“Ia ta’ito’atasi le tagata ma sa’ili i lona loto, pe se a se mea lelei ua tatou maua mai le o’o mai i le Talalelei i o tatou laufanua! Fa’afetai ua malamalama pea Amerika Samoa, ma ua mumu pea lea sili i o tatou olaga, ae maise i totonu ia i tatou ta’ito’atasi!”

“Pe ana leai se Talalelei, o fea o tatou o i ai?” Fesili ai oe, ona e silafia ai lea o le tele o le sao o lea fo’i manulauti na o’o mai ma ulua’i misionare i o tatou laufanua. E ese mai le a’oa’oga taua o le ola feavata’i, fetausia’i, fealofani ma le agaalofa, masalo o le toto masa’a ma le femisa’i e matele ina tatou o soifua ai!”

Ua atoa le 180 tausaga o le talalelei na to’ai taunu’u mai i Laloifi ma Falesau o Faleomavaega, ae sa mua’i faia se sao o se alo o lea lava afio’aga, o le malaga mamao i Savai’i e fa’alogologo i a’oa’oga o le Tusi Pa’ia o faia i Sapapali’i Savai’i i le Malae o Mataniufeagaimaleata!

Ua ao Tutuila ina ua to’ai taunu’u le sulu o le malamalama o le soifua alofa, le taui ma sui, ae ia e fa’amagalo! “Tama a Siona e, ia e matua fa’ataunu’uina lava ou faiva i le Upu, aua o oe ma ou gataifale na ulua’i suluia i le Malamalama o le Atua!”

“Ia avea oe ma sulu e mumu, aua lava ne’i e fa’avaivai, po’o fea le talitonuga fa’a-Kerisiano ua e tautua ai ma tapua’i i le Atua soifua, ia e matua fa’ataunu’uina lava ou faiva!” O le lu’i lena o lenei vaitau, aua sa to’atele alo o Leone sa va’aia ua tu’ua o latou malumalu ma fata faitaulaga o latou o folafola ai le Talalelei, ae ua fotua’i atu e toe fa’atepa i latou i le amataga mai, lea e ao ina e toe tepa i ai, e tapena ai le lumana’i o le Upu ale Atua i so’o se fata o latou tautua ai!

“O le malamalama itiiti sa susulu i le pogisa, ae ua fa’amalamalamaina ai le atunu’u atoa, e amata mai i le fa’ato’a oso a’e o le la se’ia o’o i lona tutonu o le malamalama!”

Ia tatou iloa e fa’asolo ina e malamalama atili i le finagalo o le Atua, ma ia e auauna ai pea lava!

O nisi nei o folasaga sa faailo, sa laulauvivilu ai le vasega o failauga i le aso na fa’amanatu ai le 180 tausaga talu ona o’o mai le Talalelei.

I fafo o le Malumalu sa tutuina ai le Feagaiga Taulagi EFKAS i Leone Eteuati Toma le sulu i luga o le Ma’a Fa’amanatu, ma aga’i ane ai taua’ao ia Amoamo o le auaiga Sa Fiu le lamepa mo le fa’ao’o i totonu o le Malumalu o Siona le Mauga Pa’ia.

O le ta’ita’i o lea sauniga mamalu o le Susuga le Taitaifono EFKAS Rev. Elder Lavata’i Fa’ata’ape, ae tofusao i ai isi o le aufaigaluega totofi. E valu moli ga’o fa’apitoa sa tutuina mo tagata matutua uma o le afio’aga o i ai nei, o tina uma lava i latou: Keleise Samoa, Mata’uitafa Solomona, Sa Salave’a, Malae Ilaoa, Siupolu Smith, Fausaga Reese ma Ve’a Enesi.

Mai le tala’aga talu mai ona to’ai taunu’u le Talalelei i Leone, e to’a iva lelei fa’afeagaiga sa latou tautuaina le Ekalesia ma sa mumu atili lea sulu:

1832 - Amoamo Fiu; Rev Laupu’e & Taufanua; Rev. Petaia & Fa’atu /Sasani; Rev. Nofoa’iga & Fa’ailoilo; Rev. Iakopo & Utulaina; Revv. Ameperosa &Lefulefu; Revv. Elder Panama & Masele; Rev. Emau & Si’alei Petaia [tu’ua le galuega ona ua tatau ona Penisiona le susuga le Feagaiga]; ma Rev. Eteuati & Lipeti Toma o lo’o i ai nei pea!

O le aiga tele sa fa’atautaia lea i Fagalele ina ua mae’a le sauniga!