Ads by Google Ads by Google

“Miss Universe” NZ - Malo ae Fa’aletonu Lona Sitiseni

Ua fa’ailoa mai le fa’aletonu ua o’o nei i ai se tama’ita’i lalelei na filifilia e le Tauvaga Tausala o le Lalolagi a Niu Sila, ona ua toe iloilo ane, e le o se tagatanu’u Niu Sila moni o ia, pe ua mautu fo’i sona avea ma sitiseni o Niu Sila i le taimi ua tauva ai i lea tauvaga tausala i Niu Sila lava.

O lea la ua manumalo nei Miss Avianca Bohm, ae paga lea, sa fa’ailoa mai, na fa’aalia uma e lenei tama’ita’i mai le amataga lava i le taimi o le a tauva ai ona pepa uma i le Komiti, ae le’i i ai so latou e te’ena lona tauva ai.

Talofa, lea ua i’u ina manumalo, ae ua ese fo’i isi tala nei ua alia’i mai. O se tasi o fa’amatalaga e sili ona le fiafia ai se tasi, pe a fa’apea mai, na tu’u lava si teine e tauva, ae sa manatu uma le vaega lea, e le taitai ona manumalo.

E lelei togafiti ae le umi, o le mea lena ua tula’i mai nei, ae o lea la ua fesiligia i o latou mafaufau uma lava, pe mata e taliaina pea le tama’ita’i lea ua manumalo pe soloia ae fa’ae’e le pale i le na tulaga lua.

O Avianca Bohm ua fa’ailoa mai, i ona pepa uma na taua’aoina i le Komiti mo le latou silafia, na soifua a’e i Aferika i Saute, peita’i, i le atoaga o lona 16 taisaga na fa’ato’a alaalata’i ai loa i Niu Sila, ae o lea ua 22 nei ona tausaga, ma o lo’o talosagaina lona sitiseni i le taimi nei o le tauvaga, e le’i maua mai sona tali maoti mai le malo pe talia pe leai.

Na toe faia fo’i le vaega tatau a Avianca i lona sailia lea po’o a mai lana talosaga, ina ia mautinoa lava o mafaia e ia ona tauva i lenei tauvaga ua manumalo ai. Peita’i, o mea uma nei ua mae’a silafia e le Komiti o le Tauvaga, ae o lea ua toe suia mai a latou fa’ai’uga faia i lona manumalo.

O se tasi mea mautinoa lava, o le ali’i o Donald Trump, le ali’i lea sa afua ai ona toe saili’ilia mae’ae’a fo’i le Peresetene o Amerika Obama ma lona pepa fanau, pe mata o se sitiseni moni lava o Amerika o ia, o le ali’i lava lea sa avea nei ma sui na ia fa’atautaia ma fa’atupe le tauvaga lenei a Niu Sila, le Miss Universe NZ.

“E le o fa’amaina le tauvaga lenei, ae ua fa’amaina le ali’i na fa’amasinoina le agava’a o nei tama’ita’i e tauva uma, aua afai e fai mai sa manatu e fa’amatagofie atili ai le tauvaga i le tauva o si nei tama’ita’i lalelei, ailoga sa manatu o ia e avea lenei tama’ita’i ma sui manumalo, ae ua a nei la?”

I se tala mai a le fa’amasino, e matua tonu lava le manatu o Val Lott, ua ia fa’ailoa mai, sa manatu lava ia e le manumalo Miss Bohm, ae talofa lea ua manumalo si teine, ae le na’o le to’atasi fo’i le teine na tauva e le o ni Sitiseni Niu Sila, e  i ai fo’i ma isi sa fa’apea ona tauva i le tauvaga lava lea.

I le tama’ita’i ua manumalo, ua matua fiafia lona loto ua o’o ma feiloa’i ia David Trump fa’atasi ai ma isi tama’ita’i lalelei uma mai isi malo ae ua tauva o nisi mai Niu Sila, fa’atasi ai ma lona fiafia i sana taumafaiga vaivai ua fa’aeaina.  E moni lava ia, e le o popole lava i nei mea e alia’i mulimuli mai, o le mea sili ua manumalo.

Saunia: Leua Aiono Frost