Ads by Google Ads by Google

12 Sui Fou A’oa’oga Fa’afoega o Va’a Laiti

Ua toe amatalia fo’i ma ua toeititi mae’a le isi lua vaiaso o a’oa’oga fa’apitoa mo i latou e avea ma US Masters i luga o va’a fagota laiti i totonu o le teritori ma o lo’o fa’afoea nei a’oa’oga e le Tautai o Samoa Longline Fishery ma le Asosi a le Aufaifaiva o Amerika Samoa.

Ua tu’ufa’atasia gaoigaoiga uma o lea a’oa’oga fa’apitoa e le vaega a le US Coast Guard i le latou Ofisa autu i’inei, le MYD i Satala po’o le Meatosova’a, le vaega a le NOAA po’o le Va’ai Tau, le vaega a le National Marine Fisheries fa’atasi ai ma le Tautai o Samoa Longline & Fishery fa’apea le Asosi a le Au Faifaiva o le tatou atunu’u.

Ua fa’ailoa mai, i lenei kosi lona lua, ua si’itia ai le a’oa’oga ua fa’ao’o ia i latou e to’a 12 ua latou fa’aauauina le vasega, ma ua fa’apea fo’i ona si’itia ai lo latou agava’a, e aga’i atu ina ia avea i latou ma Kapeteni o va’a o so’o se tele ma so’o se ituaiga.

E tele nofoaga ua fa’atautaia ai lenei ituaiga o a’oa’oga, aua e tusa lava po’o le a le atamai o le tautai, ae afai e mou pe a o’o i taimi e lutaluta ai le tai, ma ua si’isi’i le fogatia, e le o mautu sona malamalama toto’a i le faiva o lo’o ua ia faia. O le mea lea, ua saunia vaega ‘ese’ese o lenei ituaiga o a’oa’oga, e faia i mea e tatau ona sofa’i ai le mautu o le latou iloa fa’atautai o le vasa.

O le isi a’oa’oga sa va’aia le sili atu ona tatau ma onomea ona lava tapena ai le tautai o le vasa, o le iloa lea sefe lona soifua fa’apea ma ni ola o nisi o lana auva’a i luga o le vai po’o le sami pe a magoto le va’a. Ua va’aia, e le to’atele nisi e iloa lelei a’au, ae sili atu ona leai se isi, e mafai ona umi se taimi o a’au ma fa’aopeopea i luga o le sami.

O le fesili, e mafai la ona e sefea se tasi, pe fa’aolaina fo’i oe pe a umi ona tatalia se va’a fa’aola? O le tali, e oti uma lava tagata pe afai e leai nisi e iloa lelei a’au ma fa’aopeopea mo le silia i le afa aso i luga o le sami.

Ua i ai latou a’oa’oga ua folau i latou ma fa’atautaia, ae o le ulua’i vaiaso lava, sa faia ai a’oa’oga i tulafono, aiaiga o le tai, faitauina o ituaiga fa’ailo ‘ese’ese ma le auina atu o ia fa’ailo i nofoaga ua fa’atulaga e ao ina e fa’ailoa i ai i taimi fita i le malaga i luga o le vasa.

O le sailiga o le tomai tau a’au ma fa’aopeopea umi sa faia lea i le Matafaga ma le aloalo o Utulei. O le va’a sa faia ai le tele o a’oa’oga tau masini ma lo latou faitauina, o nisi o mea patino i lou va’a e ao ina e mua’i iloa, ae e te le’i talia le galuega, e fa’afoea ai e oe le va’a.

O le mea ua taumafai nei i ai le Asosi a Tautai o le atunu’u, ia matua fa’alauteleina le iloa o tagata o le atunu’u atoa o lea ituaiga o tomai. Ia maua ni avanoa lelei e le to’atele o lo’o mafai ona o e fagota nei ituaiga o aoaoga, ia si’itia ai latou galuega ona ua lava le tomai fa’atautai.

“Ua fa’ailoa mai, o lo’o i ai nisi o alo o le atunu’u, o lo’o latou faia nei ituaiga o tiute i luga o va’a fagota i inei, ae le’i mafai ona totogia sa’o ona e le o i ai ni latou tusipasi nei.” Ua tatau loa ona faia se suiga i lou olaga tautua ma galue ai i lea matata o le faifaiva.

I le i’uga o lenei kosi, ua manatu le fa’afoega o lea a’oa’oga, ua tatau ona i ai ni US Masters ua mae’a umia tusi pasi nei, ina ia fa’amalosia ai le si’itaga o  latou totogi ma ua faia fo’i le tiute o le US Coast Guard ma isi sosaiete fesoasoani uma i lenei a’oa’oga, ina ia si’itia le tomai e galulue ai tama fanau a Amerika Samoa i le taleni o le faifaiva.

I le masina talu ai, na fa’au’u ai nisi o lea fo’i vaega i le ulua’i a’oa’oga fa’apea sa faia, ae o le vaega muamua fo’i lena o lea ituaiga o a’oa’oga , peita’i o lea ua atoa le isi to’a 12 ua fa’asaga atu nei mo lea vaega lua o a’oa’oga fa’afoe va’a.