Ao tau fa’amae’a tapenaga o le toe palota ia Novema 20, sa fa’atautaia pea tiute o le Arts Council e tusa ma lona fa’atulagaina i tausaga ta’itasi, ma sa fa’ataunu’uina lava i le aso 14, 15 & 16 o Novema faaaliga o galuega taulima, ae maise o le vasega o atisi i a latou taleni fa’afiafia, fatu pese ma le lagia o a latou pesega i so’o se gagana ua alaalata’i i lo tatou atunu’u.

O le aso 14 -15 Novema, na fa’atulaga lea mo fa’aaliga o galuega taulima ua mae’a lalagaina pe taina fo’i mo le maimoa a le lautele, ae faia ai fo’i se filifiliga a le Komiti ina ia maua se tasi e fa’amau fa’ailoga numera muamua ma le tulaga lua.

I le toe aso, na fa’atautaia ai pea le fa’aliga masani mai le taeao se’ia o’o mai i le afiafi, ona fa’ato’a faia loa lea o le fa’aaliga o Fatuga, fa’aaliga o taleni a atunu’u eseese i Amerika Samoa, atoa ai ma Fa’aili Ta la’au ma usu pese fa’aperetania ma le fa’asamoa fo’i, o se tasi lea o taleni o lo’o taumafai atili ia toe fa’afo’i mai, ma fa’afiafia talavou e toe fa’ataua.

“O le fa’amoemoe taua lava lea o le Arts Fiafia, o le toe a’apa atu o le Arts Council e toe fa’aolaola nisi o taleni fa’asamoa o le a mou atu, ae maise i musika ma fatuga a Samoa, o a tatou galuega alofilima ua le toe fiafia le fanau talavou e faia, ia fa’aa’oa’o pea i ai, ma fa’afiafia i latou e toe lalaga ma taina!” O se saunoaga lea a Leala Elisara.

I le afiafi lea e to’aiva lelei fa’aili, aufaipese ma ausiva sa fa’asolosolo e fa’ailo o latou sao, aua sa fa’atauva fo’i ina ia maua’a pea le fiafia e faia. O le tulaga muamua o Aufaipese sa tula’i mai ai le Star Kist Samoa ma o le fa’ailoga ua saunia e $1,000. O le tulaga lua na maua lea e Fa’asao Malisi i le tinoitupe e $800. O le tulaga tolu o le Faifai Easy mai Aua i le fa’ailoga e $600. O le tulaga fa o le Mad Hatters mai Aua fo’i i le fa’ailoga e $400. ma le tama o Mua’au Lefe’e na ia mauaina le fa’ailoga lona lima i le $200.

Mai le itu o galuega taulima fa’asamoa, sa faia ai le tauvaga i le lalagaina o Pulou Samoa ma sa maua ai le tina o Tiena Tamahanga, tulaga lua le tina o Fiavivini Loua, ma le tulaga tolu o Taumate Leupolu ma sa tofusia fo’i i latou ma fa’ailoga tupe.

O le lalagaina o le Ili Samoa na tula’i mai ai le tina o Cinderella i le tulaga muamua ma le tulaga lua fo’i i ana galuega fa’atino, ae tulaga tolu ai Loini Vivao i le lana ili na lalaga. Na maua fo’i fa’ailoga tupe a ia tina mo le latou sao.

Peita’i i fa’afiafiaga a atunu’u eseese o tatou o alaala i’inei, sa fa’afiafia ai tatou uso mai: Tonga, Tuvalu, Fiti, Filipino ma le Star Kist Samoa fo’i. Na maua uma fo’i latou fa’ailoga tupe mo le latou sao i lea afiafi. O le afiafi o le aso Faraile sa fa’atino ai le tulaga o mea ‘taumafa samoa’ e fa’avela e ala i le Suavai.

Na faia le umu ma sa fa’avela ai le meatuaolo, fa’aa’oa’o i le fanau talavou lona gaseseina, fa’apeana fo’i le miki, palusami, faiai, o fa’i ma ulu. O nei gaoioiga uma e faia ae tapu’e video mo le faila a lea Matagaluega ina ia fa’amauina mea ua a’oa’oina i talavou o le atunu’u, ia latou fa’aauau ia measina a le atunu’u i isi tupulaga fai mai o le atunu’u.

O le fa’afetai a le tama’ita’i fa’atonu, Leala Elisara sa ia fa’apea ai, “E fa’afetai i Atisi uma o le atunu’u sa latou fa’atauaina lea vaitaimi ma le fa’aaliga lea o galuega taulima e ao ina a’otau ai tupulaga o nei ona po, ia le motusia lea tomai i tausaga sa sau i ona tupulaga o le a soloa’i mai.”