Ua fa’ailoa mai e Liora Barba, le tama’ita’i o lo’o ua avea ma fa’atonu o le polokalama a le WorldTeach mo Amerika Samoa, “E to’a 21 i latou ua mae’a autova’a mai i Amerika Samoa ina ia avea ma faia’oga, i aoga a le malo, e matele lava i le Igilisi po’o le Fa’aperetania, ina ia a’oa’oina ai fanau i vasega tulaga muamua, po’o elementaries.”

O nei faiaoga a le WorldTeach ua mae’a fa’anofoia nei i le Falea’oga fou o le Nuuuli VocTech High ina ia fa’atautaia ai latou a’oa’oga fa’apitoa, ia mafai ona feso’ota’i latou tomai fa’afaia’oga sa a’oa’oina ai i Amerika, ma tiute fa’afaia’oga i le potu a’oga i le teritori.

“E moni lava, o i latou ua mae’a umia tusi pasi e avea ma faia’oga, e matele ina agava’a mo faia’oga i a’oga tulaga lua, peita’i, e i ai le aganu’u fa’asamoa ma uiga o fanau iinei e ao ina mua’i fa’ailoa ia i latou, ina ia usita’ia e i latou i potu a’oga,” o se tala lea a Barba.

E le silia i le lua vaiaso lea e fa’atautaia ai latou a’oa’oga nei, ona fa’ato’a faia lea o latou fa’ata’ita’iga ae maimoaina e le vasega o ta’ita’i ma nisi fo’i o faia’oga mai le tatou malo nei, ina ia mataituina latou faiva i potu a’oga, pe ua talafeagai ma tiute fa’atino.

“O le vaiaso a sau, e fa’atino ai e faia’oga pe ua agava’a i latou, ma e faia e i latou a’oga ae maimoa i si fa’atasi ai ma le pulega, ona fa’ato’a tu’u atu lea o i latou mo le faiva i potu a’oga.”

I le aotelega o tausaga o i latou ua o’o mai i fanua mo le avea ma faia’oga i le fanau talavou a le atunu’u, ua iloga ai, e talavou fo’i i latou. Ua i ai aiaiga tamau o le avea ai o i latou ma faia’oga i potu a’oga, ma o ia fo’i aiaiga e fa’amalosia uma lava, ae maise ai, ua i ai fo’i le lisi o tulafono a le Matagaluega o A’oga ua mae’a tapena mo faia’oga uma lava i potu a’oga a le malo.

Mai nei vaega o aiaiga tamau o le galuega, o le vasega lenei e fa’aa’oa’o ai faia’oga ofo mai le latou tautua mai le World Teach, ina ia faia ai le latou galuega i aso ta’itasi i potu a’oga.

E na o le tasi le tausaga o le konekerate faiaoga a i latou nei mai le WorldTeach e galulue ai mo le Matagaluega o Aoga a le malo.

I le Aso Lulu, sa amatalia le latou a’oga i le itula e 8:00 i le taeao, se’ia pa’ia le itula e 11:00 ona latou gasolo lea e alu le latou sopo e fa’amalosia ai o latou tino, va’aia i nisi vaega o le motu o Tutuila, ma ia latou iloa ai fo’i ona feoa’i.

“O le avea ai o matou ma faia’oga e ofo mai le tautua mo Amerika Samoa, o le a matou molimauina ai afaina ma lu’iga o lo’o feagai ma isi faia’oga, ae maise o le fanau a’oga, ma le matagaluega fo’i o A’oga, ma o le a aoga tele lea, mo sa matou lipoti aoga mo nisi suiga lelei e fa’atino ma fesoasoani mai ai le Malo tele mo i tatou o lo’o soifua i le teritori,” o se fa’amatalaga lea ua lomia i le upega tafailagi a le WorldTeach.

O le aoga i le faia’oga o ofo mai lana tautua, o le a latou iloa ai fo’i tu ma agaifanua a lea atunu’u, fa’aopoopo i ai ma le iloa atu o lea atunu’u ma lona matagofie o natia ai mai ia i latou e to’atele o lo’o soifua i Amerika. O luiga o le a feagai ma i latou e fa’aleleia atili ai lo latou iloa ona soifua tuma’oti mai le tele o mea sa soifua a’e ai i lona setete.

O Aukuso 24, 2015 o le a mafuta fa’atasi atu ai i latou uma nei i le isi vaega atoa o faia’oga a le malo i le tatala aloaia o le tausaga aoga fou 2015/2016.