Ads by Google Ads by Google

261 sainia le Fanoga a Alataua mo le faaleleia o fale aoga

“A LE MAFAI ONA MAUA NI FALEA’OGA, FAUSIA NI FALE SAMOA MO ALATAUA 2”

 

O le Aso Gafua o le vaiaso nei lava, na tapunia ai e le Ofisa o le Soifua Malolo le fale’ai o le A’oga a le Alataua, ma ua fa’ailoa mai, na saunia atu i le Fale’ai o le A’oga Maualuga a Leone mea tausami a le fanau i nei aso a’oga uma o le vaiaso.

 

O le fesili na tula’i mai, “Aisea fo’i ua toe tapuni ai, ae sa i ai le lua vaiaso atoatoa na taofia ai a’oga a le fanau, ae se’i taga’i muamua le Matagaluega o A’oga i tulaga o fale’ai?” O le lagona na o’o ane i loto ma agaga o aiga na tusia o latou suafa i le lisi e 261 tagata na sainia ai o latou igoa, “Ua le gatusa fo’i le va’ai a le Malo i isi a’oga uma, ma le a’oga i Alataua 2.”

 

O le afuaga lea na fa’atautaia ai se latou tusi umi, lisia ai o latou lagona o’otia ma manatu ua fa’aitu’au le faiga o le latou a’oga mai isi a’oga uma i le teritori, ma ua lisia ai suafa e 261 tagata, lea ua mae’a taua’ao i sui tofia uma o le Maota Maualuga o le Fonofaitulafono, ma Faipule uma fo’i o le Maota o Sui o le Fono, ae maise le tusi ua taua’ao fo’i i le Taiulu o le faigamalo a Tutuila ma Manu’a, Kovana Lolo Matalasi Moliga.

 

Muamua i le lisi, ua fa’atagisia ai le fausia o Falea’oga o Alataua 2 ae se’i ave’esea faleie tetele o i ai mo a’oga a Alataua 2, “E le lava le malolosi o le ea malulu o i ai, ina ia gafatia ona fa’amalulu ai le fanau pe a o’o ina vevela tele le la, ae ua matua mausa ai le tele o ituaiga manogi eseese i totonu o nei fale’ie, aua e leai ni fa’amalama e tatala ma maua ai se ea fou.

 

O lo’o lisia mai, o ili tetele e lua sa mafai ona fa’asavili ai nei faleie aua sa le ola ea, e le’i ola fo’i nei ili i le amataga o lenei tausaga a’oga, ma ua molimauina e faia’oga o galulue i nei potu, “O lea lava le mea sa sau ai le tausaga a’oga ua te’a, ua le suia lava i lenei fo’i tausaga a’oga ua a’e nei.”

 

O se mau ua fa’atu mai, “Afai ua le mafai ona maua ni falea’oga pei o falea’oga o isi a’oga uma, ae ia fausia ia ni falesamoa mo Alataua 2 e faia ai vasega, aua e savili ma le o’otia fa’atasi ai faia’oga ma fanau a’oga i le vevela tele, ma le ta’ai o le ea vevela i totonu o nei fale’ie.”

 

O se isi fa’afesili ua o’o mai i lagona o tagata o Alataua, pe moni ea e toe faia ni falea’oga mo le fanau a’oga i Taputapu, lea ua tu’ufa’atasia mai ma fanau a’oga i Alataua talu mai le galulolo tele o le tausaga 2009.

 

“Ua maumau le taimi e fa’alele ai fa’amatalaga e faia falea’oga nei, ae le toe fa’ailoa maia pe moni pe leai, ae ua lima fo’i tausaga talu ona tuana’i o lea lava galulolo, ua sili la ona fa’amoe lea mataupu, aua le toe ta’uta’ua so’o mai.”

 

Ona o nei fanoga o lo’o onosa’ia e le Itumalo o Alataua, ua fa’ailoa mai e le tusi, “O lo’o matou onosa’ia nei mea uma, e pei lava o le onosa’i a Iopu.”  Peita’i, ina ua mae’a lisia mai nei mea, ae tomuli ai nisi mea e fa’apea, “O nisi o nei tane e fa’aalu i ai le vai lafoa’i, septic tank, ua la’ititi tele, ma e le’i pamua lava  talu mai le amataga. A timu, ona tafe lea o leneivai ma fefiloi ma lepa i autafa o le isi falea’oga. O nisi fo’i falea’oga ua tuai ma ua sosolo ai le vao i luga o lau o le tumutumu, ae o le ogatotonu o le malae, o lo’o alu ai se alavai, e tafe pea e le ufitiaina ne’i afaina ai se tamaititi, o afea e taua ai le va’ai i le fanau ma lo latou soifua?”

 

“O lo ua matauina le tele o fa’asalalauga a le Homeland Security [Saogalemu Fa’alotoifale], ae a o’o ina fa’atino, o fea se ala lelei e mafai ona tamomoe ai le fanau i luga o le mauga o lo’o tulata lava i le a’oga? E tatau muamua ona fa’atino mea lelei na, e mafai ona mautinoa ai le saogalemu o le fanau i taimi fa’atopetope ma le le mautonu.”

 

O nai fa’anoga la na ua mae’a fa’auluina i totonu o Ofisa o le Fa’atonu o A’oga, Fa’atonu o le Soifua Maloloina, Fa’atonu o Galuega Lautele, Fa’atonu o le Matagaluega o Fefa’ataua’iga, Ofisa o le Faipule o Amerika Samoa i le Konekeresi, Matagaluega a le Initeria, fa’atasi ai ma le Ofisa o le Kovana i lana afioga Kovana Lolo Matalasi Moliga ma lana Sui Kovana Lemanu Mauga, Sui uma lava o le Maota Maualuga o le Fono ma Faipule uma lava o le Maota o Sui o le Fono.