10 fautasi o le a tausinio mo le fa’ailoga $20,000

E 10 fautasi mai afioaga eseese o le atunuu ua fa’amaonia o le a auai i le tuuga o le sisiga fu’a o lenei tausaga, mo le sailia o se Sa e sola ma le fa’ailoa tupe mo le tulaga muamua e $20,000.

 

O fautasi ua fa’amaonia le tausinio i le tu’uga o lenei tausaga e aofia ai Manu’a, Fagasa, Pago Pago, Aua, Vatia, Nu’uuli (2), Fagaalu, Vailoa ma Fagatogo, e pei ona fa’amaonia i le fonotaga sa faia a kapeteni ma le komiti fa’afoe o tuuga fautasi o le fu’a o lenei tausaga, lea na fa’alauiloa ai le afioga i le Kovana o le Falelima i Sisifo ia Lualemaga Faoa, o ia lea ua avea ma ta’ita’ifono o le komiti mo lenei tausaga.

 

O le vaiaso na te’a nei na tu’u ai i lalo o le sami Sa fou a le afioaga o Aua ma Nu’uuli, ma ua vaaia le amata koleni o auva’a e sauni ai mo lenei fa’amoemoe.

 

E ui la o lea ua fa’alauiloa le fa’ailoga tupe e $20,000 mo le mua i le tu’uga o lenei tausaga, ae o le fa’aiuga fa’ai’u e pei ona saunoa le ta’ita’i komiti o le a tuuina mai e le afioga i le kovana sili ia Lolo Matalasi Moliga.

 

E ui o lea faatoa tasi le vaiaso talu ona amata koleniga a auva’a i le gataifale, peita’i ua tele petipetiga eseese ua faia e le to’atele e fiafia i lenei fa’agatama, e tau saili ai po o ai se Sa o le a sola ma le siamupini o lenei tausaga.

 

O le isi fonotaga o le a sosoo ai, e le gata o le a faamuta ai loa le totogiina o tupe e fa’aulu ai Sa mo le tuuga, ae o le a fai ai loa fo’i iina ma se’i ga pepa i tulaga e fa’ataoto ai le tu’uga.

 

Ua manatu le Komiti o le laina 1 e amata mai i le itu i Lauli’i ae o le laina 10 e pito i le itu o lo o i ai le malae va’alele i Tafuna, ma ua fuafua e 7 maila le mamao o le tu’uga o lenei tausaga.

Comment Here