Ads by Google Ads by Google

“Afuaga o Mea Leaga Uma”

Ua 'avea le tulaga o “o’o i le afio’aga po ’o le itumalo” ma afuaga o mea sese uma, O se mau le a le ‘au tusitala o le malo o Samoa, e fa’amatala ai le tele o fete’ena’iga i vaitaimi nei o palotaga ua tulalata fo’i i ai i tatou, fa’atasi ai ma Samoa Tuto’atasi."

O lea se manatu ua o’o i ai sa’iliga a sui tauva o lo ’o opea o latou fa’amoemoe i le aupeau, talu ai, sa manatu i latou o le a manumalo ma maua e i latou agaga o tagata palota. Peita’i, ua tele na’ua tu’ua’iga fo’i ua fa’asaga i ni isi sui tauva, ua latou foa’i tupe ina ia mautinoa ai e palota sui o na aiga ia i latou.

Peita’i, e o’o ane i le taimi mulimuli e taumafai ai le fa’amasinoga e fa’amasinotonu  nei moliga, ua fa’ailoa mai, sa foa’i fa’aleaganu’u nei mea uma, e le o se fa’atau, ae o le agaga fa’asamoa, na faia ai!

I le fonotaga a le Komisi mo Palotaga a le Malo o Samoa, na alia’e ane ai lea tulaga. Ma ua le gata la i le taumafaiga e taofia le faia o “O’o” o sui o fia tauva mo le nofoa o lo latou itumalo i le Palemene, ae o le toe manatu fo’i e si’itia le aofai o le tupe totogi e 'avea ai ma sui tauva mo nei nofoa i le palemene.

Mai le $300 tala sa i ai, ua manatu le Komisi ina ia si’itia i le ta’i $5,000. Ina ia le toe gafatia e tagata e le o tauva ae iai latou tama po’o sui e fia fa’aulu ona vave totogia nei tupe, ae fa’aletonu ai fua le fa’amoemoe o isi sui tauva ona o sui fa’auilavea nei.

E afua ona faia nei aiaiga fou e le Komisi mo Palotaga, ina ia taofia ai le gau a’ano o nai sui tauva e fagaina le to’atele o le itumalo ma afio’aga, ae uma ane e le malo. O isi ua fai so’o lava lea masani, ae tula’i mai i tagata lautele o lo ’o fiafia e tali le suamalie o nei mea uma, e le o moni o latou manatu e fa’aalia i sui nei, ma ua leai ma se aoga na fa’aosofia ai se lagona e tauva, ae pala’ai lava i palotaga uma.

O le aiaiga ua fa’apipi’i atu i ai i le si’itaga lea e $5,000 e mua’i totogia mo le ulufale i le palota, ua fa’apea ai sona maga mulimuli, e toe fa’afo’i le $5,000 a le sui e le fa’amanuiaina lona taumafai sa alofaiva i ai i le palotaga.

O le itu i le o’o, o le maga mulimuli o lea aiaiga o le palotaga, afai loa ae mae’a le palotaga, ona fa’ato’a iloa patino lea o le sui manumalo, o ia lena e faia lona o’o, ae tu’u i le faitalia a le sui faia’ina pe fai pea sana fa’aaloalo i le itumalo ma le nu’u pe leai, pe a mae’a le palotaga.

O le Komisi o Palotaga, o lo ’o ta’ita’ifono ai le susuga le Sui Tumaoti Fa’aletulafono [Omupatemane] Maiava Iulai Toma. Ua fa’apea fo’i ona latou toe iloiloina lelei aiaiga mo nofoaga fa’apitoa e faia ai palotaga i itumalo uma lava i tua ma totonu fo’i o le taulaga.

O le tausaga lenei i le fonotaga lava lea a le Komisi, ua mua’i fa’aalia ai le mau, e ao ina fa’amavae aloa’ia mai le sui e fia tauva i le palotaga mai o latou tofiga o galulue ai, ae alofaiva i lana taumafaiga, a le manuia e mafai ona toe fo’i mai i le galuega, ae a manuia ona soloa’i atu ai lava lea o lana tautua i le malo i lona tofiga fou.

O le manatu ua fa’aalia e tusa ai o le “O’O” o se amataga o mea sese uma, e afua mai lea i le to’atele o faipule na tutula’i, ae ua fa’amaonia mai sa latou 'avea tupe i tagata palota, ae sisi’o mai o le meaalofa lava fa’aleaganu’u ae le’i i ai se tala ina ia fa’amalosia mai ai sa latou palota mo ia.

O le o’o lea ua manatu i latou e taofia, e fa’asinotonu lava lea i o’o o sui e fia tauva i tofiga o itumalo i le Palemene, ae o le o’o latou i le agaga tonu fa’asamoa e masani ai, i tulaga o matai ma o latou aiga, i totonu o afio’aga ma latou tofiga, e le a’afia ai fua i lea fuaitau, po ’o nei fo’i manatu fa’aalia e fa'aleaogaina ai le maualuga o le fa’atamali’i a so ’o se tasi i lona aiga, nu’u ma le itumalo.

I se manatu fa’aalia o le palemia e tusa ai ma le suiga o le $300 le tinoitupe e fa’aulu ai se suafa i le palotaga o sui o le palemene i le $5,000 na ia fa’aalia ai, “Afai e silia palota a le sui i le 50% o tagata palota a lona itumalo, ona toe fa’afo’i lea o le tupe a le sui tauva fo’i ia, ae e tatau fo’i ona mua’i faia se sa'ili'iliga i le sui e fia tauva, po ’o i ai lava sona malamalamaga i le ituaiga tiute o le a feagai ma ia i totonu o le Palemene, ae le’i oso mai e fia tauva.

Afai e leai ma se mea e na te iloa, e le tatau fo’i ona totogia sana tinoitupe e tauva ai, aua e le mo’omia le ituaiga o tagata lea, e tauva, ae ‘ese mamao le mea e aga’i mai ai ona manatu, po ’o le leai lava fo’i ma se manatu e mafai ona ia fa’aalia i totonu o le Palemene, maumau ai ma le avanoa mo le itumalo.