Ads by Google Ads by Google

“E tutusa lava le oti ona o pili falema’i ma le oti pili ASPA”

E le’i taliaina e nisi o le atunu’u saunoaga a le kovana sili e faapea, e tua siitaga a le ASPA i le moli matagi ma le fagu karasini, ae o tua o si’itaga a le falema’i o le oti, na taua e nisi na mafai ona fesiligia e le Samoa News i lenei mataupu, e talitonu latou e tutusa lava le oti ona o siitaga a le falema’i ma le oti ona o siitaga a le ASPA.

“E oti foi le tagata pe afai e leai se tupe e fa’atau ai se mea’ai ona ua alu uma e totogi ai pili a le ASPA”, o le saunoaga lea a Ifopo Maiava o Tafuna, o se alii e galue i se tasi o konekarate fau fale i le atunuu.

Na taua e Maiava, e le tatau i le kovana ona taumafai e fai ni saunoaga e ufiufi ai le tulaga matuia ua i ai siitaga a le ASPA i le taimi nei, ona o le aitalafu a le malo lea e o’o mai lava i le taimi nei e lei totogia mo le pili o le eletise ma le suavai, lea ua o’o atu i le $7.2 miliona.

O manatu foi ia o ni tina faiaoga talavou se toalua sa faaalia e uiga i lenei mataupu e le’i finagalo e faailoa o laua suafa.

Na taua e tina faiaoga nei, e atagia mai i saunoaga a le alii kovana o loo ia lagolagoina siitaga a le ASPA.

“Ou te manatu, e sili atu foi ona mafatia le tagata soifua pe afai e popole lona loto ona o le leai o se tupe e tausi ai lona aiga ma faatino ai nisi o manaoga, ma o ituaiga lagona na e mafai foi ona oo ai le popole, atuatuvale ma i’u ina oti ai le tagata,” o le saunoaga lea a le isi o tamaitai faiaoga ia e toalua.

Saunoa le alii faipule ia Maneafaiga Faoa, tusa lava po o fea e tafe agai i ai le ‘au i siitaga a le falemai ma le ASPA, o le mea mautinoa lava e le fesiligia le tulaga pagatia o le atunuu o lo o i ai.

“E oti le tagata pe a le alu i le falemai ona o siitaga fou i totogi, e oti foi le tagata pe afai e leai se tupe e tausi ai lona aiga, ae o le itu e sili atu ona matuia, o le aafia o le mafaufau ui le pologa ma le atuatuvale ona o le tau sailiga o se tupe e tausi ai le aiga, totogi ai pili ma le tulaga pagatia lava ua i ai le tau o le soifuaga i lenei taimi,” o le faamatalaga lea a le alii ave pasi o Panapa Iuliano.

Saunoa le afioga i le alii kovana sili ia Togiola Tulafono i luga o lana polokalame i le faaiuga o le vaiaso na tea nei, e mafua ona ia talitonu e matuia atu aafiaga o siitaga a le falemai ua faia nei nai lo le ASPA, afai e leai se tupe e totogi ai e le aiga le latou pili o le ASPA, e mafai ona faatau le karasini ona fai ai lea o le moli matagi e mumu ai le aiga, ae o siitaga a le falemai, e le mafai ona faia lea ituaiga alofaga o le leai o se tupe e vaai ai le fomai ona nofonofo lea i le fale, aua e na o le oti lava le mea e oo mai ai.

O le aso lea ua faamoemoe e toe feiloa’i feiloai ai le kovana sili ma taitai o le Fono Faitulafono, i le tau sailiga o se fofo o le faafitauli tau tupe lea ua feagai nei ma le falemai i Fagaalu, le LBJ.

O le po o le kerisimasi lea ua faamoemoe le pulega a le falema’i e amata faamamalu ai a latou siitaga fou i vaega eseese o le falemai mo le atunu’u, ina ua maitauina se tulaga faaletonu i le itu tau tupe o loo faatautaia ai galuega a le falemai.

E toatele le atunuu ua faailoa lo latou teena o nei fuafuaga, atoa ai ma lo latou fesiligia o le malo i le mafuaaga ua ala ai ona le totogiina tupe ua maea ona faatulafono i le falemai, e fesoasoani ai i a latou gaioiga.

E tusa ai ma le molimau a le falemai o loo taua ai, e tusa ma le $5 miliona le tupe e lei totogiina atu e le malo ia i latou, mai tupe ua maea ona faatulafono e fesoasoani ai i le latou tautua.