Ads by Google Ads by Google

25 masina fa’asala ai Gustav Nauer i le falepuipui

LAU I LE ASO NEI LE FA’ASALAGA O PAUL SOLOFA

E lima tausaga nofosala i le falepuipui ma se sala tupe e $250,000 na ono fa’asala ai Gustav Nauer, lea na fa’auluulu i ai vaega o pasi aoga a le Ofisa o A’oga, ona o moliaga i lona taupulepule e solia ni tulafono feterale, lea na ioe i ai i le masina o Ianuari o le tausaga ua tuana’i.

Ae peita’i ane, ua i’u iloiloga o lana mataupu, ma o le amataga o lenei vaiaso na fa’asala ai le fa’amsino o Fa’amasinoga Fa’aitumalo a Amerika, o David Alan Ezra, ia Nauer, i le na’o le 25 masina, i le falepuipui.

O Nauer, na mafai ona tatala i tua ina ua mae’a ona ia totogia le tinoitupe na fa’atonuina e le fa’amasinoga, ma sa aumau o ia i Honolulu, e fa’atali ai le fa’ai’uga o lona fa’amasinoga.

Fa’atasi ai ma lona nofosala i le 25 masina, ua fa’atonuina foi Nauer, e na te totogia se tinoitupe e $100,000 i le Ofisa o Aoga, ona toe nofo va’ava’aia lea mo le tolu tausaga, pe a mae’a ona tuli lona fa’asalaga fa’afalepuipui.

E tusa ai ma se maliliega ua mae’a ona faia e Nauer ma loia feterale, na ia fa’amaonia ai lona taupulepule ma Paul Solofa, e fa’atau ni totoga o pasi aoga, i se auala le fa’amaoni, mai i se kamupani.  E ui e le’i ta’ua e le feterale ia le igoa o lea kamupani, ae peitai, na fa’amaonia i ni fa’amaumauga a le fa’amsinoga i se vaitaimi ua tuana’i, o le kamupani lea, o le Pacific Products, lea o lo o i Tafuna.

Ae na ioe lenei kamupani e totogi tupe Nauer ma Solofa, ona o nei oka.  E faia lenei tulaga, ae o lo o avea Solofa ma fa’auluuluga o le ofisa pisinisi (business office) a le Ofisa o Aoga.

E tusa ai ma fa’amaumauga a le fa’amasinoga, o lo o ta’ua ai le fa’amaonia e Nauer, lo la mauaina ma Solofa o ni teutusi e i ai tupe i totonu, e o’o lava i le $300,000, i le va o Ianuari 2003 ma Oketopa 2006.

Na molimau foi Nauer, mo le itu a le malo, i le fa’amasinoga o Solofa ia Ianuari 2012, lea ua ta’usala ai Solofa i le faitauga e tasi o lona fa’alavelave i se molimau fa’apea ma lona fa’alavelave i su’esu’ega a le malo feterale.

O le aso ua fa’amoemoe e lau ai le fa’asalaga o Solofa, lea o lo o loka nei i se falepuipui feterale i Honolulu.