50 Tausaga o le Fa’afetai - Star Kist Samoa Inc.

“Aua lava ne’i ia te’i matou, aua lava ne’i ia te’i matou le Alii e, a ia fo’i atu le vi’iga ma le fa’amanu ia te Oe le Tama!”

 

O upu amata ia o le folasaga a le ali’i Pule Sili o le Star Kist Samoa i le taimi o le sauniga, sa fa’aavanoa fo’i, na te fa’afetaia ai le Atua, le pa’ia o le Aufaigaluega a le Atua ma le Ekalesia i Fa’apotopotoga Kerisiano i Pago Pago, le pa’ia o le Palega o le Malo o Amerika Samoa ma lona Fa’auluuluga o lana Faigamalo, nofo a Matagaluega, ae tainane le tafatolu o le Faigamalo fa’ateritori a Amerika Samoa i ona tofiga mamalu sa auai fa’atasi i lea sauniga pa’ia.

 

O le agaga lava e tasi sa fa’ailo fo’i e le afioga le Kovana Sili, Lolo Matalasi Moliga, lea sa pa’au atu ma le faletua ia Cynthia Malala Moliga, ina ia lagolago le agaga fa’afetai, ia o’o i le Atua lea lagona, aua ua atoa le 50 tausaga o tautua pea le Star Kist i lenei malo ma ona tagata, ae maise o Pisinisi Tumaoti o lo’o latou galulue fa’apa’aga ina ia au ma atoatoa le latou auaunaga.

 

“O se tasi lenei o poutu o lo’o fa’alagolago i ai le malo i le tulaga o le tausiga lelei o ona tagatanu’u e ala i sosia o le tamaoaiga, aua e le tofu avanoa tagata uma o le atunu’u i le Malo, ae o lenei Kamupani ua silia ma le 3000 tagata e mafai ona maua ai avanoa faigaluega, ma ua o’o le fa’asoa a le Star Kist i so’o se aiga o le atunu’u.”

 

“Muamua, aia tutusa tagata uma i avanoa faigaluega, e le fa’ailoga na’o nisi, ae leai i nisi, ua tutusa pau tagata uma i le filifiliga o agava’a e tatau ai ona faigaluega, ia mautinoa ua fa’atino le galuega i le maualuga e mo’omia ia sili ai ona lelei ma vave le auaunaga i aso ta’itasi.”

 

“Lona lua, ia mautinoa ua si’itia le tulaga e fa’atino ai le tautua ma e fa’aauau lava ona saili ala e mafai ai ona fa’aleleia atili le auaunaga, ia mautinoa e mafai ona fa’atino le galuega, tusa pe o le a ni lu’iga e tula’i mai i ona vaega ta’itasi i aso ta’itasi, ma itula uma!”

 

“Lona tolu, o le taumafai lea ina ia sili ona fa’aitiitia i taimi uma le lapisi o so’o se ituaiga! Ia taumafai ona fa’aaoga mea uma lava e maua mai ona o galuega fa’atino, ia le maumau se mea e aoga.”

 

“Lona fa, e taua tutusa vaega uma o le auaunaga, ia le so’ona fai le auaunaga a le isi itu, ae toso le isi itu o le galuega, ia faia i le taimi le galuega e mo’omia, maua le aotelega sili ona maualuga i aso ta’itasi, ma itula taitasi.”

 

Fa’afetaia fo’i e le failauga, ona o ta’ita’i o le Kamupani o i latou o nisi e matata’u i le Atua soifua! “O ala ia o fa’amanuiaga, o lou to’aga e toe fa’afetaia le Atua i mea uma sa ia foa’i mai!”

 

Ua fa’aalia fo’i i lea lauga, le aofaiga o i latou na fa’afaigaluega e le Kamupani a Star Kist e 32,000 tagata i le 50 lenei o tausaga. Ua iloga mai ua toeitiiti ona ausia lea o le aofa’iga atoa o le faitau aofai o tagata o Amerika Samoa i le taimi nei.

 

O vi’iga o le sauniga, sa matua iloga le matagofie na tapena i ai le aufaipese a le susuga le Faifeau Rev. Fa’atauva’a i Pago Pago EFKAS. Sa tomuli vi’iga o le sauniga, i le vi’i o le Star Kist na saunia fa’apitoa e le aufaipese, ina ia vi’ia atili ai le Atua le Tama i ana fa’amanuiaga i nei tausaga e tele! O le vi’iga lea, Matou te Vivi’i ia te Oe!

 

Na a’apa fo’i le Star Kist i lana pulega ma le aufaigaluega i fa’aaloaloga mo le Ekalesia ma le latou feagaiga taulagi fa’atasi ai ma le afio’aga, ma le malu taeao sa latou tufaina mo i latou uma na aofia ina ua mae’a le taulaga si’itia i le Atua.

 

Comment Here