Ads by Google Ads by Google

14 Tausaga: Sola Ese Mai Leoleo

O se tamaititi Amerika e 14 ona tausaga, ae ua maofa leoleo sa latou va’ava’aia toto’a i le Vaomatua o le atu Filipaina, ae na sola ese mai ai lava le tamaititi le toe maua ae o’o mai lava i Amerika lana malaga. E lima masina talu ona nofo saisaitia lenei tamaititi Amerika e le vaega a Filipaina e masalomia e feso’ota’i lelei ma faiga a Al Qaeda.

O le ali’i talavou lenei o Kevin Lunsman, e na’o le 14 tausaga le matua, e lua aso atoatoa o leiloa, na savali solo lava e leai ni se’evae, ae fa’ato’a maua loa e tagata o le nu’u, o se tala lea a lona tama. Na talanoa le ABC News i le tama o Kevin, le ali’i lea o Heiko Lunsman, lea na ia fa’ailoa mai lona fiafia tele ua ia toe maua lona atali’i.

“Ua matua ou fiafia tele i le mea ua faia e lo’u atali’i ma fa’asaoina mai ai, na fesolata’i i totonu o le togavao ma ua sao mai ai.” “E le o se mea faigofie lea mea, o se lima masina sili lea ona faigata i lona olaga talu mai ona ola ia, ma ou te fiafia ua ou iloa nei, e mafai lava e Kevin ona va’aia o ia i le lumana’i.”
O se fiafiaga tele i le tama o Heiko ina ua mafai ona sola ese mai si ona atali’i mai le saisaitiaga e nei tagata tete’e i Filipaina a le vaega a Al Qaeda. O se tala muamua lava a le ali’i o Kevin i lona tama, sa ia fa’ailoa patino ai ia te ia, “Ua ou mafaia ona sola ese mai Dad, fa’afetai ua ou gafatia ona sola ese mai ma ou ua fa’asaoina mai lo’u ola e o’o mai i le taimi nei.”

Na fa’ailoa mai e Kevin, sa ia fai lava i le vasega o leoleo e to’afa sa latou puipuimalu ia e ia i le togavao se’i alu e ta’ele i le vaitafe, peita’i, a’o ta’ele o ia o le vaitafe, na oso ane ia te ia semanatu, e ao loa ona taumafai e sola ese mai loa, aua o lea ua i ai le ta’iala, o le vaitafe lava lea.

Na mulimulita’i mai lava o ia i le ala o le vaitafe aua e aga’i uma lava vaitafe mai le itu i saute se’ia o’o i le itu tonu i matu. Na aga’i mai lava o ia ma o’o mai ai i le itumalo o Basilan, ona fa’ato’a maua ai lea iina o ia ma ona manu’anu’a ma totolia o lona tino, e nisi o le nu’u lena.

Na fa’ailoa mai e ali’i leoleo sa latou mua’i fa’afetauia Kevin ina ua maua e le nu’u, “Na iloga mai le vaivai o ia ma le fia ‘ai. Na mua’i fefe lava o ia ina ua va’aia e ia tagata o le nu’u, sa taumafai e sola ese mai ai. Sa i ai la sina tuliga sa faia ma tagata o lea nu’u, peita’i, sa mafai ona fa’ailoa atu e tagata o lea nu’u, e leai o i latou o ni tagata e mafai ona fa’asaoina ai o ia mai nei tagata sa latou saisaitiaina o ia i le vaomaoa.

O le taumafanafana lenei na fa’ato’a te’a atu sa faia ai se malologa a le ali’i o Lunsman i Filipaina,  ma sa o fa’atasi i la’ua ma lona tina o se Filipino Amerika. o Gerfa Yeatts Lunsman ma sona tausoga o Romnick Jakaria, sa latou o uma i Filipaina. I le aso 12 o Iulai, 2011 na i ai lo latou aiga i le motu e tulata i le a’ai o Zamboanga, ae se’ia ai loa i’ina e tagata leaga nei ma avea ai i latou i se va’a i Basilan.

O i’ina loa na vala’au mai ai i latou na ‘avea fa’amalosi le tama lenei, i le aiga o Kevin i Campbell County i Virginia, e totogia atu se vaega tupe mo le ola o lenei talavou Amerika.

Na fa’aalia e Gowen  na totogia e Heiko Lunsman se vaega tupe tele lava ina tatala mai ai i tua le tama ma lona tina, peita’i e na’o le tina na tatalaina i tua i lena vaega tupe, ae ua le tatalaina mai le tama o Kevin. Ua tula’i mai e manana’o atili i latou i se isi vaega tupe mo le ola o le atali’i.

Na tia’ia e le vaega leaga lea si tina o le tama o Kevin i le uafu i Basilan, ae mafai ona sola ese le tausoga o Kevin ina ua tulata ane ia i latou se vaega o leoleo su’esu’e a Filipaina, e tusa o le masina talu ai.

Na fa’ailoa ane e le sui o le vaega au Army a Filipaina i le Associated Press, o le vaega lea sa latou avea fa’amalosi Kevin, lona tina ma lona tausoga, e ta’ita’ia lea e le ali’i e suafa ia Puruji Indama mai Abu Sayyaf o se tasi lea o aumea mamae a Al Qaeda, lea fo’i e i ai lo latou igoa i le lisi o tagata terarisi i Amerika. O i latou na o lo’o faia lea ituaiga o faiga, o le ‘avea fa’amalosi o tagata, fasiotia tagata ma fa’apomu solo nofoaga tumutumu.

Ua fa’ailoa mai e Visaya, le ta’ita’i o le Army a Filipaina, o lo’o latou tulitulia lava tagata leaga nei, ma ua latou iloa lelei lava le isi vaega o i latou e tulata i le Akbar town, ma o i latou la nei, ua ave i ai le fa’amuamua a le vaega e tete’e ese atu ai, ae le amana’ia ai le ali’i talavou ua sola ese mai.

I le aso Gafua na te’a atu nei, na fa’apea fo’i ona masalomia le vaega ua latou avea fa’amalosi le ali’i o Warren Richard Rodwell, 53 tausaga mai Ausetalia, mai lona lava fale i le itumalo o Zamboanga Sibugay. O lo’o masalomia lava fo’i, o lo’o latou umia pea lava le to’atolu o isi tagata mai fafo atu o Filipino, ma ua i ai ei i le motu tu’ufua  e latalata ia Basilan.

Na fa’alogo loa matua o Kevin ua maua le la’ua tama, fai mai na taufetuli atu aga’i i le nu’u e fa’afetauia o ia. Na matua tagi lava le tama ina ua ia toe fusia mai si ona tina, ma si ona tama fo’i, peita’i o le tagi fa’ataio a le tina sa matua taufai ofo ai le to’atele o le falema’i. “Ua ese lava le fa’alogona aua sa fa’apea, o le avea le sola ese mai o lona tausoga e avea ma mea o le a fasia ma fa’asalaina ai fua Kevin e i latou na avea fa’amalosi i latou uma e to’atolu.

O lo ua toe fa’atasia nei lea aiga, ma ua toe fiafia fa’atasi i latou, ae o lo’o i ai pea Kevin i le falema’i, ina ia togafitia nisi mea o lona tino o lo’o afaina i le taimi atoa na fesolata’i ai i le vaomatua.

Aumai: AP; saunia: Leua Aiono Frost