O le matagaluega o le Soifua Maloloina a le Setete o Kalefonia, ua latou fa’asalalauina fa’alaua’itele mai i tagata uma o Amerika Falema’i ua mae’a fa’asalaina e i latou, ona o galuega ma tiute ua le faia lelei, ua lusi ai fo’i le mau fa’atuatuaina o i latou e le to’atele, ona o le sasi i le fa’ataunu’uga o latou tiute, ae maise lava i taimi o ta’otoga sa faia o tagata mama’i, e tusa ai ma se lipoti a le Associated Press a Amerika.

O le falema’i tele i Chapman  Medical Center i Orange County, ua fa’asalaina nei, ona ua fa’amaonia se tasi o ali’i Tausima’i i le ER, ua ia fa’asaua fa’aleituaiga [sexually molested] se tasi o tagata ma’i i totonu o le latou falema’i. Ua fa’ailoa mai le sala a lea falema’i e $75,000. ona o le ali’i tausima’i lea, ina ua mae’a ona ia faia se tui e te’a ai le tiga o le lima o se tasi o tama’ita’i na alu atu i le tigatutui o lona tau’au, ona fa’asolosolo ane ai lava lea o lima o lea ali’i i le manava ma le tua o le ma’i.

Na vave ona faia se tulaga e sefe mai ai le ma’i i aga a lea ali’i tausima’i ma ua fa’ate’a fo’i le ali’i lea i le taimi lava lena mai le falema’i. Na fa’ao’o lava le mataupu i leoleo ma ua mae’a fo’i ona faia ala uma o le tulafono i le tama’ita’i na ma’i ma le ali’i solitulafono.

O le falema’i i Woodland Hills lea e fa’aigoaina o le Motion Picture & Television Hospital,  o se tasi lea o falema’i e tolu i ai falema’i ua fa’asalaina nei ona o le galo o se tasi o meafaigaluega a foma’i tipitipi i totonu o se ma’i na faia lona ta’otoga.

O lenei Komiti Fa’apitoa e va’aia toto’a galuega a ali’i ma tama’ita’i foma’i, fa’apea fo’i ma le au tausima’i, ua latou fa’ailoa mai, e le faigofie le latou galuega, ona o le tele o taimi e fa’asea ai i latou na gasegase po’o latou aiga fo’i sa fa’ataotolia i falema’i, ae sa’ili atu, o lo’o moni ma fa’amaoni nei mea ua tagi mai ai i latou na gasegase ma faia ta’otoga i falema’i o le setete.

Mai le ono o falema’i nei ua faia le fa’aiuga a le Komisi a le Setete e fa’asalaina, ua toe aofia ai ma loe falema’i i Murrieta, ua ta’ua o le “Southwest Helathcare System” lea e fa’apea ua fa’avalu ai lea ona fa’asalaina e le setete talu mai le tausaga e 2007, ma ua sili le falema’i lea i so’o se isi lava falema’i i lea tulaga i totonu o Kalefonia.

O le ala mulimuli lava, o le fa’asalaga lea o le falema’i sa galue ai se tama’ita’i tausima’i ua le mafai ona ia iloa ma saili se togafitiga vave lava mo se tina sa fa’atiga ae o lo ua i ai se fa’aletonu i le tata mai o le fatu o lana pepe, ma ua tatau ai ona fa’afanua vave loa le tina lea. Peita’i, na i’u ina oti lava le pepe i le manava o le tina, ma e fanau mai ua maliu lana tama.

O le taimi o fa’atiga ai lea tina, sa tatau ona iloa e le teine tausima’i sa va’aia lona manava ma le fa’asologa o lona fa’atiga, oua tatau ona fa’afanaua vave le tina ia sefe ai le ola o si ana tama. O lea mea na le mafai e le tausima’i ona matauina o le “fetal distress” ma ua fanau ai le pepe ua stillborn.

O lenei mea na tupu i le tausaga e 2010 , peita’i sa taoto se fa’asalaga se’ia vagana ua fa’amaonia mai nei tu’ua’iga e le  fa’amasinoga, ona fa’ato’a faia fo’i lea o le fa’asalaga a le Setete o Kalefonia latou mo le falema’i.

O le afuaga e faia ai nei fa’asalaga mo falema’i e tutupu ai fa’aletonu fa’apea o le auaunaga, ina ia mafai ona fa’autagia e le taupulega a le falema’i atoa ua fa’asalaina, ia va’aia toto’a galuega ali’i ma tama’ita’i Foma’i o galulue ai, ma ia aofia ai fo’i ma le auaunaga fesoasoani a le vasega o Tausima’i Ali’i ma Tama’ita’i fo’i.

O isi falema’i e tolu ua faia fa’atasi o latou iloiloga ona o mea faigaluega a foma’i ua galo i totonu o ma’i sa faia o latou ta’otoga. O le falema’i tele o Kaiser Foundation i San Diego, USC’s Keck Hospital i Los Angeles ma le Motion Picture and Television Hospital i Wodland Hills.

I le falema’i o Kaiser, ua fa’ailoa mai, o le solo e tusa o le lua futu le umi ua galo i le manava o le tina e 69 tausaga le matua sa faia lona taotoga i lona gall bladder, ma ua le mapu ai le piliki o lenei tina ma ua toe soso’o atu ai ma le fa’ainumia o lenei tina i vaila’au sese e tau togafitiga ai le piliki ma le tiga matuia o lo ua fa’alogoina e ia ona o le solo lea e i lona manava.

Ua fa’ailoa mai e 16 masina o i ai pea lava le solo lenei i le manava o lea tina, ma o le taimi umi fo’i lea o lo’o tigaina ai le tina i le piliki ma le tiga tutui ma ua inu ai fuala’au fa’ate’a tiga sa le tatau ona ia inumia. E $50,000. le sala a lea falema’i.

I le falema’i i Keck, ua galo ai se tapuni o se tasi o mea faigaluega e fa’aola ai le fatu i totonu o le fatafata o le ma’i sa faia sona taotoga o le fat. Ae o le momi mo taotoga sa galo i totonu o tuli o le ma’i na faia le taotoga o le falema’i o Motion Picture and Television. Ua mae’a ona toe ave’esea uma nei meafaigaluega a foma’i mai tino o nei gasegase, ae fa’afetai o lo’o soifua mai pea i latou ma ua mae’a faia fa’ai’uga a le fa’amasinoga i falema’i nei ua toe fa’asalaina e le setete.

O le falema’i o le UC San Diego Medical Center ua fa’asalaina nei mo le $75,000. ona ua le mafai ona latou togafitiale mu o le gutu o le tina na o’o atu i le latou ER i le tusa o le lua tausaga ua te’a nei. Ua fa’ailoa mai, na matua fiu tausima’i leoleo falema’i e tau ave’esea mai lea tina mai le ER, ua le mafai e i latou ona faia sona togafitiga i lona mu, ae le mana’o lava le tina e alu, se’i vagana ai ua faia sona togafitiga.

Na i’u ina sa’esa’e e le au leoleo falema’i le tina lea i le ta’avale la’u pasese e alu ese ai, ae le fia alu lava le tina lea, ma sa i’u ina sa’esa’e ai le tina ae fa’afao i luga o lima o le au leoleo, ae tu’u atu i lalo, ua lanu moana uma laugutu o le tina ma toe fa’avave atu ai i le ER mo togafitiga. Na ato a lelei le masina o faia togafitiga o lenei tina fa’ato’a mafai ona fa’ate’a ua atoatoa lona soifua maloloina.

saunia: Leua Aiono Frost