Ua fa’ailoa mai e le vaega o Leoleo o le Gataifale po’o le Sami a Niu Sila, “O ali’i e to’alua sa amata mai le latou faigamalaga i le sami ina ia uia le vasa Anetatika, ma ua i’u ina maliliu le to’atolu o lea aumalaga,  ua toe aga’i ese mai le la’ua faigamalaga mai ogasami o Niu Sila, e foliga mai o lo’o taumafai ina ia o’o i le Pole i Saute, ona o tulaga, e le o lelei o la’ua pepa femalaga’i.”

O nei ali’i o Jarle Andhoy 34 on tausaga, ma Samuel Massie 18 ona tausaga, na taumafai i la’ua e kolosia le sami ‘aisa i uila vili vae i le masina o Feppuari 2011, ae o le la’ua va’a o le Berserk ma le ‘au malaga e to’atolu, na toe fa’ailoa mai ua magoto i le vainu’u o Mcmurdo Sound.

Fai mai e na’o le ‘va’a fa’aola’ pa’u lea na maua i le sailiga na sa faia e le NZ Maritime. Na i ai ata o lenei to’alua na pu’eina ina ua la’ua to’ai taunu’u i le Malae Va’alele i Karaiesetete Niu Sila, peita’i, ua toe leiloa atu se mea o i ai i la’ua nei, ma ua toe sailia ai nei e le vaega a leoleo o le Gataifale a Niu Sila.

O lo ua fa’alauiloa i le mamalu lautele, ina ia va’ava’ai toto’a mo foliga o nei sui e to’alua, atonu e maua ane ai se vaipanoa o Niu Sila o lo’o nonofo ai, ae maise ai o lo’o ua fa’ailoa fo’i i va’a fagota ma isi ituaiga va’a uma lava, ina ia va’ai toto’a i e fia avea ma auva’a pe mata o lo’o tau atagia ane ai foliga o lenei to’alua.

Ua fa’alauiloa i ali’i va’a o le Nilaya, fa’atasi ai ma leoleo o le gataifale, ia va’ai toto’a i le auva’a lea, aua o le va’a lea sa tu’ua le uafu i Karaiesetete e le’i leva atu, ma o le taimi tonu fo’i lea ua leiloa ai lea auali’i. O le aso Gafua nei lava ua leiloa ai le vaega lea mai le puipuiga malu a leoleo o le gataifale sa i ai.

Ua i ai le talitonuga o le Maritime NZ o lo’o ua toe taumafai fo’i le to’alua lea e kolosia le Vasa Anetatika ae le’i faia lava se la’ua pemita fa’ataga mo lea tulaga, e pei lava fo’i ona maua atu ai muamua. O le ali’i o Andhoy, o se ali’i folau mai Nouei e lauiloa o ia, aua ua tusa ma le tolu ana malaga ua faia i le Anetatika ae tele fo’i ana malaga ta’amilo i le Vasa Atika.

O se mea ua iloga mai, e fa’ate’ia lava le itu i saute o Niu Sila ua alia’i ai le to’alua lea, Andhoy ma Massie, aua na o’o mai i la’ua i le Scott Base ina ia mafai ona maua e i la’ua le malaga a le va’alele e ave ai i la’ua i Karaiesetete mo le taumafanafana. Na la’ua to’ai taunu’u i Karaiesetete, ma o i’ina sa pu’eina ai le la’ua ata lea na fa’asalalau e Niu Sila mo le la’ua tala tusia e uiga i le aumalaga e to’atolu ua magoto le va’a sa malaga mai ai, ma ua maliliu ai i latou uma na.

saunia: Leua Aiono Frost