Ads by Google Ads by Google

140 aso na folau ai le va’a o le Gaualofa

E fetaui lava le taunuu ane o le malaga a le vaa folau o le Gaualofa i le Samoa ae faamanatu loa le atoaga o le 50 tausaga o lana Iupeli Auro i le amataga o le masina lenei, ae tusa lea ma le 140 aso talu ona malaga mai le vaa i luga o le vasa, e pei ona afua mai i San Diego, faasolo ane ai i le faga i Mexico, malolo i Cabos i San Lucas ona afea ai loa lea o Cocos Island i Costa Rica.

Na maea lea ona agai atu loa i Galapagos Island i Equador, Tahiti i nisi o ona motu ma faasolo atu ai i le atu i Rarotoga i le atu Kuki, faasolo ane ai i Niue ae faaiu ane i Samoa.

O se tasi o le auvaa a le Gaualofa o le tamaitai  o Salafaaniusila Angelina McGuire, 27 tausaga mai Iliili. O Salafaaniusila na soifua a’e i Iliili ae sa faauu mai i le Aoga Maualuga a Leone i le 2001, ma faaauau atu ai i le aoga a le MIT i Bostona, Massachusttes mo lana faailoga o le BSc Civil Engineering, ma galue ai loa o ia i le aai o San Francisco i Kalefonia.

E 7 isi vaa mai isi atunuu o le Pasefika na malaga faatasi mai ma le Gaualofa, ma o se malaga na i ai taimi na lutia ai ona o le sou o le vasa, peitai o le sini lava e tasi sa ia tei latou, ia mafai ona latou auai i le faamanatuina o le 50 tausaga o le fu’a a Samoa.

Na naunau lava foi Salafaaniusila e malaga mai i Samoa i le taimi o lana fu’a, ona o le atunuu lea na soifua a’e ai si ona tina o Helen McGuire, ma o se miti na mafai ona faataunuuina lelei, ma ua avea ma itu ua fiafia ai o ia.

Na lolofi atu taitai o le malo o Samoa ma ona tagata, aemaise ai le kovana sili ma lona faletua i le faafeiloa’iina o le taunuu ane o le va’a i Samoa, ma o iina na mafai ai ona siitia lagona fiafia o lenei tamaitai.

Ua toe foi atu nei Salafaaniusila i lona nuu ae o le Gaualofa lea ua malaga atu nei i Fiti, lea foi o loo malaga faatasi atu ai ma le uso laititi o lenei tamaitai, o ia lea o Kimberley McGuire, ma faai’u ane ai i Solomona i le taimi o le faaaliga o tu ma aganuu a le Pasefika i le masina fou.

O lea fuafuaga o se tofa na a’e ona o le malaga a le va’a a le Atu Kuki o le “Te au o Tonga” lea foi na malaga mai i le taimi tonu na talimalo ai lo tatou atunuu i le Faaaliga o Tu ma Aganuu i le 2008, ma manatu ai loa o le a folau faatasi vaa folau nei e lua ina ia toe faaolaola le soifuaga o tagata Pasefika o tagata folau.

O le isi sini o nei folauga, ia toe faaolaola le tomai o tagata Pasefika i folauga, ma toe faamanatu ai auala sa tapasa ai ana folauga i aso anamua, e pei o le faaaogaina o fetu o le lagi, ma soo se taimi e taunuu ai a latou malaga i atumotu eseese o le pasefika, latou te momoli atu ai ma se feau i nisi o faalapotopotoga i le tatau lea ona faaolaola auala e soifua ai tagata Pasefika.

E toa 15 le auvaa a le Gaualofa e aofia ai ma le kapeteni ia Nick Henry mai le Atu Kuki, lea foi sa avea ma se tasi o auvaa a le Te au o Tonga.

O le vaa o le Gaualofa na fuasia e Samoa, ma o Hilo i Hawaii na uluai taunuu i ai i lana malaga muamua ma faaauau ai loa ana faigamalaga.

I se fa’amatalaga a lea ali’i Kapeteni o le Gaualofa, sa ia fa’ailoa mai ai, “O lenei tausaga, o le fa’amamafa ma le autu o le folauga, ia toe fa’aolaola lea tomai ma taleni fa’atagata o le atuvasa, o le folau e feso’ota’i ma lou laueleele, lou vasa ma lou lagi o lo’o i ai ou fa’asinoala sili ona mautu. E ese mai lea, o le tatou ‘au’au o lenei folauga ia fa’ataua puna’oa o i lou atuvasa ma ia le so’ona faia nei meaalofa mai le Atua foafoa. O le igoa ua fa’alauilo ai lenei folauga o Va’a Folau e fitu mai le atuvasa, “O le tatou Va’a Lanu Moana!”

“Ia so’o le fau ma le fau i le olaga o le tagata o le atuvasa, ma ia tatou iloa a’ia’i le so’otaga o le tagata soifua ma lona si’omaga e aofia ai le vanimonimo, le vasa ma lou laueleele. Ua fa’ailo i lenei folauga, e mafaia e le tagata ona toe soso’o lea filosofia fa’ale-mafaufau ma soifua ai e pei ona mua’i faia e o tatou tua’a ua loa ona ta’o’oto mai i ti’asa.”

O le Alamoana o lo tatou Aiga Fautele, e mafai ona tatou o mai fa’atasi o tagata ola i totonu o lea li’o ma fa’aleleia atoa lo tatou si’omaga, o lo tatou olataga ma lo tatou lumana’i mo isi o soloa’i mai, e tatau ia i tatou ona fa’atumau ona puna’oa a’o tatou folau fa’atasi ai i le tatou “Va’a Lanu Moana.”