Ads by Google Ads by Google

6 Folasaga Fa’alauiloa Fanau A’oga

Tauvaga Galuega Fa’atino o le Talafa’asolopito i le Iunivesite o Maryland

 

E ono folasaga o galuega fa’atino o le tala fa’asolopito sa maimoaina e le mamalu o le faigamalo, matua ma le Komiti Fa’afoe o le  Amerika Samoa Humanities ananafi i le falea’iga o le Hong Kong i Nuuuli.

 

O i latou ia ua mae’a pasia e le vasega o fa’amasino tofia i le tauvaga a le fanau a’oga mai a’oga tulaga lua ma a’oga maualuluga a le tatou Malo, ae a ni avefu’a mo le tatou Malo i le tauvaga o nei galuega a le Iunaite Setete atoa, lea e faia i le Iunivesite o Maryland i le College Park i Maryland ia Iuni 9-13, 2013.

 

E tu’ua i latou nei ma latou faia’oga ia Iuni 6, mo lea fa’amoemoe lelei. O se avanoa e le o tu’umamaina i a’ai o finagalo o e ua filifilia, aua, i se maimoaga lautele i le aso ananafi, “O tapenaga ua mae’a tu’u atoa i ai le loto ma ua saunia le fanau tauva mo Amerika Samoa e fa’atino.” O se saunoaga lea a le tofa le Fa’atonu ASHC Taua Niualama.

 

Na mua’i saunoa le tama’ita’i fa’atonu, e fa’afeiloa’i ma folasia le afuaga o le fa’atasiga, ma o se fa’aeaga fo’i e le ‘au maua mo e uma ua vala’aulia, ona o lo’o ua fa’ato’a maimoaina lea e nisi o le lautele o le fa’atinoga a le fanau, i vaega ta’itasi ua manumalo mai ai, i le vasega o a’oga tulaga lua ma a’oga maualuluga.

 

Na mua i malae le folasaga a tama’ita’i a’oga mai le aoga tulaga lua a Samoa Baptist Academy: Sa la’ua talatala ai le “Mau a Samoa - Se Manatu na Afua ai le Malo Tuto’atasi o Samoa.” O i la’ua nei o Crisdel Aquila ma Gabrielle Langkilde.

 

I lea folasaga o lo’o mua’i saunoa ai le Ao Mamalu o le Malo o Samoa,  TuiAtua Tupua Tamasese Taisi Tupuola Tufuga Efi. O ia lea sa fa’ia lona tua’a Tupua Tamasese Meaole i le fa’ai’uga o le Mau, ae na mua’i fa’aaunu’ua ai fo’i le isi ona tua’a Taisi Nelesoni i Niu Sila ona o le afuaga lava o le Mau.

 

O le fa’atinoga na soso’o ai o le Folasaga a tama’ita’i e to’atolu mai le a’oga a Alofau Elementary. O le latou galuega e fa’atino ai manatu na tima’ia ai e Mary Wollstonecraft aia tatau a Tama’ita’i i galuega ma a’oa’oga, ia tutusa lelei ma le itupa o ali’i.

 

Matagofie lea tapenaga, e fa’atino uma e i latou aga o lo’o finaua’ia ai e Mary lana fo’i mau, lea ua ‘ae’ae ai le lalolagi o tama’ita’i i lea va’a se’elua fa’atautailua, tutusa lelei aia tatau ali’i.

 

O le fa’atinoga lona tolu a le fanau a’oga tulaga lua o le galuega sa fa’atino e Ryan DeSaulles e fa’aulutalaina: “O Fale’ese!” O lea galuega fa’atino sana Upegatafa’ilagi e fa’ailoa ai ona manatu ma ana sailiga e tusa o lana manulauti. I sona taofi fa’aalia e fa’aautu i ai lana folasaga e fa’apea, “E aotelega le lalolagi uma i lenei ituaiga o tautua, ma e le’i toe i ai se isi faiga fou e suia ai lea fo’i tautua o Fale’ese falasi!”

 

 O le tolu o Folasaga mai vasega matutua i a’oga maualuluga, na mua’i fa’alauiloa ai le galuega fa’atino a Allison ma Marcella Fitisone mai Tafuna High e uiga i le “Taua Lona Lua o le Lalolagi - Suia ai Amerika Samoa.”

 

O le galuega na soso’o ai o le Folasaga na saunia to’atasi e Louisa Kelani Faulkner e fa’aautu i le “Fa’aili o le Beatles - Osofa’iga mai Peretania!” Oka na toe fa’afo’i e Louisa mafaufau o e uma na aofia, i le tele o mea na a’afia ona o le a’e mai o le Beatles, mea lelei atoa ma mea fa’aletonu tau fuala’au fa’asaina ma vaila’au o’ona.

 

O le galuega na tomuli i ai le fa’alauiloaga i lea aso iloga mo i latou e masi’i atu mo le Tauvaga Poloketi o le Tala Fa’asolopito o le Pepa tusitusia lea sa saunia e le susuga Mika Aga mai Leone High. O lea galuega sa ia fa’amatala ai lana folasaga sa ia fa’aulutala, “E afua mai Mauga: Suiga o le Malo Amerika Samoa ma o’o ina palota le latou Kovana!”

 

Ua talosagaina le tapua’ia o faiva o le fanau ua avea ma avefu’a a Amerika Samoa i lea fo’i tauvaga, ma ia manuia o outou faiva, o outou mama na!