ALALAGA FIAFIA TAGATA INA UA TAOFI SI'I FALEMA’I

Na ti’eti’e le isi fa’afetai i luga o le isi fa’afetai fa'atasi ai ma le tele o vi'ivi'iga fa'asaga i le ali'i kovana, mai le to’atele o le atunu’u na fesiligia e le Samoa News i le nofoaga o lo ’o i ai le falema'i o le LBJ i Faga'alu, ona o le fa'ai'uga lea ua faia e le ali'i kovana ma le pulega a le falema’i, e fa'aleaoga ai si'itaga o pili a le falema'i, fa'atasi ai ma le fa'aleaogaina o le fuafuaga e vaea ai tagata faigaluega.

“Fa'afetai lava Togiola i lou alofa i le atunu'u, ana leai lou filiga e fo'ia fa'afitauli nei, e le iloa po o fea o le a sulu i ai matou tagata lima vaivai i le taugata o pili a le falema'i,” o le saunoaga lea a le tama matua o Peniata Fuluasou, 62 tausaga mai Nu'uuli ina ua fesiligia e le Samoa News i sona finagalo e uiga i suiga ia ua faia i le falema'i.

“O le mea sili ua toe fa'afo'i i tua pili a le falema'i, ua leai fo'i se tagata faigaluega e maumau sana galuega,” o le saunoaga lea a le tama.

O le to'atele lava o tagata sa i ai i le falema'i i le taeao ananafi na fesiligia e le Samoa News, sa na o vi'ivi'iga lava o le ali'i kovana na o latou talanoa mai ai.

O isi fai mai o le kovana lava lea e ola ai le atunu'u mai le tele o fa'afitauli, peita'i na ta'ua e isi e fa'apea, talu lava ona tula'i mai Togiola i le nofoa o le kovana, e na o mea lelei lava o lo o ia faia mo le atunu'u.

Na ta'ua e le tina o Losalina Mareko mai Aua e fa'apea, sa ia va'aia le tigaina o lana tama e 12 tausaga i le aso Lulu na te'a nei, peita'i sa fa'afaigata ona la o'o  atu i le falema'i ona e leai se tupe sa ia te ia, o lona to'alua fa'atoa totogi i le aso Faraile, peita'i ina ua fa'alogo i le tala e uiga i suiga ua faia e le kovana mo le falema'i, sa lagona ai lona fiafia ma manatu ai loa o le a alu e 'ave si ana tama i le falema'i.

“O se fiafiaga ia te a'u ina ua mafai ona ma o mai ma si a'u tama e va'ai le foma'i i le aso, (aso ananafi)”, o le tala lea a Losalina.

O lagona fo'i ia na mafai ona fa'aleo mai e ni isi o tagata faigaluega a le falema'i na maua tusi e fa'amalolo mai ai i a latou galuega, ina ua fesiligia i le fa'ai'uga lea ua faia e fa'aleaoga ai le fa'ai'uga e fa'amalolo i latou mai galuega.

“Ou te fa'afetai i le kovana i lona fesoasoani i tagata faigaluega a le falema'i, Togiola, o oe a o le Toa, ua le fa'atasi ona e alofa i le atunu'u,” o le fa'amatalaga lea a se tasi o ali'i e galue o se leoleo po mo le falema'i, lea fo'i sa maua lana tusi e malolo mai ai i lana galuega.

Na va'aia le toe tumutumu atu o le atunu'u i le taeao ananafi e fai a latou talavai e pei ona masani ai, ina ua toe fo'i i le tai $10 le totogi e va'ai ai le foma'i fa'apea ai ma le tau o le talavai.

Na ta'ua e le afioga i le matua ia Togiola Tulafono i se feiloa'iga ma tusitala i le aso Tofi na te'a nei e fa'apea, o le pili a le Fono e fa'asoa atu ai le $3 miliona mo le falema'i, e ui ua na o se tupe e fesoasoani ai mo le taimi nei, ae o lo o latou galulue pea ma le fono i se isi 'auala e maua mai ai se isi alatagupe mo le falema'i.