Ads by Google Ads by Google

$10,000 fai meaalofa ai Amerika Samoa ia Samoa

O se tanoa ma se tupe e $10,000 na fai meaalofa atu ai le teritori o Amerika Samoa ia Samoa, i le faamanatuina o le 50 tausaga o lana Iupeli Auro i le vaiaso na te’a nei, ma na saunoa le kovana sili o le atunuu ia Togiola Tulafono, o le tanoa lenei sa fau faapitoa ina ia faailoa atu ai le sootaga o Samoanalua i le lumana’i.

O lenei tanoa tele sa fausia mai i se laau na saili mai i le vaomatua o le afioaga o Vatia, lea fo’i na molimauina e le atunuu i luga o le televise ina ua tauaao atu e fai ma meaalofa a Amerika Samoa mo Samoa i Sisifo.

Saunoa Togiola e faapea, na mafua ona manatu e fausia se tanoa tele e fai meaalofa atu ai ia Samoa, ina ia mafai ai pea ona faataua tulaga faaleaganuu i le va nonofo o Samoanalua.

“O le uiga o le tanoa lea sa tuuina atu, e ui ou te taofi e le mafai ona toe tuu faatasi Samoa i sona malo e tasi, ma, atonu e i ai ni aso e alu alu o le a taofi eseese taitai o le atunu i tupulaga o i lumanai, a ia silafia e Samoa, o le tanoa lea tatou te alofi ma fesilafa’i ai, ia aua lava nei motu le tanoa, o lo ta sootaga faa Samoa lena na faavae mai ai Samoa,” o le saunoaga lea a le afioga i le matua ia Togiola.

O loo ta faa taamilo i le tino o le tanoa le ata o le 50 tausaga o le malo sa’oloto o Samoa, faatasi ai ma le ata o lana tagavai o loo ta faataamilo i lona tino.

Fai mai le alii kovana i lana saunoaga, na ootia lona loto i le autu o le malelega a le Ao o le malo o Samoa ia Tui Atua Tupua Tamasese Efi, ina ua ia saunoa e faapea, “O Samoa e le o se malo, o le uso ma le aiga,” ma ua o tutusa ai le autu o le lauga o le fu’a ma le faamoemoe e pei ona momoli atu e Amerika Samoa i lana meaalofa mo Samoa, ina ia faatumauina pea le va faaleaganuu sa soifua mai ai Samoa i aso ua mavae, e ui o lea ua eseese faigamalo ae o Samoa lava ia o le aiga e tasi.

Na faaaoga e le alii kovana lana polokalame i le faaiuga o le vaiaso na te’a nei e faaleo mai ai le agaga faafetai o le malo, i afioaga ma au taaalo na fai mai sui o le atunuu i le faamanatuina o le fu’a a Samoa, ona o tapenaga lelei ma le matagofie sa latou alo atu i ai.

E le gata o le afioaga i Aasu lea na taitai atu e le afioga i le alii Senatoa ia Lualemana Faoa, ae faapea foi i le itumalo o Alataua i Sisifo lea na taitaia atu e le afioga i le Fofoga Fetalai o le Maota o Sui, le tofa Savali Talavou Ale.

“Faafetai i lo outou agalelei ma le lagolagoina o le faatalauula mai o le malo o Samoa, mo so tatou sao i le faamanatuina o lona aso fiafia, faafetai le tapena faafetai foi le faaeaea malo,” o le saunoaga lea a le alii kovana.

Na molimauina uma e le atunuu i luga o le tautua a le alaata o le TV3 mai Samoa tulaga mataina ma le matagofie sa i ai faafiafiaga a Alataua, Aasu faapea ai ma Vailoa-tai i taimi o a latou faafiafiaga, e oo lava foi i le au kirikiti a le afioaga o Vatia lea na sola mai ma le talita o le siamupini ina ua faiaina ai au mai Upou, Savaii ma Niu Sila.

Na faaiu le malaga a le alii kovana ma lana masiofo i Samoa ina ua laua tuu faatasia ma le Sui Amapasa o Amerika Samoa se aiga fiafia, ma valaaulia ai taitai o le malo o Samoa faapea ai ma taitai o isi atumotu e oo atu i le taimi lea e le’i toe fo’i atu, mo se avanoa latou te mafuta faatasi ai, ma momoli atu ai le agaga faafetai o le Ao o le malo o Samoa ma le alii palemia ia Tuilaepa Sailele Malielegaoi, e tusa ai o faaaloaloga uma sa faia mo le faamanatuina o le fu’a.

Saunoa Togiola, e ui lava foi sa faalogoina le muimui o nisi o le atunuu ona o tapenaga sa faia mo Samoa, ae o le a faagalo le muimui ae saili pea i luma se ai mo le atunuu.