Ads by Google Ads by Google

A’OA’O FO’I TAGATA FAIGALUEGA DAY CARE IA AVEA MA FAIAOGA

E le o toe faatafa le malo i le unaia lea o soo se tagata o lo o galue i tautua o lo o tausia ma aoaoina ai fanau e pei o nofoaga o Day Care, ina ia aoaoina foi i latou i metotia o lo o aoaoina ai faiaoga, ina ia mafai ona latou aoaoina fanau i le taimi e avatu atu latou te tausia a’o pisi matua i galuega.

O le faamuamua i le faaleleia o aoaoga e pei ona saunoa kovana Togiola Tulafono, sa avea lea i faiaoga o lo o aoaoina fanau i vasega amata, poo le Early Childhood Education (ECE), ina ia lelei le a’oa’oina o i latou i soo se auala e aoao ai fanau laiti amata mai le 4 tausaga ma faasolo atu i luga, ona o le taimi pito sili lea ona taua i le olaga o soo se tamaititi aoga, e pei ona taua i ni isi o suesuega faa Saienitisi i totonu o le malo tele.

O le taumafai la e ausia lenei sini, na faavae ai loa se Fono Faavae latou te sailia auala e faaleleia atili ai aoaoga mo faiaoga o le ECE, lea foi ua manatu le kovana e toso atu ai ma polokalame o lo o i lalo o le Matagaluega o Tautua Lautele, polokalame ua taua o le Day Care.

O le polokalame o Day Care, o se tasi lenei o polokalame ua maitauina le toatele o matua ua latou faaaogaina, e ave a latou fanau e tausi ai i le taimi e tuua ai aoga, ao pisi ai i latou i galuega.

Fai mai le Togiola, afai o le a faaalu le 8 itumalo o le tamaititi laititi e nofo ai i totonu o le Day Care, e le tatau la ona ma’imauina lea taimi atoa, ae ao ona faaaoga e aoao ai e le tamaititi ni isi o mea fou mo lona tuputupu a’e.

Na amata mai lava e le kovana le polokalame lenei mo le siitia o aoaoga i faiaoga, e ala i le faatula’i lea o polokalame e mafai ai ona ave aoga afiafi a faiaoga, e faaaoga ai fesootaiga tau initaneti ma Iunivesite i le Iunaite Setete, ma ua maitauina le toatele o alii ma tamaitai faiaoga ua faamanuiaina i lenei tautua, ua maua a latou faailoga e siitia maualuga ai la latou auaunaga faa faiaoga i le atunuu.

O le taimi nei, ua amata ona agai mai le malo e tapena atu faiaoga o lo o galulue i vasega amata pito i lalo, e aofia ai ma le ofoina atu o aoaoga mo i latou o lo o galulue i polokalame Day Care.

E talitonu Togiola, afai ae lelei tulaga o aoaoga i se malo, e le gata o le a manuia ai aiga, nuu ma ekalesia, ae o le a penefiti ai foi le malo ona o le lelei o le aoaoina o ona tagata.

“O le olaga aoaoina, e faatusaina i se paso, e taumafai e saili tulimanu ina ia mafai ona faapipii ma manino mai ai le ata o lo o i totonu o le paso,” o le saunoaga lea a Togiola.

Sa fautuaina e le kovana manatu o lo o nonofo ma ni isi o le atunuu, i le le tatau lea ona toe o i potu aoga ona ua matutua.

Na faamatala e le alii kovana se tala e faatatau i se tina mai lo tatou atunuu e 64 tausaga le matua, lea na faauu mai ma sona faaiuga i le Kolisi Tuufaatasi i ni nai tausaga e lei mamao atu, ona o le naunau ma le filiga e saili pea le atamai, tusa lava pe ua matua le soifua.

Fai mai Togiola, e oo lava foi ia te ia ua manatu e toe fia foi i le aoga e aoao ni isi mataupu e fesoasoani ai i le mafaufau, pe afai ae maea lana nofoaiga o lo o i ai nei.

O le fuafuaga a le alii kovana e faaleleia aoaoga mo faiaoga i vasega ECE atoa ai ma Day Care, o se fuafuaga na viia e ni isi o le atunuu sa mafai ona faalogologo i le polokalame a le kovana i le aso Toonai na te’a nei.

Na taua e le isi tina e faapea, o isi fanau aoga e o ese lava ma le ECE e le’i iloa lava tusi se igoa pe faitau se upu.

“E oo foi i le fai atu e faitau mai le 1 e oo i le 10 e augapiu ma se mea e iloa, o le mafuaaga lena ou te lagolagoina ai le fuafuaga ua faalauiloa e le alii kovana, ina ia mafai ai ona toe faalauaitele tulaga o aoaoga o lo o ofo atu mo faiaoga i le ECE atoa ai ma le Day Care, ina ia fesoasoani atili i latou i le aoaoina o fanau laiti.

Fai mai ni isi o matua ma o latou manatu, o le 4 tausaga e tatau ai ona amata aoao fanau i totonu o faleaoga, ae afai e le lelei le aoaoina o i latou i le taimi lea, e matutua a’e foi e le malolosi o latou mafaufau i le aoaoina lea o mea fou o lo o vaai ma faalogo i ai.

Ae na taua e ni isi o matua e faapea, e le na o le faiaoga o le ECE ma le Day Care e tatau ona faatinoina le galuega o le aoao lea o fanau laiti, ae oo lava foi i matua e tatau foi ona faia la latou vaega o le aoao ma faasino mea uma i fanau, aua o totonu o le aiga, o le nofoaga pito sili lea ona fiafia fanau e ola ma mafuta fiafia ai.

O le agaga o le alii kovana, afai e lelei ona aoaoina faiaoga, o le a atamamai foi fanau aoga ma avea lea ma itu e manuia atu ai ma le atunuu ma le malo.