Ads by Google Ads by Google

2 Faife’au & Faletua Fasiotia i Mexico

Mai le a’ai o Mexico ua fa’ailoa mai ai le Faife'au ma lona faletua mai Texas sa faife'au i lea a’ai i le nu’u o Santiago, ua fasiotia fa’atasia ai i la’ua, ma ua fa’amaonia lea tala e le Amepasa o Amerika i Mexico. O i la’ua nei o Pr. John & Wanda Casias.

O la la’ua tama teine o Valerie Alirez, o ia lea e ulumatua, sa ia vala’au i le Associated Press mai lona fale i Greeley Colorado ma fa’ailoa i ai ni isi o tautua a ona matua, ma ua fa’ailoa fo’i i ai, o lona tuagane na ia muai mauaina tino maliu o lona tina ma lo latou tama i lo la’ua fale lava i Santiago, Nuevo Leon, ua maliliu fasia ai.

O le aiga lea e o mai Amerillo Texas, ae o le la’ua filifiliga e o e nonofo i Mexico i le vaitausaga 1970 po ’o le amataga fo’i o le 1980’s ma 'avea i la’ua ma faife’au o la latou ekalesia, o sa la’ua tautua lea i le Atua.

O i la’ua o ni Faife’au o le Ekalesia Papatiso ma e fa’atautaia fo’i e i la’ua le First Fundamentalist Independent Baptist Church i Santiago, Mexico. O lona tuagane, John Casias, e nonofo o ia ma lona aiga i Monterey, na alu i le fale o ona matua e 'aumai le trailer na te fa’aaogaina, ma e tu lava le trailer latou i fafo, o se nofoaga e mafai lava ona alu atu o ia, fa’apipi’i ma 'aumai, e le tau alu fua i totonu o le fale o ona matua, peita’i, ua uma ona ia tapena o le a toso le Trailer, ae toe manatu lava se’i alu i totonu o le fale e feiloa’i i ona matua.

O i’ina na ia maua atu ai si ona tina, Wanda Casias, o lo ’o ua ta'oto mai i luga o le fola o le fale, ae o lo ’o mau ai lava le uaea eletise i lona ua, o se mea sa fasiotia ai o ia, ae o lo ’o foa fo’i lona muaulu e pei sa ta i se au’upega matatupa.

I lana va’aiga i le fale o ona matua i le taimi lea, ua misia mai Komipiuta e lua, o le plasma televise ma le sefe ua tase’i mai i fafo ona fata ma fa’aleaga pei sa tau’ai aga’i i le puipui o le fale. Ua leai fo’i se ta’avale Cervy Suburban a ona matua sa tatau ona tu i fafo, ma ua ala ai ona manatu si tama o John, ua 'avea fa’amalosi lona tama e tagata leaga na osofa’ia le la’ua fale ma fasiotia ai na’o si ona tina.

Peita’i, e tusa ma le fa i le lima itula mulimuli ane o tau s'ailia pea e John mea ua fa’aleagaina a ona matua, ae fa’ato’a ia maua atu le tino maliu o si ona tama i le potu e teu ai meatotino a i la’ua i se tasi o tama’i fale i lo la’ua fanua lava. O lo ’o mau ai fo’i ma le uaea telefoni i lona ua, o se ala fo’i lea na fasiotia ai o ia.

Na fa’ailoa e Casias i le vaega o leoleo su’esu’e, o lona to’alua i Dallas sa mulimuli lava vala’au mai i lona tama ma lona tina, e tusa ma le 11:00 i le taeao o le aso Lua, ma na fai atu lava i la’ua o lo ’o manuia i la’ua uma ae maise ai o le ekalesia. E sau lava ia, ae o lo ’o i ai lona manatu, o le a tau mai i sa latou mafutaga fiafia ma ona matua toe alu ai e ‘ave le trailer la te fa’aaogaina.

O le lima itula lea sa ia fa’aaogaina e malaga (kalaiva) mai ai i le fale o ona matua, o le va lava lea sa fasiotia ai i la’ua, ma ua matua ‘ese se va’aiga ua ia taunu’u mai i ai. O i latou na fasiotia ona matua, ua le mafai ona 'avea uma mea sa latou manatu e ‘ave, e aofia ai isi televise e lua tetele o lo ’o i totonu o le fale. Masalo na iloa i ona matua, ua toeitiiti to’ai taunu’u la la’ua tama o lo ’o malaga mai. O le afuaga, e mafai ona iloa mamao atu lava le sau o le ta’avale i le ala e aga’i mai i le fale o ona matua.

“O tagata nei ua faia lenei mea i o’u matua, o ni tagata e leai ma se alofa o i ai, o ni isi e le maua ni mea e ola ai, ae ua sa'ili mea i ala fa’asolitulafono fa’apenei e aofia ai le gaoi ma le fasioti tagata matuia fa’apenei.”

Na fa’ailoa e John na mua’i osofa’ia fo’i e vaega leaga nei le fale o latou matua i le tausaga ua te’a, ae le’i i ai o latou matua, o le taimi lea o asiasi atu i la’ua i Amerika, fa’asolo le la’ua asiasiga i lala o la la’ua ekalesia, ma faia ai la’ua ta’utinoga i le fita fo’i o feagai ai ma i la’ua i totonu o le malo o Mexico i le la’ua misiona o tautua ai i le Atua.

“Ua ou mautinoa lava o se tasi na te iloa lelei o’u matua lea ua faia lenei tulaga ia i la’ua uma.” Ua fa’ailoa fo’i e ia i le nusipepa ma le televise, “Ua i ai ni isi o lo ua maua’a le fa’amoemoega o leoleo latou te su’esu’ea au'ili'ili ona sa va’aia i latou o i ai i le fale i lea lava taeao.” O le ali’i faife’au ua atoa le 76 tausaga le matua, ae o le Tina o le aiga o Wanda Casias e na’o le 67 tausaga le matua.

Ua fa’ailoa fo’i e John, e faia sauniga a ona matua ma la latou 'aulotu i le malumalu e tusa ma le 3 maila le mamao mai lo la’ua fale. E i ai fo’i le Uepesite a ona matua e fa’amaumau uma ai mea uma lava a le Ekalesia ma la’ua fe’au mo le ekalesia ma ona totino uma, e feso’ota’i ai pe a le telefoni fo’i. [www.casias.org]

O sana fe’au sa tusia e aofia ai lana tala fa’alaua’itele i le vaega a CARTEL, o se tasi o lo’o ua lauiloa i Amerika ma atunu’u uma o le lalolagi i le tulaga o fuala’au fa’asaina ma le tele o vaila’au o’ona o lo’o latou gaosia ma tufatufaina atu i so’o se atunu’u i ala fa’asolitulafono.

O le tele lea o molimau a lenei faife'au ma le faletua i le taimi sa toe malaga ta’amilo ai i latou lala i Amerika, ae taliu mai ua atia’i fo’i la la’ua fale e le vaega leaga. O le lona lua lea o faife'au ma faletua ua fasiotia fa’apenei i Mexico lava i totonu o le 30 tausaga. Ua fa’ailoa mai le faife’au muamua sa osofa’ia lava i totonu o la la’ua ta’avale ina ua poloka mai le 'auala e le vaega leaga lea i lona itu fo’i e matua leaga mea e tutupu ai, ona o le tele o le solitulafono 'ese’ese o fa’atautaia ai.

O Nancy Davis 59 tausaga, na fana sa’o lava lona ulu, ae o si ona to’alua o Samuelu, na 'avea fa’amalosi e le vaega leaga ma fasiotia 'ese ai, ae ‘ave fo’i ma la la’ua pikiapu e fa’aaoga ma latou. O se tala lea o lo ’o muta ai su’esu’ega a leoleo i lena faife'au fasiotia ma lona to’alua.

saunia Leua Aiono Frost