Ads by Google Ads by Google

“AISEA UA SULU AI LE LBJ ATUNUU A’O FEA LE MALO?”

E tele fesili ua lagalaga mai le atunuu ina ua faailoa e le Pulesili ma le Taitaifono o le Komiti Faafoe a le falemai o le LBJ le manatu e faapea, ina ua le mafai e le malo ona tali mai i le faafitauli tau tupe lea ua tulai mai, na manatu ai loa le pulega o le falema’i, e leai lava se isi auala e mafai ona maua ai se fesoasoani, o le sulu loa i le atunuu e ala i le sii lea o pili a le falema’i.

“A’o fea le $1.3 miliona lea na pasia e le Fono Faitulafono e tuu atu e fesoasoani ai i galuega ma fuafuaga a le falema’i,?” o le fesili lea a Senatoa Malepeai.

“E leai se mea faapena i lalo o le la o le faatupu e le malo o le aitalafu ma mafua ai le faafitauli tau tupe i le falemai, ae aapa mai le falemai e faaee mai le avega i luga o le atunuu,” o le saunoaga lea a le tama matua ia Fetuao Papali’i, 71 tausaga mai le afioaga o Tafuna ina ua fesiligia e le Samoa News e uiga i lenei mataupu.

Na taua e le tama ia Papali’i, sa taofia i le falema’i i Fagaalu lona atalii i le masina na tea nei, ae ina ua maua mai le pili, e toeitiiti lava oo atu i le $4,000 le aofai, ma o le taimi nei, ua toeitiiti maea ona totogi lea aitalafu, e ala i le fesoasoani mai a nisi o lana fanau mai fafo.

“E leai se mea faavalevalea i lalo o le lagi e pologa le atunuu e totogi a latou pili, ae toe faaopoopo mai ai ma nei siitaga mamafa ina ua le mafai e le malo ona totogi ana aitalafu,”  o le saunoaga lea a Papalii.

Na taua e Papali’i, o le maualuga o siitaga a le falema’i lea ua tuuina mai ua manino mai ai le matuia o le faafitauli tau tupe o loo feagai ma i latou i le taimi nei, ae i ai lona talitonuga e le gata ua mafua lea faafitauli ona o aitalafu a le malo, ae o le isi foi mafuaaga o le toatele naua o tagata faigaluega a le falemai ae le o lava le tupe maua e faatino ai ana galuega, ona  taumafai loa lea e tuu mai le avega i le atunuu.

“Afai ua le mafai e le malo ona totogi ana aitalafu, e tatau ona ave e le falemai i le faamasinoga, ua latou soli le tulafono lea na pasia e le Fono e tuu atu ai tupe mo le falemai, faapea ai foi ma isi lala tumaoti e pei o le ASPA ma le Kolisi,” o le saunoaga lea a Papalii.

O le molimau foi lea a le tina o Carol Ulberg-Unasa mai Aua ina ua fesiligia e le Samoa News e uiga i lenei mataupu.

Na taua e Carol i le Samoa News, soo se taimi lava e maua mai ai pili a lona aiga mai le falemai, e le faatamala lava i le totogiina, o isi foi taimi e oo atu ai pili a lana fanau i le $2,000, ae faamalosi lava e totogi ona o le manatu ia aua nei afaina ai le faafouina o lona ID i le isi tausaga e sosoo ai.

“Afai o loo faamaoni le atunuu e totogi a latou pili i le falemai, e tatau foi ona faapena le malo i le faamaoni lea e totogi ana aitalafu,” o le manatu lea a Carol.

O siitaga a le falemai lea ua faamoemoe e faamamalu i le po o le kerisimasi o le vaiaso fou, e aofia ai le sii o le totogi e vaai ai le fomai i soo se talavai, mai le $10 i le $50, sii le potu failele i le $200, $100 le totogi o le  potu taofia i le po e tasi, talavai ua sii atu i le $40 i le fualaau e tasi ma le fale faamama toto lea ua sii atu i le $250.

Na taua e se tina sa auai i le solo tete’e lea na faia i le vaiaso nei faasaga i pili a le falemai, le tatau lea i le atunuu ona lagolago le faia o se isi solo tete’e faasaga i le malo, ina ua latou lagonaina ai  le tulaga mafatia lea o le a feagai ma le toatele o aiga e vaivai le tamaoaiga.

O le afiafi o le aso Gafua o le vaiaso fou i le itula e 3:00 o le a faia ai se iloiloga a le falemai i le malumalu lea e faia ai sauniga o maliu a le falemai, e faatalatalanoaina ai lenei siitaga ma soo se tasi o le atunuu.

“Ou te lagolagoina le faia o se siitaga a le falemai, peitai e le o le ituaiga maualuga lea ou te manatu e tatau ona oo i ai se siitaga, e tatau ona sii fuafua i le tulaga o loo i ai le tamaoaiga,” o le saunoaga lea a Felise Gatoloa’i mai Pago Pago.