Ads by Google Ads by Google

A’OA’O FANAU AOGA FAIGA O LE SI’I O LE ‘CLEAN AND JERK’

O se polokalame ua sauni le Asosi Si’isi’i u’amea mamafa e faasoa atu i fanau aoga i le atunuu e a’oa’o ai le faiga o le si’i malolo ‘clean and jerk’, lea ua fuafua e amataina i le toe a’e mai ai o aoga i le masina o Aokuso o le tausaga nei.

O lea polokalame e pei ona faamanino mai e le Faiaoga o le Au si’isi’i u’amea mamafa a Amerika Samoa o Lopesi Fa’agu, o le a mafai ai ona faalautele le taaloga o le siisii uamea mamafa i totonu o aoga.

O se tasi o ata vaaia i le alualu i luma o lenei taaloga na molimauina lea i le taamilosaga siisii uamea mamafa a le Oceania ma le Commonwealth lea na faia i Samoa i le amataga o le masina lenei o Iuni, ina ua tauva ai mo Amerika Samoa mo le ulua’i taimi se alii e 10 tausaga le matua i lea taamilosaga, le susuga ia Anahkena Willie Faagu.

“O le polokalame lea o le a faalauiloa i totonu o aoga, o le a fesoasoani ai i le unaia lea o mafaufau o fanau aoga i auala e faatino ai le taaloga, ma ia faatupu ai lo latou fiafia e auai i le taaloga,” o le saunoaga lea a Lopesi, lea foi sa avea muamua ma sui o Amerika Samoa i le taaloga siisii uamea mamafa i nisi o taaloga faavaomalo i tausaga ua mavae.

E lua pine apa memea na maua e le au siisii uamea mamafa a Amerika Samoa i le taamilosaga lea na faia i Apia i le masina lenei, ma o se faaiuga na iloa ai le alualu i luma o le taaloga i le atunuu, pe a fuafua i le toatele o isi atunuu o le Pasefika na tausinio ae le’i maua ni a latou pine.

I le toe taliu mai ai o le au i le atunuu, sa latou faafetaia ai le lagolago a le atunuu i le taimi o a latou tapenaga ao lumanai ai le faamoemoe, e ala i foa’i ma faamanuiaga.

Na faafetaia e le Asosi Siisii Uamea Mamafa le atunuu, le malo atoa ai ma pisinisi i lo latou lagolagoina o le latou malaga atu i Samoa, e tauva ai mo le igoa o Amerika Samoa.

“O outou uma lava sa alolofa mai i la matou sailiga tupe e faatino ai la matou faamoemoe, e le mafai ona galo oe i o matou loto, faafetai atu mo la outou foai ma la outou fesoasoani.”

O le isi taamilosga faavaomalo lea o le a sauni atu i ai le Au siisii uamea mamafa, o le taamilosaga a le Youth Championship lea e faia i Ausetalia i le masina o Ianuari, ma ua faamoemoe le Asosi e tatau ona oo atu i le taimi lea ua mautu tapenaga mo se au e fai ma sui o Amerika Samoa.