Ads by Google Ads by Google

12 sui fa’auu a’oga su’isu’i Futiga Metotisi

O le mae’a ai le 3 masina o fa’atautaia pea le a’oga su’isu’i a le Ekalesia Metotisi i Futiga mo Tina ma Tama o lo’o avanoa e fia a’otauina i lea taleni, ua tula’i mai ai le to’a 12 o i latou ua ausia togi ma ua fa’amau i galuega fa’atino lo latou atamai fou ua maua, ma ua mautu e fa’aauau ai ona latou saili se latou tamaoaiga i tausaga  a sau.

 

“O lenei le mau, o le a tamau e le Autalavou ma le Aufaipese a le Ekalesia Metotisi e fa’aaoga a latou su’isu’i fou nei ua fa’au’u, mo a latou toniga i so’o se taimi, e fa’atulaga ai, ia fa’aaoga lenei matau ua tamau i o tatou tagata o le ekalesia.” O se saunoaga lea a le ali’i na avea ma fofoga o le Ekalesia i lea mafutaga.

 

O le to’a 12 lenei sa aofia ai ma faletua e to’atolu o Fa’afeagaiga Ekalesia Metotisi mai Malaeloa, Ekalesia Metotisi mai Asili ma le faletua o le Ekalesia Metotisi i Futiga lava, ae ese mai ai ma le tama e to’atasi, Toilolo Time, lea sa ia saunia lava e ia lona ie faitaga.

 

O lea vasega sa to’atele lava, peita’i, ina ua toe vala’auina nisi e avea ma tagata faigaluega tumau a le TAOA mo matua e avea ma faufautua i fanau aoga i totonu o a’oga maualuluga, o le ala lea o le toe fa’aititia o le faitau aofa’i o lea vasega.

 

Ona o se vasega muamua lava lenei o le Su’isu’i i le Ekalesia a le Papa Oe i Futiga, o lea, o se fiafiaga tele o le susuga le Fa’afeagaiga lona auai e fa’atautaia le sauniga mo lea fa’au’uga, ma sa ia aumaia ai se mau, “Le auauna lelei e ma le fa’amaoni, ina ulufale maia i le fiafia o lou ali’i.” O lana saunoaga sa ia fa’apea ai, “E tatau le taui lelei i le tagata galue ma le fa’amaoni e tausaili i mea lelei i lona olaga.”

 

O le Fa’afeagaiga Rev. Samuelu Areta sa ia ta’ita’ia lava lea sauniga fa’apitoa mo le vasega fa’au’u, ae maise ua maua ai fo’i se avanoa e fa’afetaia ai le ASCC/FCS ma le latou polokalama aoga tele o le su’isu’i ua agava’a ai nei sui e 12 o le latou ekalesia. E le gata i lea o le fa’afetai fo’i i le tama’ita’i faia’oga, i lona fa’asoa o lana taleni, ia aoga i nisi e pei ona fa’a’oaina ai nei lea vasega mo le lumana’i.

 

Sa tufatufaina latou tusipasi, ma ua atoatoa ai le fiafia o lea vasega, aua o lenei se tamau o le latou tomai ua maua, ma e fa’aopoopo i ai ma latou galuega fa’atino, o la’ei ua mae’a su’ia lelei ma fa’atautau mo le silamio a le to’atele o le ekalesia na i ai.

 

O sui nei sa latou umia tusi pasi mo lea vasega su’isu’i: Pativaine Areta, Petimani Iopu, Finau Fatu, SifagaMuliaga, Lamaga Fa’aea, Fa’alua Letufuga, Ana Mavaega, Marie Ulufale, Ana Tuileta, Pipi’imaleeleele Asiata, Tapafua Tanielu ma Toilolo Time.

 

O le susuga Falefata Moli Lemana sa avea ma fofoga taumolimoli o le polokalama fa’asolo mo lea aso iloga o le Ekalesia i le aso Lulu o le vaiaso lenei.