Ads by Google Ads by Google

16 Sui A’oa’oina mo “U.S. Masters” - Va’afagota Laiti

Ua toetoe mae’a le 2 vaiaso atoatoa na fa’atulaga e le Asosi a Tautai o Samoa Longline & Fishing  mo le vaega o Ali’i Fagota e mafai ona latou fa’afoea va’a fagota laiti e i le va o le 50futu ma le 60futu le u’umi.

O lenei a’oa’oga fa’apitoa o le a taua’aoina Tusi Pasi o i latou o le a fa’amanuiaina a latou su’ega,  aua o lo’o ua a’oa’oina uma lava tomai ‘ese’ese e ao ina fa’aauupegaina ai so’o se tasi e tau’avea lea tofiga i luga o le va’a fagota.

O le vaiaso muamua o le a’oa’oga, ua a’oa’oina ai le to’a 16 lea i tomai i pepa fa’atutumu a’o le’i tu’ua le va’a, o latou tiute e ao ina mautinoa e i latou a’o le’i avea i latou ma “Master” i luga o le va’a. O le va’aiga o le va’a i ona tulaga uma, e pa’u tonu lea ia te ia, i taimi uma.

I a latou a’oa’oga nei, e tatau ona mae’a ua iloa lelei e le to’a 16 lea tulafono uma a le Malo tele e ala mai le US Coast Guard e tatau ona latou iloa ma manino ai, ae maise i taimi e tutupu ai ni fa’afitauli ma maliliu ai nisi i a latou auva’a.

O lea tofiga, ua pa’u tasi ai i le Master, le va’aiga o le va’a atoa, ae i luga lava o le va’a e tasi, o lo’o i ai fo’i le Kapeteni mo Fagotaga. O le tagata e avea ma US Master, e le o i ai sona tusi pasi fa’a-kapeteni o le va’a, ae o ia lea e mafaia ona fa’afoea le va’a i lana folauga e fagota.

Ua le fa’apea ituaiga va’a fagota tetele tau Perseiners, e fa’aaoga lava le kapeteni mo ia ituaiga o va’a, ma e ao ina tofu laisene i latou. Pe avea le vaega lea e to’a 16 ma Master o le va’a fagota, pe avea fo’i ma tagata fagota, ua sili lona agava’a nai le to’atele o i latou e le’i avea lea ituaiga o a’oa’oga.

O le a’oa’oga o lo’o fa’atautaia i le gagana peretania, aua o le to’atele o fanau a Amerika Samoa ua malamalama ai, ma o tulafono, pepa fa’atutumu ma feutaga’iga uma e faia e le tagata e avea ma Master o se va’a, e faia lea i le gagana peretania. O le sui fo’i sa ia fa’atautaia le a’oa’oga lenei, o le susuga Capt. James mai Alaska, o ia lea o lo’o kapetenia se tasi o va’a fagota tele a le Trident Foods lea e galue ai lava o ia, ae o le taimi nei, o lo’o faia sana malologa ma ua avanoa ai e fa’atautaia lenei a’oa’oga fa’apitoa mo tatou U.S. Masters.

O le tele o a’oa’oga i le vaiaso muamua sa faia lea i totonu o le potu a’oga, o le potu fono lea o le Mea Toso Va’a a le tatou malo i Satala. Sa maua fo’i se 3 itula e auai ai le tatou tusitala i totonu o lea vasega, ma ua iloga ai, e matua a’oa’oina latou i mea e afua ai ona tutupu fa’alavelave i luga o le va’a.

“E muamua i le lisi, o le i ai lea o le pia po’o le ava malosi ma fuala’au fa’asaina i le va’a! E maua loa lea tulaga, e mafai ona mafua ai misa, ma afua ai ona ‘ese’ese lagona o tagata o le auva’a, m ua matua fa’asaina i le tele o va’a fagota, ona avea nei ituaiga o oloa i luga o le latou va’a fagota.” O se tala lea a le ali’i Kapeteni o James.

I totonu o le potu a’oga, e ao ina mataala ai le sui o a’oa’oina, aua e o’o lava i le pepa e fa’amaumau ai lapisi, o nofoaga ma ogasami atoa ai ma tetele o lapisi e mafai ona lafoa’ia i le sami, ma o latou tulafono e aiaia ai ua fa’atulaga e le Malo Tele ua mae’a fa’amalamalama ai lona fa’atumuga ma ona aiaiga ‘ese’ese.

O le aso Faraile o le vaiaso muamua na fa’atulaga ai le vaega a le US Coast Guard e o’o ane ai e fa’atautaia lea vasega, i ala o fa’alapisia a le va’a le sami, fa’atasi ai ma sala e mafai ona fa’ae’e i so’o se va’a fagota po’o isi fo’i ituaiga o va’a, ona ua maua o fa’alapisi.

E ao fo’i ina iloa lelei e i latou ua avea ma Masters ona fa’aaoga masini uma lava ua i totonu o le Potu o le kapeteni, le o lo’o fa’afoea le va’a. O ia e fa’amoemoe uma i ai fa’ai’uga e faia mo le va’a ia saogalemu fa’atasi ai ma i latou uma o lo’o i luga o le va’a, ia mautinoa ua saogalemu o latou soifua. O ituaiga vala’au e fia fa’ao’o mo se galuega fa’aola, o ia na te iloa patino le taimi e faia ai lea vala’au, ma lona ituaiga o fa’ailo, ia iloa e le Ofisa ulu o le va’a le ituaiga fa’aletonu o i ai i latou i luga o le vasa.

O le vaiaso mulimuli lenei o a’oa’oga fa’apitoa, ua matele ina faia ai latou folauga fa’ata’ita’i, e mafai ona molita’i mai ai e i latou fa’ailoa o ituaiga ‘ese’ese, ia mautinoa ua manino le tele o sosia o le atamai fa’a-Ali’iva’a ua mae’a a’oa’oina i le potu a’oga. O le aso Tofi lenei, ua fa’atino ai a’oa’oga CPR.First Aid aua e mana’omia ona mautaga le Ali’iva’a i le taimi e tutupu ai fa’alavelave o so’o se ituaiga i tagata uma o le auva’a ma seila ae maise le au faifaiva. A mae’a loa lea a’oa’oga fa’apitoa ona alofaiva loa lea o le to’a 16 i le su’ega e saili ai tusi pasi fa’apitoa mo le a’oa’oga lenei, e tamau ai fo’i o latou totogi ia si’itia i lea fo’i tulaga fou o le tomai ua fa’a’au’upegaina ai i latou.

O le aso Faraile o le a toe tapuia ai e le ali’i faia’oga Capt. James tomai uma ua mae’a a’oa’oina i le to’a 16 ua auai, ma o le a taua’aoina ai loa latou tusi pasi i le aoauli, itula e 11:00 i le taeao.