E toatolu alo talavou o le atu’u ua fa’amanuia ina a latou taumafaiga i le aoga faa-militeri i Fort Benning i Georgia. I le masina o Novema ua te’a na tuua ai le territory mo le a’otauina o tiute i totonu o le US Army.

SEMAIA JR.

O Kalolo Semaia Jr. sa a’oa’oina o ia i le Marist St. Francis i Lepua, ona si’itia atu lea i le vasega 2-7 i Aua Elementary, ae fa’au’u ai i le vasega 8 i Afonotele. Na amata fo’i lea o ana a’oga maualuga i le Fa’asao Malisi mo tausaga e lua ae fa’ai’u ai i Fagaitua High.

“Ou te fa’afetaia le Atua i lana ta’ita’iga i lo’u olaga, ma ua taunu’u nisi o mo’omo’oga ia ou ausia lea tautua, e aoga fo’i e tausi si o’u tina matua, fa’atasi ai ma matua, ae maise le aiga. E le galo fo’i ia te a’u se aoga i le galuega a le Atua, Fa’afetai tele”

Sa ia faafetaia foi le tapua’iga a lona tina matua, Maselina Semaia, ona matua Josefine ma Fuata, ae maise le auauna a le Atua ia Iosefo Tarangi ma le vasega o Patele i le Ekalesia Katoliko i Aua ma Amouli i lona aiga Sa Fuata.

Ina ua fesiligia le tina ia Maselina, sa ia saunoa e faapea, “La’u tama e, Kalolo, ua e iloa lo’u agaga, ou te fia va’ai pea ia te oe, e le o ni tupe ma nisi mea uma e te aumaia mo a’u, a’o lo’u va’ai pea ia te oe!”

Sa ia fa’afetaia lenei galuega feso’ota’i, e maua ai pea se so’otaga o fanau galulue i nei faiva fita i fafo, ma i latou o aiga o nofo tapua’ia o latou faiva!

O le toe mana’o sa fa’ao’o mai e Kalolo Semaia Jr. sa fia fa’ao’o atu i le Auva’a ma le Kapeteni o le Paepaeulupo’o, “Ia mua le tatou Sa i lenei fu’a! Go Boys of the skull city, You can do it again!”

Mai ia Fepuari 2, 2015, ua tautua nei Kalolo Semaia Jr. i Fort Campell, Kentucky.

W. MALAGA

O Peteru William Malaga mai Mesepa, a o se tasi sa a’oa’oina i Avele College i Samoa mo lana vasega 9 ma le 10, ma toe siitia mai ai i Amerika Samoa ma fa’aauau i le vasega 10 i Leone High se’ia mae’a a’oga maualuluga i le 2014.

“O o’u matua na fa’atama tausia a’u o Fereti Faiumu Tiatia ma Lowana Tiatia le uso o lo’u tina, mai Mutiatele Aleipata,” o lana tala lea. Sa aoga foi i Pavaiai Elementary ae le’i see atu i Samoa mo isi ana aoaoga.

“Ou te fa’afetai tele i o’u matua tausi aua sa la’ua tausia ma le alofa fa’amaoni a’u mai lo’u laititi. Atonu o lenei se ala o lo’o fa’auia mai ai e le Atua ni fa’amanuiaga mo a’u ou te toe tausia ai oulua ma si o tatou aiga atoa. Fa’afetai fo’i i o’u matua mo mea uma ae maise le avanoa taua, ua ou maua, ou te gafatia ai ona ola tuto’atasi e aoga ai mo oulua ma nai o’u tei laiti. Fa’afetai tapua’i, ae o lea fa’ato’a amata le auaunaga, ia tatalo pea e le aunoa mo lo tatou fa’amoemoe maualuga ia aoga i le Atua, tausia matua ma aiga, ae silisili ia fai se aoga e toe fa’afo’i atu mo le atunu’u!”

O Malaga o se ui’i o le fanau e to’alima a ona matua. O se tasi o ona uso matua ua litaea ma’i mai le US Army ma ua alaala tumau nei i Utah ma lona aiga.

Ua momoli mai lana fa’afetai i lana Ekalesia LDS Mesepa 2nd Ward, le susuga le Epikopo ma le Faletua, ae maise le autalavou mo le latou alolofa fa’atino ia te ia.

Mai si ona tina sa vala’au mai, “La’u tama e, ia e ola mata’u i le Upu a le Atua, ia avea le ofutau atoatoa a le Atua e fai ma au au’upega i taimi fita o le galuega. Alolofa tele atu ma’ua ma le fanau, fa’apea ou tina matutua o Laupule Fuimaono ma Pepe Malaga, ae o le alofa lava lena, e le galo ai oe i so’o se talosaga molia a le tatou aiga mo oe. Ua tele ou matua, aua e silafia e le Atua, e te aoga e tausi uma matou.”

V. VAINA

O Vincent Vaina, o se alo o le Fesoasoani Katoliko o lo’o ua galulue nei i i le Ekalesia i Fagaitua. Na soifua mai i Amouli, peita’i, ua si’itia i le galuega, ma ua fa’apena ona ausia e Vincent lea la’asaga fou i lona olaga, ae ua fa’ailo Fagaitua o lona afio’aga.

Na amata a’oga a Vincent i Matatula Elementary, aua sa alaala i latou i Amouli. Na fa’au’u mai o ia i Fagaitua High ia Iuni 2014, ma o le avanoa ua ia maua, ua ia fa’aaogaina tatau e saili ai lona lumana’i, “O se auala lea ua tatala mai e mafai ai ona galue ma tausi mai lo’u aiga fa’atasi ai ma se aoga fo’i i le Ekalesia, nuu ma aiga.”

O ona matua o Fesoasoani Katoliko o Ierenimo Vaina ma le Faletua o Leu Tului Vaina.

Ua ia fa’aaogaina fo’i lenei avanoa lelei, e fa’ao’o mai ai lana fa’afetai i lana Ekalesia i lo latou agalelei ma le fesoasoani sa ia mauaina mo le tapenaga o lana malaga. “Fa’afetai tele i le matou autalavou ma le aufaipese ma ona ta’ita’i ma tulaga tofi eseese, sa iloga i lo’u agaga lo outou fai uso, fai tuagane, fa’afetai alolofa, atonu e i ai se taimi o i lumana’i e maua ai so’u avanoa lelei ou te aoga ai i le ekalesia atoa. Alofa tele mo outou, ae ia outou tatalo mo a’u, ua ou o’o i ai, e le faigofie lava lenei tautua, e mana’omia la outou tatalo! Fa’afetai.”

Saunoa le tina ia Leu, “Alofa atu i si a’u tama, o ma’ua loto ia alofagia e le Atua ana taumafaiga, ma sili se viiga o le Atua mai ia te ia, ae le o mapu le tatalo atu mo ia i aso uma. Vincent, aua ne’i galo ia te oe tatalo tatou te feiloa’i ai, ia e loto tele ia e fa’amaoni, ma ia tumau lou fa’atuatua, Alofa tele mo oe le atali’i pele!”