O le ali’i Palemia o Eleni, George Papandreou, ua fa’ailoa mai le mau a le itu agai a lana faigamalo, ina ia tula’i 'ese mai le tofi Palemia, ona ua mae’a pasia e i latou e fa’ataunu’u lana mau na fa’apea e mautinoa ai le maua o le 'aitalafu e $178piliona e toe fa’aleleia ai le tamaoaiga o le Malo o Eleni, ae o lea ua tula’i mai o le a le mafai ona maua lea nogatupe mai Malo o Europa.O le mau fo’i lea a le ali’i Palemia sa fa’atulaga mai i totonu o le Palemene a Eleni e 300 sui tofia o i ai, na manatu fa’amaualuga ai lava, e gafatia ona toe maua ai le nofo lelei o lana faigamalo, peita’i, ua matua tete’e ai le isi to’atele o lana vaega fa’a'upufai mai lo latou sapaia o ia, ma ua le toe maua ai e ia le aotelega o palota a lana vaega sa manumalo ai i le tofi Palemia.Ona o lea mea ua alia’i mai nei, ua vala’au mai ai le vaega fa’a'upufai a le Itu Agai, o le a latou savavali 'ese mai fonotaga uma a le Palemene pe afai o le a le fa’ate’a 'esea le Palemia i le taimi nei. Ua 'iloga mai ua fitaituga nei le faigamalo a Papandreou aua ua le toe maua e ia le to’atele o lana vaega fa’a'upufai sa i ai muamua, ma ua toe tete’e fo’i ma finagalo o le itu agai, ua atili ai ona fa’aletonu sona toe tula’i mai i le tofi Palemia.Ina ua tete’e ni isi e to’atele o lana vaega fa’a'upufai PASOK po o le vaega a le Socialist lea e i ai o ia, na ia iloa lelei lava o le a fa’aletonu ai ma le mata'upu na fa’ao’o i le EU mo sa latou fesoasoani tupe e fa’aleleia ai le tamaoaiga o Eleni e pei ona latou mo’omia tele. O le mea na o’o mai, na fa’aletonu ai ma le tele o maketi mo 'oloa fa’atau atu a Eleni ina ua te’ena lea talosaga a Eleni e le Iuni o Atunu’u i Europa.Ina ua maua mai le tali a le Iuni mo le fa’atupega o le Malo Eleni, sa le talisapaia loa lea alavaiti e le ali’i Palemia, ae ua fa’ailoa mai e ia, o le a toe tu’uina i le palota, e fa’ailoa mai i ai o latou finagalo. O i’ina na matua fete’ena’i ai finagalo o sui tofia uma o la latou palemene, ma ua tula’i 'ese ai le vaega fa’a'upufai a le Itu Agai ma fa’ailoa mai lo latou taofi, e fa’atula’i 'ese mai lea ali’i Palemia mai le tofiga o i ai, ma ua toe vaea ai fo’i le vaega lava a PASOK.Ua ia iloa lelei nei, afai ae toe tu’u atu fo’i i le lautele mo se palotaga o lea fa’amoemoe, o lona uiga e le manumalo lava lana mau. O lea la ua toe fa’ailoa mai i ni tala tusia a i latou na fa’afeso’ota’ia le Ofisa o le Palemia i se suiga o lona taofi e tusa o le palota, ae ua toe fa’aalia mai, ua manatu fo’i le Palemia, e suia lana mau, ma o le a le faia se palota fa’alauaitele, ae toe tu’u ia le mata'upu e pei ona 'aumaia ai se fa’ai’uga a le Iuni a Malo i Europa, ina ia mafai lava ona taofiofia mai lana vaega fa’a'upufai i le faitau aofai sa i ai muamua.O se mea mautinoa, e le mailoa lava pe toe mafai ona manumalo Papandreou i le palotaga, tusa lava pe suia lona finagalo fa’aalia i le palota. Afai ae toe manuia e matua vavalalata lava le i’uga talu ai ma le i’uga o lenei fo’i palotaga o le a fa’ato’a faia nei,O le fonotaga a le G20 lea sa vala’auina le ali’i Palemia ina ia 'auai atu ai, ua fa’ailoa ai e ta'ita’i o Malo o Falani ma Siamani, afai lava e finaua e ia le faia pea o le palotaga lea, o le mata'upu lava e ono soloia i lea palotaga, o le mana’o pea lea o Eleni e 'auai i le Iuni a Malo o Europa.Ua toe taofia nei la e le Iuni o Malo i Europa le toe taua’aoina atu o se vaega tupe mai lea nogatupe mo Eleni se’ia vagana ua mae’a faia le palotaga lea ua talanoa mai ai le ali’i Palemia o Eleni. O le taimi nei, uamalaga le ali’i Palemia i Atena ina ia faia se fa’ai’uga ia te ia pe fa’atula’ia ese mai le tofi Palemia o Eleni, ae o lea ua le mautu lava fo’i se i’uga a le Iuni i le avea pea o Eleni ma totino o le Iuni o Malo i Europa.O le taimi fo’i lenei, ua matua fa’ali’i lava le ali’i ta’ita’i o le Itu Agai, Mr. Samaras, ma ua ia matua fesiligia lava, po’o fea tonu lava o i ai fa’ai’uga a le Palemia e tusa ai o le mana’oga o le Malo ma ona tagata ina ia mafai ona fa’atautaia le Malo i se tulaga manuia?“Ua matua fesiligia e ‘au le tulaga tonu o i ai fa’ai’uga a le tatou palemia, ua toetoe a ia soloia uma feso’ota’iga lelei a Eleni ma le Iuni o Malo Europa, ua fa’aletonu ai ma le Iuni lava latou, afaina ai ma tupe fa’asao fa’apolopolo a le Malo ma ana aseta, ae le taulia ai le fete’ena’i ua i ai nei finagalo o lana lava vaega fa’aupufai PASOK, ae o le a se mea e maua mai ai i ana fa’ai’uga?”“O le a le isi mea nai lo le talia loa lava o le tupe nono e pei ona mo’omia ai, fa’alelei atili atu le tamaoaiga o le atunu’u ma fa’agasolo faigapisinisi e pei ona masani ai, ma togitogi le nogatupe i le Iuni o Malo i Europa?Ua fa’ailoa mai le finagalo o se tasi o le vaega fa’aupufai a le palemia, le ali’i Minisita o Tupe, Evangelos Venizelos, ma ua fa’apea mai, “E tatau ona le faia se palotaga a Eleni i lea mataupu ae talia loa le nogatupe la ua fa’amatu’u mai e le Iuni o Malo i Europa [EU], e tatau lava ona fa’ailoa mai e Eleni e le tatau ona faia se palotaga i le taimi nei.”E ao lava ina talia loa lava e Eleni le maliliega mai Europa i le latou nogatupe, ae aua lava nei toe faia se palotaga. O le aofaiga o le nogatupe lea ua talia nei e EU mo le malo e $178 piliona.