Ads by Google Ads by Google

5 suiga fou i le Maota o Sui i le mae’a o le palota

E tusa ai o le faaiuga e le aloaia lea ua tuuina mai e le Ofisa o Palotaga a le atunuu, mo tofi Faipule i le Maota o Sui i le Fono Faitulafono, ua atagia mai ai suiga e lima mo le Nofoaiga lona 33 a le Fono Faitulafono, e aofia ai se faipule tama’ita’i ua ofi atu i upu fai o malo, le susuga ia Vui Florance Saulo lea ua sui tulaga ia Tapumanaia Galu Satele Jr mo le itumalo o Tualauta.

O le taimi lata mai na nofoia ai e ni tamaitai nofoa o le maota o sui, o le palota o le 2006 ina ua manumalo mai Fiasili Puni E. Haleck mo le afioaga o Pago Pago, ae o Mary Lauagaia mo le afioaga i Nuuuli.

O faipule fou e to’alua ia ua manumalo mai i le palota lenei, sa avea muamua fo’i i laua ma faipule o a la itumalo i tausaga ua te’a, e pei o le afioga ia Atualevao Gafatasi Afalava mai le itumalo #17, ma le afioga ia Fagasoaia Foa A. Lealaitafea lea ua manumalo mai i le isi nofoa mo le afioaga o Nuuuli.

O se tasi o tulaga mataina i le palotaga o lenei tausaga, o le tulaga e pei ona tutusa ai le palota a le Itumalo #8, mo le afioga ia Vailiuama Steve Leasiolagi ma le afioga ia Maugaoalii Leapai Sipa Anoa’i i palota ta’i 207.

I lalo o le Tulafono tau Palota, e i ai le avanoa e mafai ai ona talosaga sui tauva e toalua ua tutusa palota e toe faitau a laua palota, ae afai e le talia e le Komesina o Palota, o lo o i ai i le Komesina o Palota le malosi na te valaau ai se isi palota mo le itumalo.

O Maugaoali’i sa avea muamua fo’i ma faipule mo le afioaga o Fagatogo, ina ua manumalo mai i le nofoa sa tauaveina e le afioga ia Matagi Ray McMoore lea ua avea nei ma Faatonusili o Pulega o Uafu ma Malaevaalele, peitai na suia ina ua manumalo ai le afioga ia Vailiuama o lo o ia nofoia le nofoa o le itumalo i le taimi nei.

Mai nofoa e 21 i totonu o le Maota o Sui, e 20 nofoa e palota sei vagana ai le nofoa e tasi mo le motu o Swains, e filifili mai lava e tagata o le motu o Swains sa latou sui, lea ua toe filifilia i ai le afioga i le alii faipule ia Alexander Eli Jennings.

E na o le afioaga o Aua e le’i faia sa latou palota e filifili ai so latou sui faipule, ina ua leai se sui e tauva ma le afioga i le alii faipule ia Faimealelei Anthony Allen o lo o nofoia le nofoa i le taimi nei.

E tasi le faipule o lo o ia nofoia le nofoa a lona itumalo i le taimi nei e le’i toe tauva i le palota lenei, o le afioga lea ia Agaoleatu Charlie Tautolo mai le Itumalo #4, lea la ua tula’i mai ai le afioga ia Talimatasi Elisara Su’a.

O se tasi o faipule ua tele tausaga o tautua i le maota o sui lea foi ua toe manumalo mai i le nofoa a lona itumalo, o le afioga i le alii Fofoga Fetalai ia Savali Talavou Ale mai le Itumalo #14.

E tusa ai o le Faavae, o le aso 3 Ianuari 2013 i le itumalo e 12:00 e faatautoina ai le nofoaiga fou e taitaia le malo mo le isi 4 tausaga, ae 2 tausaga mo le maota o sui.