Ads by Google Ads by Google

“FA’AFA’AIPOIPOGA O LE FA’AKERISIANO MA LE AGANU’U FA’ASAMOA”

O le Aso Lulu, fitu o Mati 2012, o le’a fa’apa’ia ma fa’alauiloa ai le tusi a Moseniolo Ioane Vito Fonoti, ua na fa’aigoaina, “Fa’afaipoipoga ole Fa’akerisiano ma le aganu’u Fa’aSamoa”. 

O lenei sauniga o le’a faia i le maota o le Ekalesia Katoliko i Fatuoaiga, e amata ile fa ile afiafi.  O le fa’aao o le Ekalesia, Epikopo Vaopunimatagi Quinn Weitzel, o le’a fa’apa’iaina ma faia le tatalo amata a’o Moseniolo Etuale Lealofi o le’a saunia le tala ma vaili’ilia le uiga o le tusi.

O le faipule o le Maota Fono Faitulafono, Larry Sanitoa o le’a fai ma fofoga fetalai o le aso, na te fa’afeiloa’ia le valaa’ulia ma tagata lautele o le’a iai i le sauniga.  O Fuiono Felise Vito, e molia le fa’afetai ale aiga o Sa vito ile aofia mo le auai i lea aso atofaina.  O lenei sauniga e talia so’o se tasi.

O Moseniolo Ioane Vito Fonoti, o le na ia tusia le tusi ose pelepitelo Katoliko na galue iSamoa ma Niu Sila.  O le tausaga 2010 na maliu ai i Apia a’o galue ile matagaluega ole Ta’ama’ita’i ole Mauga iPalisi, Apia.  E 74 tausaga o lona soifua ae manava loa ma ana galuega i lalo nei.

O lenei tusi na fa’alauiloa muamua i Niu Sila ia Tesema o le tausaga ua te’a.  O le aso 27 o Fepuali o le tausaga nei, na fa’aaluiloa ai i Samoa i le maota o le galuega na galue ai i Palisi Apia.  O le ao o le malo o Samoa, Tui Atua  Tamasese Ta’isi Efi sa ia saunoa ile a’ano o le tusi a Moseniolo Ioane Vito Fonoti i lea sauniga.  Nau auai ma le palemia o Samoa, Tuila’epe Lupesolia’I Tuilaepa Malielegaoi I lea fa’atasiga.

O le tusi e fa’atatau i tagata kerisiano uma lava e le fa’apito ise lotu e tasi.

E Tolu Vaega o le Tusi a Moseniolo:

Vaega Muamua: O le Fa’atelosiaina po’o le fa’akerisiano o le Aganu’u Fa’asamoa.   O le taumafai lea o Moseniolo e aumai le Tala Faasolopito, Tala o le Vavau, le aganuu, tu ma aga  a Samoa aemaise o ana muagagana ma muafetalaiga ma soo faatasi ma le Tala Lelei a Keriso.

Vaega Lua o le Tusi ua ta’ua: O le Fa’atelosiaina po’o le fa’akerisianoina o Galuega a le Atua. O mau a Moseniolo Ioane Vito Fonoti i lea vaega o lana tusi, o le toe tilotilo lea i uiga loloto o le Lotu Samoa sa tapua’i ai le atunu’u i le taimi ae le’i taitai ona oo mai Misionale ma le Tala Lelei.  O lana mau fai mai ua leva ona iloa e Samoa e iai le Atua ae sa nenefu i o latou mafaufau. Aua a tatou va’aia ana galuega i le lalolagi ona tuu fesili lea o po’o ai na ia faia nei mea uma ua tatou sapi ai ma ola ma soifua ai.

O lana mau ia Samoa fai mai ua leva ona savalivali le Atua i laufanua o Samoa ma sauniuni le atunuu mo le afio mai o lona Alo. Ina ua taunuu mai loa misionale i Samoa ma ua sulugia ai loa faatuatuaga sa taua o faiga faanuupo i le malamalama o Kerisio ma ua le toe nenefu ai loa la latou vaai ae ua latou faatuatua ai i le Alii.

Vaega Tolu o le Tusi: Ua na fa’aigoaina o le Fa’afa’aipoipoga o le Faakerisiano ma le Aganuu Faasamoa. O le vaega lenei ua taumafai ai Moseniolo e fa’afaaipoipo le fa’akerisiano ma le Aganuu Faasamoa.  O le igoa fo’i lea o le tusi.

O lana mau i lenei vaega o le tusi ua na tu’u faatasia ai le Fa’akerisiano ma le Aganuu Faasamoa i se agaga o se faaipoipoga. O lenei mau ua ia fa’alolotoina le afio mai o le Alo o le Atua i le lalolagi ua avea ma tagata ola ma nonofo ai pei o tatou uma.

I le saunoaga a Tui Atua Tupua Tamasese, ao o le malo o Samoa ile tusi a Moseniolo Ioane Vito Fonoti, fai mai, o le mau a Moseniolo, sa fa’atonutonu folau le Atua ile tala fa’asolopito o Samoa ma o tatou matua.  I totonu o lana tusi ua ia tima’i mai ai i tatou eo e sa’ili le fa’atonutonu folau a le Ali’i io tatou tu ma aga, iupu tu’u ma le mau tu’ufa’asolo, ao tatou matua.  A tatou maua ai le Atua, ona tatou iloalea, e le ese mai o ia mai le Atua o Eperu ma Kerisiano.

Saunoa Tui Atua Tupua Tamsese,“O le taofi o Moseniolo (Vito), tatou o e saili le fea’u a le Atua la ei totonu o le tala fa’asolopito, le tatou tu ma le aga, ma le tatou mau tu’ufa’asolo.  O la’u faitau atu ile tusi lenei, ose fa’alautelega o le mau a Mosenilo, ‘E muamua atu le Atua o le tala fa’asolopito i lo le Atua o le terosia po’o le mata’upu silisili.”

Saunoa Tui Atua Tupua Tamasese, ao o le malo  Samoa i lana molimau ile tusi a Moseniolo, “A tatou faitau ile tusi a Moseniolo, e ese le manaia o le gagana e momoli mai ai. Po’o lea le lavelave ma le gaogaosa o le mata’upu o le terosia, po’o le fita o le mata’upu, o le tu ma le aga, po’o le tala fa’asolopito o Samoa, ae pei o le sulu o le malamalama le gagana faigofie ma le manino.”

Ile fa’ai’ui’uga o lana saunoaga, faimai Tui Atua Tupua Tamasese, “O le fa’afa’aipoipoga lea e ta’ua o lo’o sa’ili ele tusi, o le so’oso’oga ma le tu’ufa’atasia o le mea moni, le matagofie, le sa’o, le amio tonu, ile mau a Isaraelu, le mau a Kerisiano, ma le mau a Samoa. 

“Ae fa’avaea mai le galuega sai’li ile fa’atuatuaga e maualafia ona e tasi le Atua o le vavau ma le fa’avavau, e afuamea ma fa’ai’u mea.”

O le atoaga o le molimau a Tui Atua Tamasese Ta’isi Efi o lo’o i totonu o le tusi.

Fa’afeso’otai numela: 699-4558, 258-2287, 733-0186 mo ni fesili ile tusi.