E 5 suiga tetele ua faia e le pulega o le au taitoa 7 a le Manu Samoa mo lana au lea ua faamoemoe e tausinio i vae e lua o lo o totoe o le taamilosaga taitoa 7 a le IRB, lea o le a faia i Sikotilani ma Enelagi i le faaiuga o le vaiaso e lua o lo o lumana’i nei.

O suiga tetele e 5 i le au e pei ona faalauiloa mai ua toe filifilia ai le uigi saoasaoa a le Manu Samoa ia Mikaele Pesamino, Meki Magele, Neria Foma’i Faafou Amate ma Tom Iosefo.

O sui sa malaga i le taamilosaga i Hong Kong ma Iapani ua faamalolo e aofia ai Alatasi Tupou, Tulolo Tulolo Jr, Paul Perez ma Faatoina Autagavaia.

I se pepa o faamatalaga na tuuina mai i le pulega o le ‘au na taua ai e faapea, o i latou ua filifilia nei ua atoatoa ma talitonuina e le pulega lo latou agavaa mo taamilosaga e lua o lo o totoe a le IRB.

O le taamilosaga a le TMO Marist Pago 7’s sa faia i le vaiaso ao lumana’i le sisigafu’a na faatoa maea atu nei, na faaaoga e le pulega a le Manu Samoa e fili atu ai lana au taitoa 7 e pei ona faalauiloa mai.

Ina ua fesiligia e le Samoa News le faiaoga o le au taitoa 7 a le Manu Samoa ia Tauasa Faamaoni Lalomilo i tulaga sa i ai le filifiliga o le au, sa ia taua ai e faapea, o vaega o lo o aofia i le filiina o le au e aofia ai le malosi, lelei le mafaufau i le faaaogaina o le polo, atoa ai ma le mataalia i totonu o le taaloga.

O le aso 4-5 Me, 2013, tusa lea o le aso Faraile ma le aso Toonai i le taimi Amerika Samoa o le a faataunuuina ai le taamilosaga i Sikotilani.

O Samoa o lo o tausinio i le Pool A ma Aferika i Saute, Kenya ma Kanata, ma ua faamoemoe o le itula e 12:30 i le vaveao o le aso Tofi e taaalo ai ma Kanata i le taaloga lona lima talu ona amata le taamilosaga, ona sosoo ai loa lea o lana taaloga lona lua ma Kenya i le 3:20 i le vaveao o le aso Faraile, ae faaiu i le taaloga ma Aferika i Saute i le 6.59 i le taeao lava lea o le aso Faraile.

O le Pool B o lo o taitaia mai e le au a Niu Sila lea na siamupini i le taamilosaga o le tausaga na tea nei, o Ausetalia i le Pool C ma Farani i le Pool D.

O le maea ai o le taamilosaga i Sikotilani ona sosoo ai loa lea ma le taamilosaga i Enelagi i le aso 11-12 o Me.

O le taimi nei o lo o tulaga fa Samoa i le faasologa o au a le IRB i ‘ai e 94, sosoo ai Fiti i le 98, Aferika i Saute e 100 ma Niu Sila o lo o tulaga muamua i le 132.

O le lisi la lenei o le ‘au: Afa Aiono, Levi Asi Faamatala, Lio Lolo, Meki Magele, Neria Foma’i, Tom Iosefo, Sani Niue, Patrick Faapale, Lolo Liu, Reupena Levasa, Mikaele Pesamino ma Faafou Amate. Faaleoleo e aofia ai Taulagi Afamasaga ma Oneone Soisoi.

faaliliu: AF