To’otuli le tina i luma o faamasino

Na to’otuli se tina i luma o ali’i fa’amasino o le fa’amasinoga maualuga i le aso Tofi na te’a nei, ma ia talosagaina le faamasinoga mo se avanoa e toe tatala atu ai lana tama i tua ua silia i le tolu masina o loka i le falepupui la te toe mafuta.

 

O le tina lea o le alii e 22 tausaga le matua o John Simi, lea na ia ulufale faamalosi i totonu o se faleoloa ma gaoi le tupe e $200 sa i luga o le laulau, sosoo ai ma lona fao faamalosi o le $200 sa i totonu o le taga a se tamaloa Asia sa moe ai i totonu o le faleoloa i le po lea.

 

Ae na faailoa e Simi i le faamasinoga, na te le’i fao faamalosia se $200 mai totonu o le taga o le ofuvae o se tamaloa, sei vagana ai le $200 sa i luga o le laulau na ia gaoiina.

 

Na taua e le tina o Simi e faapea, o John o lana tama pele e toatasi, ma o le sese ua ia faia o le sese fo’i lena o laua o matua. Na tautino le tina i le faamasinoga e faapea, afai e toe tatala atu i tua John, o le a toe faaauau le la galuega o le faatonu ma a’oa’i ia te ia.

 

Sa ia faailoa fo’i i luma o le faamasinoga e faapea, ua uma ona uia e laua ma le tama o le aiga ala faaleaganuu, e ala i le faatoeseag sa faia i le aiga na aafia, atoa ai ma le toe totogiina o le tupe sa gaoi e lana tama, ma ua i ai le lisiti e faamaonia ai lea gaioiga.

 

Na tau le mafai e le tina a le ua molia ona fai sana faamatalaga i le maligi o ona loimata, talu ai le mafatia o lona loto i le alofa i lana tama.

 

E 20 masina na manatu le faamasinoga e faasala ai Simi i le toese i Tafuna, o se tasi lea o tuutuuga o lana nofovaavaaia, peitai ua finagalo alii fa’amasino, o le a taofi lona tuliina o le 17 masina, ae ua lava masina e 3 lea ua maea ona ia tuliina i le toese talu mai le taimi na taofia ai o ia e avea ma ona faasalaga i lenei mataupu.

 

Ua poloaina fo’i o ia na te totogi le salatupe e $1,000 i le faamasinoga, ma ia faatino galuega mo le atunuu lautele i le umi e 200 itula, i lalo o le vaavaaiga a le Ofisa Nofovaavaaia.

 

A’o le’i tuuina atu le faasalaga a le faamasinoga faasaga ia Simi, na faatoese le ua molia e tusa ai lana solitulafono sa faia. E le gata sa ia faatoese i le Atua, ae sa ia faatoese fo’i i le faamasinoga, o lona aiga ma le aiga na aafia, ina ia faamagalo o ia e tusa ai o lana solitulafono sa faia.

 

Sa faa’iu lana faatoesega i lona talosagaina lea o alii faamasino mo se isi avanoa se tasi mo ia, se’i toe fo’i atu ai i tua e saili sana galuega e tausi ai ona matua ua matutua.

 

Na tutu faatasi loia ina ia faanofovaavaaia le ua molia, ae aua nei toe tuuina atu o ia i le toese e taofia ai.

 

Saunoa le alii faamasino sili lagolago ia Lyle L. Richmond e faapea, o le matuia tele o le gaioiga a le ua molia sa faia, na mafua ai ona le mautonu le manatu o le tamaloa e ana le fale falaoa sa ia osofaia.

 

O le aso Tofi na te’a nei na tatala ai i tua Simi mai le toese, ma ua poloaina o ia e le faamasinoga ina ia saili sana galuega e totogi ai lana salatupe ma tausi ai ona matua.

Comment Here