Ads by Google Ads by Google

24 MASINA O AUMAU SE AUUSO I LE TOESE

O le auuso talavou ia na loka i le falepuipui i Tafuna ina ua la ioeina moliaga e lua e aofia ai le gaoi ma le talepe falei le tulaga lua, ua tatala i tua e le faamasinoga maualuga i le vaiaso nei, i le maea ai lea ona o la tuliina o masina tai 24 i le toese i Tafuna.

Na talia e le faamasinoga maualuga le talosaga na tuuina atu e se sui o le auuso, e faailoa atu ai lona taumafai e vaavaai gaioiga uma a le au alii ia i soo se taimi lava pe afai e tatala mai i tua.

O le alii o Filautoa Fuiono ma lona uso o Niko Fuiono na uluai tuuaia e le malo i moliaga e fa, lea e aofia ai moliaga e lua o le talepe fale i le tulaga lua ma moliaga e lua o le gaoi, ae i lalo o se maliliega sa laua sainia ma le malo, na la tali ioe ai i moliaga e lua ae solofua isi moliaga e lua.

O le tofa ia Ta’aloloioufaiva  Lt. John Cendrowski na faaleoina le talosaga e fai ai o ia ma sui o Filautoa ma Niko, e talosagaina ai le faamasinoga ina ia tatala i laua nei i tua.

Na faailoa e Ta’aloloioufaiva, o ia foi lea o loo faauluulu i ai le Vaega e vaaia luga o le alatele a le Ofisa o Leoleo e faapea, afai e tatala e le faamasinoga i tua le auuso lenei, o le a mautinoa e le toe aafia i laua i nisi lava solitulafono, o le a ia fesoasoani foi ia te i laua.

E lei faatuiese le malo i le talosaga a le alii leoleo, ae sa faailoa e le  tamaitai loia ia Kelly Dixion lona taliaina o le talosaga ina ia tatala le auuso i tua mai le toese, lea foi e lei tetee i ai le faamasinoga.

I le tatalaina ai la i tua e le alii faamasino sili lagolago ia Lyle L. Richmond o le auuso i tua, ua fautuaina ai i lauaina ia usitai i poloaiga uma ua maea ona tuuina atu ia te i laua, atoa ai ma lo la faia lea o ni galuega mo le atunuu lautele mo le umi e 300 itula, i lalo o le taitaiga a le Ofisa Faanofovaavaaia, ona o le tele o mea sa laua gaioia mai i le fale na la osofaia e lei mafai ona toe faafoi.

O le poloaiga foi lea na faia la te tuua ai le teritori ae toe foi atu i Samoa, ua manatu le faamasinoga o le a taofi lona faataunuuina, fuafua lea i lo la  usitaia o poloaiga o le la faanofovaavaaia.

O mea na ave faagaoi e le  au ula ia e aofia ai taaloga xBox, o video games, tv, laptop ma se amplifier, ina ua la osofaia le fale o le aiga na aafia i le 2008.