Ads by Google Ads by Google

“Ia Fa’aosofia le Agaga Galue” - Pulega o le SPED

I le vaiaso atoa lenei, na amata mai ona fa’ailo galuega fa’atino o Posters ua mae’a ona tapena e vaega e fa o lo’o vaevaeina i ai le aufaigaluega a le Special Education (SPED)  i Matafao, ina ia una’ia i latou uma e galulue fiafia, galulue fealofani ma ia galulue fa’atasi e fa’atino latou tiute i taimi uma.

 

“O le galuega i totonu o lenei Ofisa, e ao ina mua’i mautu le agaga so’ofa’atasi o le aufaigaluega, ia mafai ona galulue fa’atasi e fa’atino ai tiute uma, ia tautuaina le fanau fa’apitoa o lo’o matou tautuaina. O galuega fo’i e ao ina fa’amae’a lelei, ma ia mautinoa o lo’o faia ma le tonu, fa’amaoni ma le alofa, e ao ai ona tapena le sipili faigaluega fiafia i le aufaigaluega.” O se fa’amatalaga ma’oti lea a Papali’i Fa’anati o le pulega a le SPED.

 

Mai le aso Gafua na fa’apipi’i ai i luga galuega tusia ma tu’ufa’atasia e nei vaega e fa o lo’o tauva, ae tolu tauvaga e ao ina fa’apipi’ia i luga latou galuega fa’atino.

 

O ‘auga fo’i e tolu ua fa’amau fa’ailoga ai nei galuega fa’atino e aofia ai: Muamua - “Galulue Fa’atasi o Tagata Uma e Manuia ai Galuega”; Lona lua: “Sa faia la’u Miti”; ma lona tolu “Mata’i ma Galue mo le 2014”.

 

E tofu le aso ma le galuega fa’atino e fa’amae’a i luga o le puipui o lea Ofisa i ona itu e fa, ma ua felanulanua’i ma fa’atumulia puipui o lea ofisa i fa’aupuga, o ata fa’atino e atagia ai latou galuega ma ala e fa’atino ai latou tiute, o se toe fa’amanatu fo’i lea i le aufaigaluega atoa i mea uma e ao ina latou galulue a’ia’i i ai.

 

I le vaega muamua e lautogia vaega ta’itasi i a latou fa’atinoga, ua fa’atulaga ai e ao ina saili e le vaega se ‘au ta’a’alo e avea ma latou a’u e faia ai latou fa’atinoga: Igoa o tama ta’a’alo, tulaga o i ai taumafaiga a lea ‘au ta’a’alo i le lalolagi po’o le tatou atunu’u, ma e tatau ona tusia mai fo’i le amataga o lea ‘au se’ia o’o mai i le taimi nei.

 

O nisi o ‘au sa iloga ona fa’ataua e nei vaega e fa, sa aofia ai le Lakers; Manu Samoa, Aukirikiti  ma Au ta’a’alo a le Olimipeka. O le fe’au taua, “E ausia le manumalo, ona ua ta’a’alo fa’atasi, ma loto fa’atasi le ‘au ta’a’alo, ua manana’o i le manumalo.”

 

O le auga lona lua. “Sa faia la’u Miti” ma sa fa’aalia mai e le Vaega 4 le olaga, o Nelson Mandela ma ala e 9 e mafai ai ona fa’aauau pea ona manatua e le lalolagi lenei ta’ita’i lauiloa, ona e le’i fa’avaivai e ola i lana miti!

 

O le vaega 3 ma le 2 sa latou fa’atinoa maia le miti a nai uso lanu,  na afua mai ia Rosa Parks, soso’o mai ai ma Malcolm X, sau ai ia Dr. Martin Luther King Jr - i latou sa moemiti ma ola e faia se suiga i le fa’ailoga lanu, ma le filifili tagata.

 

Peita’i o le vaega 1 sa latou fa’atinoa le miti a King Jr lea e maua ai le aso malolo i le masina o Ianuari i tausaga uma. O ia lea na matua tula’i ma fa’amae’a le miti ia soloia le fa’ailoga lanu i Amerika.

 

O se lu’iga mo le tausaga fou na folasia i nei galuega fa’atino uma lava, “Ia atoatoa le fa’ataunu’uina o tatou ta’utinoga ia fa’atino galuega ma le fiafia, ma ia galulue fa’atasi e mama ai se ‘avega i le galuega i aso ta’itasi.” O lea se sipili matagofie na fa’apea ai i latou, e ofu mai e tama’ita’i la’ei o Ali’i, ae ofu e ali’i la’ei o tama’ita’i.