Ua mae’a le tausaga oso lenei, e 29 ai aso o Fepuari, ae o le isi tolu tausaga, o le a na’o le 28 aso o Fepuari, o lona uiga la, o le a leai lava se Fepuari 29 i na tausaga se’ia atoa fo’i le isi 4 tausaga.

Mai fa’asalalauga i atunu’u i fafo, ae maise ai le Iunaite Setete, ua avea fo’i ia i latou nei se fa’amuamua e fa’asalalauina ai ni o latou ata, aua e fa tausaga ona fa’ato’a fa’ailoga lea o so latou aso fanau.

I le tala mai le Iunaite Setete o Amerika, sa mua’i fa’aalia ai, e tusa e tasi le pepe e fanau i le tausaga oso i le 150,000 pepe ua fanau i isi aso uma o le lalolagi. Oka o lea ua le iloa e le vaega lea, e la’itiiti lava la tatou nei teritori, ae o lea ua fanau ai ma le manuia le to’alima o pepe. E to’atolu tama, ae to’alua teine.

Mai le amataga o le o’o atu i le falema’i o tina ma o latou pepe, sa 'iloga ai, ua tatau ona sainia ni pepa e mafai ai ona fa’ato’a tapu’ea ata o le fanau mo lenei tala fa’asalalau. Lona lua afai lava e le manatu se tasi e ao ina fa’asalalauina fa’amaumauga o lana pepe, e le tau pu’ea la se ata o lea alo o le atunu’u.

Peita’i, e fa’afetaia le agaga fiafia o tina uma ma o latou aiga, e fa’asalalauina ata o a latou pepe i le nusipepa. Lona lua, e i ai tina e le’i maua ni igoa e fa’asuafaina ai pepe i le taimi ua to’ai taunu’u atu ai le pu’eata mo lea fa’amoemoe. O lea ua faia ai se fa’ai’uga, o le a fa’asolo pepe 'aulelei uma nei, i le taimi na fanau mai ai ma le manuia i Amerika Samoa.

O le fa’asologa o lenei ata, ua pu’ea ai pepe ina ia fa’asolo i lo latou matutua o i ai, ma e amata mai le ali’i na soifua mai i le 12:30 i le vaveao o Fepuari 29, 2012. I le o’o mai i le vaveao, sa soso’o lava pepe i le itula e ono, itula e fitu ma le itula e 8 i le taeao lava, ona soso’o ai lea ma le 9 i le po o le a toe o’o ia Mati 1, 2012 le kalena o le taimi ma le aso.

E to’atasi lava le ali’i sa taoto si ona tina ae o isi uma tama ma teine, sa fanau lelei lava i latou. Ia manuia lo outou olaga Pepe uma o le tausaga oso!