuia ai le uluai fono a le Komiti Faafoe fou a le ASPA mo le talanoaina o mataupu e faatatau i le agai i luma o le latou galuega, atoa ai ma le filifilia o se pule fou mo le ASPA, e pei ona taua e se molimau.

O le afioga a Utu Abe Malae lea o lo o faasiusiumata i ai le Komiti Faafoe, e ono tofia o ia e avea ma pule fou o le ASPA, ona o ia foi o se tagata ua tele tausaga o galue mo le ASPA.

O sui fou o le Komiti Faafoe e aofia ai Perelini o le taitaifono, Isabel Hudson, Peter Crispin, Daniel King ma Vaa Sokalati

Na taua e le sui faapitoa o le kovana ia Iulogologo Pereira e faapea, e i ai vaega o lu’itau ua maea ona tuuina atu e le alii kovana ia Utu e galue agai i ai, aemaise lava i le faaitiitia lea o le tau o le eletise ma le suavai i totonu o le 100 aso.

O se tasi o vaega o luitau sa tuuina atu ia Utu e pei ona saunoa Iulogologo, o le sailia lea o se auala e aveese mai ai le faatauina e le ASPA o le suauu, ma avea ai lea tautua o se pisinisi.

O isi vaega e aofia ai le sailia o se auala e aveese mai ai le tautua o le Lapisi ma le Suavai Lafoa’i mai le ASPA, ae tuuina atu i se isi Vaega faapitoa na te faatautaia lea tautua, faapea ai ma le taumafai e avatu le nofoaga o lo o i ai afi a le ASPA i lona nofoaga i Tafuna, ae faaavanoa le nofoaga i Satala mo galuega a le kamupani i’a i Atuu.

Na taua e ni isi o le atunuu na mafai ona fesiligia e le atunuu e tusa ai o lea fuafuaga mai le alii  kovana, o se tasi lea o laasaga ua leva ona tatau i le malo ona uia ina ia faamama ai le avega i le atunuu.

“O le taimi nei ua le toe gafatia e tupe maua a tagata ona faafetaui manaoga i aso fai soo aemaise ai o le tau o le eletise ma le suavai, e fai o le maualuga ae ua taugata foi ma le tau o oloa,” o le finagalo lea o le susuga a Valoaga Tufuga o Aua, o se tama ua silia i le 20 tausaga o galue i le Ofisa o Galuega a le malo, ma ua malolo litaea i le taimi nei.

Na taua e le tama lea, afai e maea le laasaga ua agai atu i ai le faigamalo fou, o le isi laasaga e tatau ona uia e le alii kovana, o le vaavaai lea i le tau o oloa ma pisinisi mai Asia ia o lo o faatautaia ma pulea le tele o pisinisi i le teritori.

Soo se taimi e fesiligia ai e le Fono sui o le Komiti Faafoe tuai a le ASPA ma lana taupulega i se auala e faaitiitia ai le tau o le eletise ma le suavai, latou te taua ai lava le tali, “o lo o latou taumafai i se auala sili mo le atunuu,” peitai na taua e ni isi o tagata totogi pili uila ma le suavai e faapea, afai e mafai e le afioga a Utu ona aumai i lalo o le tau o le eletise ma le suavai, e atagia mai ai iina sa i ai le malosi na unaia le ASPA e faaauau le sii o le tau o ia tautua i tausaga ua mavae.

O ni isi o molimau a sui o le ASPA i soo se taimi e fesiligia ai i latou e le fono i le mafuaaga o le maualuga o le tau o le uila, o le tulaga lea i le taugata o le suauu, peitai o ni isi foi  taimi i a latou molimau, e atagia mai ai le tulaga lea, ana totogi atu e le malo tupe sa faatulafono e totogi atu mo le ASPA, atonu ua maua se faamama avega ma mafai ai loa e le ASPA ona faaitiitia ni isi o tau o ana tautua.

E ese mai i totino fou o le komiti faafou a le ASPA lea ua maea ona tofia, o lo o i ai pea sui o le komiti faafoe tuai o lo o latou taua e faapea, o lo o lelei pea taimi na tofia ai i latou e fai ma sui o le komiti, sei vagana ua faamaonia e le Fono sui fou ua filifilia ona faatoa mafai lea ona latou tauaveina le galuega.