Ads by Google Ads by Google

17 laau mariuana, 6 sikaleti ma paipa 23 ula ai aisa na maua Nuuuli

E tusa ma le 17 la’au o loo masalomia o ni mariuana, sikaleti e ono ma paipa e 23 paipa e fa’aaoga e ula ai le pauta o’ona o le aisa, na maua e leoleo i le vaiaso na te’a nei, ina ua latou osofa’ia se fale i le afio’aga o Nuuuli, i lalo o se poloa’iga mai le Fa’amasinoga.

Na te’ena e Fa’afeai Atimalala moliaga o le umia fa’asolitulafono o mariuana, ma le moliaga o le fa’amoemoe e fa’atau atu i isi, ia nei mariuana, ina ua tulai i luma o le Fa’amasinoga Faaitumalo i le vaiaso nei, ma o lo o taofia pea o ia i le to’ese i Tafuna e fa’atali ai lana uluai iloiloga lea ua fa’atulaga mo le Aso Tofi o le vaiaso nei, se’i vagana ua mafai ona ia totogia le $50,000, lea ua fa’atulaga e totogi ona fa’atoa mafai lea ona tatala o ia i tua.

E tusa ai ma fa’amaumauga a le fa’amasinoga, o lo o taua ai e fa’apea, pe tusa o le 6:00 i le taeao o le Aso Faraile na te’a nei, ae taunu’u loa leoleo i le fale o Atimalala i Nu’uuli, mo le fa’ataunu’uina o se poloaiga mai le fa’amasinoga, e sailia ai lona fale, o lona fanua atoa ai ma ana meatotino, ona o masalosaloga o lo o ia umia fa’asolitulafono fuala’au faasaina.

Na fa’alogoina e leoleo na fa’atinoina le osofaiga le manogi mariuana ina ua latou taunuu i le fanua o le ua molia, ma vaaia ai loa e Det. Amani Fatuesi ni la’au e foliga o ni mariuana o lo o ola i tafatafa o le fale, o le taimi foi lea na ia va’aia ai Atimalala o lo o tu i luma o le faitoto’a o lona fale, ma tilotilo agai i le mea o lo o tu tu mai ai leoleo.

Sa fa’ailoa atu ia Atimalala le mafua’aga o le o’o atu o leoleo i lona fale, fa’atasi ai ma le tu’uina atu i ai o le kopi o le poloaiga a le fa’amasinoga, ma na fesiligia o ia po o ai e ana laau ia o loo ola i tafatafa o lona fale, lea na tali le ua molia, o la’au a le tagata e igoa ia Palu, e faigaluega i le StarKist Samoa Inc.

O le taimi lea na aga’i atu ai loa leoleo i totonu o le fale mo le fa’aauauina o latou su’esu’ega, ma maua ai sikaleti se lima e foliga mai o ni sikaleti mariuana, atoa ai ma se tama’i afifi pepa ‘ena’ena lea na tatala ma maua i ai lau mamago e foliga mai o lau mariuana.

 O le taimi lea na ave ai loa Atimalala e leoleo, ina ua fesiligia po o ai e ana ia mea ia ae tali le ua molia, o ia.

Sa fa’ailoa foi i ai e leoleo ona aia tatau faaletulafono, lea foi na tali le ua molia, ua ia malamalama  i ona aia tatau faaletulafono.

Na fa’aauau pea le sa’iliga ma maua ai se isi sikaleti i totonu o se tamai pusa laupapa sa ta’atia i tafatafa o le TV, fa’apea ai ma ni paipa se 23 e tele ina fa’aaoga e ula ai le pauta oona o le aisa.

O fafo o le fale na maua i ai e leoleo laau e foliga mai o ni mariuana se 13, sa toto pe tusa o le 20 futu le mamao ese ma le fale a le ua molia, ma o le 9 o ia laau sa toto i lalo o le palapala, lea e tusa ma le 2 i le 3 futu le maualuluga, faatasi ai ma isi laau laiti e 4 sa totonu i totonu o tama’i apa.

Sa i ai faatasi ma Atimalala i lona fale i le taimi o le osofaiga a leoleo se isi alii e igoa ia Amotai Amotai, lea na auina uma atu i le ofisa o leoleo mo suesuega, lea na faailoa ai loa e Amotai i leoleo,

Ina ua fesiligia Atimalala na ia taua ai e faapea, o lana toga mariuana na amata toto mai ina ua maea le kerisimasi o le 2011, e faatolu ona fui lana togalaau i le aso, sei vagana  ai lava aso timu. Na te tuu faatasia le vai ma le otaota a moa e avea ma fetialaisa e faaola lelei ai lana togalaau, ma o nisi foi taimi na te aumaia ai lau mai nisi o ana laau e ula ma ia, pe faatau atu foi i tagata e masani ona o atu e faatau ia te ia.

Sa ia faailoa i leoleo, e leai se tau patino mo ana mariuana pe a faatau atu i tagata, ae o le tupe lava e alu atu ma le tagata na te taliaina, ae o nisi lava taimi na te faatauina atu ai sikaleti mariuana i le $3 i le sikaleti e tasi. Sa ia faailoa foi i leoleo, o ia foi e ulaula mariuana.

Ae ina ua fesiligia Amotai na ia taua ai e leoleo e faapea, o le amataga o le tausaga lenei na ia vaaia ai laau mariuana o ola i tafatafa o le fale o lona uso laititi o Atimalala. Sa ia faailoa foi i leoleo e faapea, na mafua ona i ai i le aso lea i le fale o lona uso, na sa alu fana pe’a ai i le po ua mavae.