Ads by Google Ads by Google

“FILIFILI OE PE FA’AMUAMUA LAU FANAU PO O LAU FAGUPIA”

Ti’eti’e saolotoga o se tamå talavou aao o ali’i Fa’amasino

 

O le tamå talavou lea ua fa’atele ona molia i lona soli o le tulafono e aofia ai ma le tagofia o le ‘ava malosi, ua faatonu e le faamasinoga ina ia toe fo’i i le toese e nofo ai ma mafaufau, poo fea e faamuamua i lona olaga, poo lona toalua ma lana fanau poo lana ‘ava malosi, ae se’i alo ali’i fa’amasino e iloilo se ituaiga faasalaga e talafeagai mo ia.

 

O ananafi na ta’usala ai e le faamasinoga le alii o Nathan Mauga i le solitulafono o le faatupu vevesi i nofoaga faitele, e mafua mai i se faalavelave na tulai mai i le aso 13 Me i Nuuuli, lea na ‘ona ai ma laulauvavale solo i le tuneva o le po e pei ona taua i faamaumauga a le faamasinoga.

 

E loka mai e leoleo Mauga i le mataupu lea, o lo o nofovaavaaia o ia i luma o le faamasinoga faaitumalo ona o le solitulafono o le faatupu vevesi na ta’usala ai fo’i o ia i se taimi e le’i mamao atu, lea na faatonu ai o ia e le faamasinoga e aua ne’i ona toe tagofia le ava malosi.

 

Ae fa’a’ole’ole atu Mauga i ali’i faamasino mo se isi avanoa mo ia se’i toe fo’i ai e faaauau lana tausiga i lona to’alua ma si ana fanau, na faauilavea le afioga i le alii Fa’amasino ia John L. Ward II ma lona si’ufofoga ua si’isi’i i luga ma fa’apea atu ia Mauga, “E faapefea ona e tausi i lou to’alua ma lau fanau pe afai na o le ‘ona lava lau mea e fai.?”

 

“Ua faatele ona e tula’i i luma o le Fa’amasinoga, o lau faamatalaga lava lea e masani ona fai, e te tagi mai e faamagalo mo oe ma ia toe tuu atu se isi avanoa ia te oe, ae u mai loa lou tua ina ua mae’a ona tu’u atu e le faamasinoga le avanoa ia te oe, ona e alu lava lea e te le kea i au folafolasaga sa fai mai, a ea,?” o le saunoaga lea a Ward ia Mauga.

 

“Ana e alofa i lau fanau ua leva ona tu’u lou inupia,” o le isi lea saunoaga a Ward.

 

“Lona uiga o le mea lea ete mana’o ai e alu oe e inupia ma loka i le falepuipui ae alu atu le fa’amasinoga e tausi lau fanau,?” o le fesili lea a Ward ia Mauga, ae na o le punou lava i lalo e aunoa ma se tali.

 

“Toe fo’i i le toese e te nofo ai ma mafaufau po o le a le filifiliga e te mana’o e fai, pe faamuamua pea lau pia po o le faamuamua o lou to’alua ma lau fanau, ae o lea fo’i o le a nofo le faamasinoga ma mafaufau i sana faaiuga talafeagai mo oe, ina ia taofia ai lou toe solitulafono so’o,” o le saunoaga lea a Ward ma toe tolopo ai loa le mataupu a Mauga e lau lona faasalaga i le aso 6 Iuni, 2013.

 

O le afioga i alii faamasino ia Ward ma Su’a Pereira o lo o taulimaina le mataupu a Mauga.