Ads by Google Ads by Google

“Tele Mea’ai - Pu’upu’u le Olaga” - Vaega 1

E lua aso atofa mo le Matagaluega o le Soifua Maloloina ina ia tau fa’asoa ni ala e mafai ai ona fa’afo’ia le a’afia o le soifua laulelei o tagata Amerika Samoa i “Ma’i Tumau” o le soifuaga, o ma’i nei e le pepesi, ae afua mai, ona ua na’o le tausami ma le fa’amalositino e fa’aalu le afu ma fa’aititia ai pauna!

O le aso ananafi ma le aso, ua usuia ai lea nofoaga i le Lee Auditorium i Utulei, ma e amatalia lava i le itula e 9:00 i le taeao, ma fa’asolo atu aga’i i le itula e 2:00 i le aoauli. O se aoga o lenei tauaofiaga, ina ia amata tima’i le mamalu lautele, e mafai ona fa’asaoina lou soifua mai le a’afia vave i nei ma’i tumau e tigaina tele ona omiga, pe afai e te suia au amioga, ma e to’aga e fa’agaoioi lou tino i le aso atoa, i le savali, faia fe’au i totonu o le lotoifale, fai sau fa’ato’aga fuala’au ‘aina po’o se fa’ato’aga o matai’ai a Samoa, ma ia e ta’alo i aso uma mo le 30minute.

Aisea ua fautua mai ai fa’apea le Matagaluega o le Soifua Maloloina? Ua tatou i ai nei i le tulaga, ua vave tele ona maliliu alo o Amerika Samoa, sa soifua mai, ua amata ona lava le fa’asoa o le tamaoaiga, maua fo’i mea’ai sa tau le maua i aso o talavou matua, ma latou tausailia mai so tatou tausiga lelei i totonu o aiga.

I fa’amaumauga sa fa’ailo ai,

1/  Ua pu’upu’u le soifua o tagata Samoa,

2/ Vave ona po’ia i ma’i tumau e aofia ai le Ma’i Suka ma le Toto Maualuga, Sela ma Ma’i e faigata ona manava ona o le lapopo’a.

3/ Ua fa’ateleina le mamafa o le fanau a amata mai lava a’o laiti 1-12 tasuaga.

4/ Pe’a fa’atusa atu i isi atunu’u o le Pasefika, e numera muamua Amerika Samoa i le to’atele o e maua i le ma’i suka ma le toto maualuga.

5/ Ua sili fo’i Amerika Samoa i le lalolagi atoa i le lapopo’a o ona tagata nu’u.

6/ Ua amata ona maua le fanauiti e 11 tausaga i le ma’i suka, ma ua fa’ateleina lea tulaga i le taimi nei, ae o aso la sa na’o tagata matutua sa maua i lea ma’i.

I le toe tepa i aso ua tuana’i, sa iloga ai le tino lelei o tagata Amerika Samoa, ae maise i ona tupulaga tama sa ofo atu i le Fitafita Guard. E o’o fo’i i taimi o sisigafu’a i fa’afiafiaga, sa va’aia ai le aulelei ma le tino paleni o talavou ma tagata matutua o lo’o fa’aalia i o latou ata. O lo’o fa’apea fo’i ona tino lelei nisi o lo’o totoe mai pea o le atunu’u i le taimi nei, ua avea ma tagata tino matutua, ma o se fa’ailo lea, o le afuaga o lo latou soifua fa’afualoa.

Ona ua iloa e le o misia Amerika Samoa i lenei fa’afitauli, ae o se fa’afitauli fo’i ua so’o ai le lalolagi atoa i atunu’u uma o lo’o aofia ai, o lea ua tatou fa’autagia ai lenei fa’afitauli, o se fe’au taua mo le lalolagi atoa!

Ua tatau ona amata matau mea sa sa’o ona faia i aso ua te’a! Sa tele ina savavali tagata i a’oga, lotu ma fa’ato’aga e galulue i ai i aso uma. Faifaiva tagata ina ia fagaina ai aiga, ma sa le tele ni mea’ai auina mai fafo mo le fofoga taumafa o Amerika Samoa lava latou.

O lenei vaitaimi, ua tau fai ti’eti’e ta’avale, ua le mafai ona toe savavali, ua fa’apena ona fa’ata’ita’i atu i ai ma le fanau talavou, ua vave ai ona lapopo’a tino ma le toe fa’afaigofie ona fa’alusi na pauna mulimuli ane i o latou olaga.

Ua le toe faia ni taga mea tetele i paipa ti, ae ua na’o le faia i masini, ua le toe la’ua maia ni fafie mo le tafuina o mea’ai i fafo, ae ua na’o le ki o le ogaumu kesi, lea ua le toe alu se afu, ae ua le o ai fo’i e ta’a’alo ina ia faia ai se fa’aafu, na’o le saofa’i e matamata le televise, ta’alo ta’aloga i le televise, ma ‘ai mea uma o maua i totonu o pusa’aisa.

O le ata lena, ua toe galulue nei le Matagaluega o le Soifua Maloloina ia toe suia mo tagata uma. Ia u’ulima fa’atasi tagata uma o Amerika Samoa ina ia fa’asa’o le sese lena, ae ia fa’ata’ita’i i aga a Papalagi nei sa latou ‘aumaia nei mea fou i o tatou olaga, e ‘ai laiti i latou, e matele ina savavali ma e faia ‘aiga fa’atolu i le aso ae le so’ona ‘ai ia gula ma moe ai mulimuli ane, ma atili ai ona fa’ateleina pauna.

E tele ina ta’alo, ma to’aga e faigaluega! E saili lona soifua maloloina i le taumafai e ‘ai mea’ai paleni i taimi uma.

Na malaga mamao mai le sui fa’apitoa na avea lana folasaga ma ‘auga o le ulua’i aso o fetufa’aiga ma tima’iga, le susuga Dr, Viliami Puloka mai le Secretariat of the Pacific Community [SPC]. O ia lea na ia sau ma fa’amaumauga e matua ofo ai, aua o lo’o lalamua mai ai i tatou i le tino puputa, ma ua fa’ailoa mai, e tatau ona toe liua lea ata, ia tino pa’e’e ma le ola umi.