Tu’ua le Malo e le Fa’atonusili Matagaluega o Fefa’ataua’iga - Faleseu Eliu Faresa Paopao

Ua lagia le faigamalo a Amerika Samoa i le ao pouliuli, aua ua lagona fo’i le leo i Rama ina ua fa’ia se tasi o lupe sa olo i le fuifui i le Kapeneta mamalu o lau faigamalo Tutuila ma Manu’a. O le lagia lava o Pomasame ma le maota o Puleimau, Fitiuta Manu’a.

Na fa’amalolo o ia mai ona tiute ma a na galuega e lona Matai i le aso 14 Aperila, a’o i ai o ia i ona togafitiga i le a’ai i Portland, Oregon i Amerika. E malolo fo’i o ia, ae o tutula’i pea i le tofi Fa’atonusili o le Matagaluega o Fefa’ataua’iga a le Malo o Amerika Samoa.

O lenei ‘au’auna, o se tasi e naunau e faia lona tiute, ma e le va’ava’ai vale pe fa’atalale i lona tofi ua vala’auina ai i lona aiga, o le afioga le Ali’ioaiga, e ulumatua i le fanau a le afioga le Ma’opu o le Alofioamoa Paopao Faresa Eseroma ma le Faletua o Tumema Saifolau Mapu Puaopea  Paopao o Fitiuta, Manu’a.

E tusa ai ma se fa’amatalaga a le uso moni, le susuga le Faipule Mapu Puaopea Paopao, sa ia fa’ailoa mai ai, “O le uso e matua tumu i le faiuso, alofa i lona aiga, ae le fo’i ona manatu i le mea moni. E fa’amaoni i ona tiute ae faia lava e leai se leo i le tele o taimi, e agamalu lava ia, ma e misia fo’i o ia i le li’o o i matou o ona uso ma tuafafine e to’a iva.”

“Ina ua o’o mai tala ua maliu le afioga le Fa’atonusili a’o le Ti’akono i le Ekalesia Fa’apotopotoga Kerisiano i Nu’uuli, na lagona le fa’anoanoa, ae ua i ai le malosi’aga i lenei taimi ona o le fa’amafanafanaga mai le pa’ia maualuga o le aufaigaluega totofi a le Atua, o uo ma le aumea mamae ae maise le pa’ia lasilasi o le afio’aga ma le malo fo’i i le afioga le Kovana Sili ma lana taupulega.”

Mai le sui fa’atonusili o le matagaluega o Fefa’ataua’iga, le susuga Lelei Peau, ua ia fa’apea mai ai, “O le afioga le fa’atonusili o se tagata e maumaua’i i ona tiute i le matagaluega, e matau lava e ia auau o mea uma e faia a le matagaluega lenei, ia fa’amuamua va’ai toto’a i ni mea e ono afaina ai le atunu’u ma ona tagata ona o ni feagaiga e fia fa’amautu, e le o se tasi e faigofie ona manatu pe a o’o loa i measina a le atunu’u ma ona tagatanu’u.”

“O ia o se ta’ita’i lelei ma e agava’a i lona lea tofi. E fia faia e ia measili mo ona tagata ma le teritori o Amerika Samoa. E loloto lana fa’autaga, e manino fo’i lana tofa i taimi uma, e misia lenei ta’ita’i mai le taimi na va’ava’alua mai ai i tiute fai ma fa’ai’uga e ao ina mautinoa e maua ai se lelei mo le atunu’u i le taimi nei ma le lumana’i.”

Ua molita’i mai fo’i lagona fa’amaise o le Matagaluega o Fefa’ataua’iga, i ona tagata faigaluega ae maise le pulega o totoe nei i le Faletua, le Fanau ma Aiga ae maise o le Aiga potopoto o lana susuga le Fa’atonusili, i ona itu tetele ma ona itu taulagi.

Ona o tulaga vevesi i le sisigafu’a a le tatou malo, sa le mafai ai ona maua se so’otaga ma le afioga le Kovana Sili, o le na ia tofia Faleseu Eliu Faresa Paopao e avea ma se tasi o lana Kapeneta mamalu, peita’i, o lo’o loma ona toe sauniga ma lona to’ai mai i fanua i le malaga a le va’alele a le Hawaiian Air i le aso 22 Aperila, 2012, le aso Sa lea, ma o le a fa’ato’a maua ai se saunoaga a le afioga le Kovana e tusa o le to’esea o lana auauna sa tula’i mai i lea matagaluega tele o le malo.

I lona soifua mai, o se tasi lava o alo o le Manu’atele, ma na amatalia ai fo’i ana a’oa’oga i Fitiuta Elementary School, soso’o ai lea ma le si’itia i Papatea Junior High i Ta’u Manu’a lava.

Si’itia mai a’oa’oga i Tutuila nei ma a’oa’oina ai i le American Samoa High School o le Samoana lea, ma amata faigaluega ai loa i le Tax Office ina ua mae’a fa’au’u mai le Samoana.

Ina ua mae’a lana auaunaga mo ni nai tausaga, sa ia maua se avanoa e aoaoina ai atili i le Kolisi i Chadron College, Nebraska. Ina ua mae’a maua fa’ailoga, na taliu mai ma avea ma Faia’oga i Leone High School. Na ia toe maua le isi avanoa lelei fa’asikolasipi e fa’aauau ai a’oa’oga fa’aloia ma ulufale atu ai i Val Pasaiso Law School i Indiana.

Ina ua mae’a a’oa’oga ia na taliu mai fo’i i fanua ma faigaluega loa i le DHR i lalo o le Taita’iga a le susuga Sanele Tuiteleleapaga. Soso’o ai ma le avea ma Taiulu o le LBJ Administrative Office i Faga’alu. Mae’a lea tofia o ia e faigaluega i le High Court o Amerika Samoa. I le faigamalo a Kovana Tauese Sunia sa tofia ai e avea ma Fa’atonusili o le Matagaluega o Administrative Services, soso’o ai ma le avea ma le faigaluega i le TEMCO ona fa’ato’a avea ai lea ma Fa’atonusili o le Matagaluega o Fefa’ataua’iga, lea lava ua fa’amae’a ai nei ona faiva ina ua tu’ua le malo e lana afioga le Fa’atonusili.

I lana ekalesia o tautua ai ma le tina o le aiga Telesia Vaelua Ah Hing - Paopao ma le fanau i Nu’uuli EFKAS, o lo’o tautua i la’ua i lo la tofi Tiakono. E i ai fo’i tofiga a le Ekalesia sa se’ei ai le tama e pei o se tasi o le komiti o tupe, ma o se tasi lava e naunau i ona tiute i lea fo’i itu o le auaunaga.

I lona tulaga o le aiga potopoto, o le afioga le Ali’ioaiga, na fa’asuafaina i lona suafa matai “Faleseu i lona aiga i Fitiuta, Manu’a.

Ona o lo’o tagi mai ala le faletua ma le fanau ma aiga, o lo ua fa’atalia ai le to’ai taunu’u mai o lona tino maliu i le aso Sa a sau nei, ona fa’ato’a fa’alauiloa fa’alaua’itele lea o ona toe sauniga ma ona taimi atofa.

Fa’amafanafana le Atua i agaga fa’avauvau o le pa’ia o Aiga i ona itu tetele ma ona itu taulagi, ia i ai fo’i le alofa mutimutivale o le Atua i le faletua ma le nofo a alo ona o le malaga a le maliu ma le oti, e le seua e i tatou i lenei olaga.