Ads by Google Ads by Google

“PEI A E LE POPOLE I AI LE KOVANA!”

O le tali a le kovana i lona te'ena lea o le isi pili tupe na pasia e le Fono mo le falema'i, fa'atasi ai ma lona le alu ane e feiloa'i ma sui o foma'i ia na o atu i le aso Tofi na te'a nei mo se feiloa'iga, na mafua ai ona alia’e manatu a ni isi o sui o le fono atoa ai le lautele o le atunu'u, e foliga mai e le o popole tele le kovana i le fa'afitauli o lo o tula'i mai i le falema'i.

“Aga popole i ai le kovana ma fa'akaua ola o kagaka o Kukuila ma Magu’a akogu ua ia saigia le pili a le Fogo lea ua pasia e fesoasoagi ai i le kulaga pagakia ua feagai ma le falema'i,” o le tomumu lea a se tasi o tama matua na fesiligia e le Samoa News i le vaega o lo o i ai le fale  talavai i Faga'alu.

O finagalo fo'i ia na saunoa i ai ni isi o afioga i Senatoa ina ua maua e le Fono se tusi a le ali'i kovana i le aso ananafi, ua ia te'ena ai le pili e fa'asoa atu ai le $1.6 miliona mo le  falema'i.

Saunoa le afioga i le ali'i Senatoa ia Galea'i Tu'ufuli, e foliga mai e le o manatu mamafa i ai le kovana i le tulaga pagatia o lo o feagai ma le falema'i, ae maise ai lava le atunu'u lea ua oi ona o le taugata o le tau o pili a le falema'i.

Na felefele manatu o le to'atele ina ua fesiligia e le Samoa News i le aso ananafi, i ni o latou lagona e uiga i le solo tete’e a foma'i lea na fuafua e aga'i i le  kovana peita'i e lei taunu'u.

Fai mai ni isi, o le sese muamua lava lea a le vaega o foma’i, o le le fa'ataunu'uina o le latou savali aga'i i le kovana.

“Ana taunu'u le solo tete’e matou te o atu fo'i e lagolago le fa'amoemoe a nai foma'i, e ui matou te le faigaluega i le falema'i, peita'i matou te lagona ina tulaga pagatia ua o'o i ai tagata faigaluega uma o le falema'i e aofia ai ma foma'i,” o le fa'amatalaga lea a le isi tina ina ua talanoa ma le Samoa News.

“E lei fia va'ai mai le kovana i ni sui o foma'i, sa fia silasila mai le fa'aao o le atunu'u i foma'i ma fia fa'afofoga  mai i o latou lagona ma o latou leo, ona mafai lea ona tu'u sa'o mai e le kovana sana tali e tusa ai o le mata'upu,” o le talitonuga lea a le isi ali'i 'ave taxi sa i ai fo'i i le taimi  na tau fa'atulaga ai le solo tete’e.

E ui na tasi le filiga i le fono lea sa faia a foma'i ma ni isi o tagata faigaluega i le malumalu tapua'i a le falema'i e fa'ataunu'u pea le solo tete'e, peita'i ina ua toe fa'amaopoopo foma'i i Utulei i le malae o le Suigaula o le Atuvasa, sa manumalo ai le fautuaga ina ia taofi le solo tete'e, ae malaga na o ni sui e feiloa'i ma le kovana.

O le mea malie, o le te'a o le 9:30 i le taeao na taunu'u ai sui e toafa o foma'i i luga o le ofisa o le ali'i kovana ma le fa'amoemoe latou te feiloa'i, peita'i e te'a ane lava le 4:00 i le afiafi e le'i maua lava se feiloa'iga, e o'o atu fo'i i le taimi lea ua leai le kovana ma lona ofisa.

O le fa'amoemoe na mafua ai ona malaga foma'i e to'afa e fai ma sui o foma'i uma ma ni isi o tagata faigaluega, o le tu'uina atu lea o sa latou talosaga i le kovana fa'atasi ai ma saini e silia i le to'a 100 o tagata faigaluega, ina ia manatu alofa atu ui le tulaga pagatia ua i ai le falema'i.

Na ta'ua e ni isi o tagata faigaluega ina ua fesiligia e le Samoa News, na mafua ona toe tolopo le solo tete'e ona o se fautuaga mai le komiti fa'afoe a le falema'i, ma ua latou taliaina fo'i lea fautuaga ona o le manatu fa'aaloalo i ai, peita'i e i ai lo latou talitonuga e tatau pea lava ona fa'ataunu'u le solo tete'e i le lumana'i.

E talitonu le atunu'u, e le na o tagata faigaluega a le falema'i o lo o a'afia i lenei fa'afitauli, ae o lo o sili ona safa tagata lautele i le taugata o pili atoa ai ma fa'afitauli e pei o le maliu o tagata ona o le fa'aletonu o tautua.

Ua mae'a ona pasia e le fono isi pili tupe e fesoasoani ai i le falema'i peita'i e le'i maua mai se tali mai le kovana pe ua ia sainia ia tulafono pe leai, lea e aofia ai ma le toe fa'aauauina o le lafoga o totogi e 2% mo le tausaga tupe lenei 2012.