Ads by Google Ads by Google

“Fa’amoemoe - Gagana o le Ola!”

O le vaiaso nei na tatalaina ai le fonotaga mo tupulaga talavou a le lalolagi lea ua talimalo ai le ekalesia EFKAS, ae o le vaiaso fou ua faamoemoe e amata ai le fonotaga tele mo tagata matutua.

O le autu o lenei fonotaga, o le Faamoemoe, o le gagana o le Ola, ma e silia i le toa 200 sui mai atunuu eseese o le lalolagi o loo faatasi mai ai e aofia ai Papua Niu Kini, Solomona, Tuvalu, Ausetalia, Niu Sila, Ethiobia, Zambia, Korea, China, Taiwan, UK, Wales, Zimbabque, Samoa ma India.

 O talavou nei ua tofia fa’apitoa e le Ofisa o le CWM Assembly ma ua maua ai e i latou le avanoa lelei e asia ai le tatou malo.

O se fa’amatalaga mai le sui Ofisa o le CWM mai Taiwan, Chung Chin Hong, sa ia fa’aalia ai, “O se mea fiafia lenei malaga, e le o se mea e maua so’o se avanoa e asia ai se isi atunu’u, peita’i, o le fa’amoemoe e asia isi malo, o se mea lelei tele mo tupulaga Kerisiano.”

E fou le a’oa’oga Kerisiano ia i latou na tupuga mai i lena itu o le lalolagi, aua e i ai isi o latou atua sa ola a’e ai o latou tua’a, peita’i ua fulitua i latou ma ua latou maua Keriso!

O lenei fa’atasiga sa amatalia lea i le aso Tofi i le sauniga lotu tele sa faia i le Malumalu Ia Taunu’u i Kanana Fou, ona soso’o lea ma isi a latou folasaga fa’akerisiano e fa’atautaia mo le vaega atoa o Tupulaga Kerisiano o le lalolagi ina ia mafai ona so’ofa’atasi i latou i le alofa ma le fealofani.

Na faia le savaliga matagofie a le vasega o talavou uma lava, ma o i’ina sa fa’ailo ai le atunu’u ma o latou sui na auai mai. O le latou ‘aiga na soso’o ai, ae saunia loa potu a’oga mo latou folasaga fa’amasani, ma ia fa’aatagia ai le latou ‘au’au: O le Fa’amoemoe - Le Gagana o le Ola!

Ina ua mae’a le latou tausamiga o le aoauli, sa soso’o loa ma a’oa’oga fa’ale-soifua maloloina, e fa’atatau i gasegase ua a’afia tele ai tagata o Amerika Samoa. Soso’o ai ma le folasaga a le Ofisa o le Vaomatua ma le Gataifale, soso’o ai lea ma le folasaga a le Amerika Samoa EPA. O le mea’ai o le afiafi na faia lea e le Ekalesia a le Alofa Tunoa i Lepuapua ma latou fiafia fa’atasi ai i le latou vala’aulia fa’apitoa lea.

Na alafa’i i le taeao o le aso ananafu i le toe fa’atasia i le Maota mo Tupulagaoateao, ma latou fa’afofoga ai i pesega matagofie na tapena i ai le Petesa Uta Youth, ma sa mae’a loa le sauniga lea ona soso’o lea ma le latou malutaeao. O a’oa’oga fa’ale-autu o le mafutaga fa’apea ai ma fa’ailo o agaifanua a lea malo ma lea malo ua auai o latou sui i le so’o lenei na soso’o ai i potu fa’avasegaina e le Komiti o Tupulaga.

I le maea ai o le folasaga a Amerika Samoa i lana aganuu, na faatinoina ai loa auala e fai ai le umu mo le taoina o taumafa, ao lei laulauina atu mo le taumafataga.

I le afiafi ananafi sa faia ai pea fetufa’iga i le va o talavou uma ua auai fa’atasi i le fonotaga lenei, ina ia malamalama lelei tatou tupulaga talavou i so’o se atunu’u, i agaifanua a lea malo ma lea malo, ina ne’i misiona fo’i i latou i ai, ae ua i ai se malamalamaga fa’atasi ai ma nisi ua latou iloa e fa’amautu i ai, ni a latou galuega tala’i.

O le itula e 3:00 - 5:00 o le a faia ai fonotaga tu’ufa’atasi, ma iloilo ai ni sui e avea ma le laulauafono mo feso’ota’iga i le isi tausaga a savalia, ma tu’ufa’atasia ai le latou lipoti atoa o lenei fonotaga fa’avaomalo a tupulaga talavou Kerisiano i le lalolagi.