E to’atolu Fa’atonusili sa tofia e le Kovana e avea ma sui o le Kapeneta mo le isi 4 tausaga, ua aloaia nei lo latou tauaveina o lenei tofiga ina ua fa’amaonia e maota e lua a le Fono Faitulafono o latou suafa i le vaiaso nei.

O i latou nei e aofia ai le tofa a Talauega Eleasalo Ale e avea ma Loia Sili, lea na pasia e le maota o sui i le palota e 15-2, ae na pasia e le maota maualuga i le palota e 16-0; o le afioga a Taimalelagi Dr. Claire Poumele e avea ma Faatonusili o Pulega o Uafu ma Malaeva’alele, lea na pasia e le maota maualuga i le taeao ananafi i le palota e 16-0, ae na pasia e le maota o sui i le palota e 16-2; ma Ueligitone Tonumaipe’a e avea ma Teutupe a le malo i le palota e 16-0 a le senate, ae 14-3 le palota a le maota o sui.

O isi tofiga ua pasia e le maota o sui ae o loo fa’atali se fa’aiuga a le senate, e aofia ai le faletua ia Catherine Saelua e avea ma Faatonusili o le Ofisa o le Paketi i le palota e 15-3, ma le tofa Le’i S. Thompson e avea ma Komesina o le Matagaluega o le Puipuiga o le Saogalemu Lautele i le palota fulisia e 18-0.

O le aoauli ananafi na fa’ataunu’u ai iloiloga a le maota o sui mo le isi tofiga a le afioga i le ali’i kovana, e pei o le susuga Tamaaiga Maeataanoa P. Gaoteote e avea ma Faatonusili o le Ofisa o Paka ma Malaetaalo, ma ua fa’amoemoe o le taeao nei fa’atoa faia ai le palota a le maota o sui mo le suafa o Tamaaiga.

O ni isi o itu sa fesiligia e faipule mai le susuga a Tamaaiga, o auala e fa’aleleia ai le teuteu faamatagofieina o paka ma malaetaalo i le atunu’u.

Saunoa le sui fofoga fetalai ia Fetu Fetui Jr e fa’apea, afai e lelei mo Tutuila ona taaalo i paka matagofie, e tatau fo’i ona lelei lena atina’e mo Manu’a. Na fa’ai’u le saunoaga a Fetui Jr i lona talosagaina lea o le fausiaina o se malaetaalo mo le Faletolu i Manu’a.

Na talosaga le afioga a Vailoata E. Amituana’i ina ia fa’aleleia le paka a le malo i Fagaalu, lea o loo tele ina ia fa’aaoga i ta’aloga a le malo e aofia ai liki kirikiti, ona o loo i ai popolega i le ono tula’i mai ai lea o se fa’alavelave i se taimi o i luma, i taimi e fa’agasolo ta’aloga kirikiti mo liki o le fu’a.

Saunoa Tamaaiga e faapea, ua matua tumu lava lana api mafiafia o loo i ai i lona Ofisa i ata fa’ataoto i auala e fa’amatagofie ma fa’aleleia atili ai paka eseese i totonu o le atunu’u, peita’i o le fa’afitauli o loo tula’i mai i le taimi nei, e le o i ai se tupe e fa’atupe ai nei galuega atina’e.

“O tausaga uma lava ou te tu’uina ai i totonu o le paketi a lo’u Ofisa se vaega tupe e fa’aleleia ai paka i le atunu’u, peita’i e emo ane lava le ata ua teena ma aveesea lea vaega tupe, o isi lava taimi e pei o le fesoasoani lea na fa’atau ai meataalo e pei o polo ma le neti mo le aoga tulaga muamua i Aunu’u, o mea taalo lava na fa’atau mai i la’u tupe e $1,000 sa i ai, ina ua talosaga mai le Aunu’u mo se fesoasoani ae ua leai se tupe a lo’u Ofisa e tali atu ai i ia manaoga”, o le saunoaga lea a le ali’i Faatonusili filifilia.

Mai paka e 11 o loo i ai i le atunu’u i le taimi nei, na taua e Tamaaiga le faanaunauga o loo i ai ina ia fa’aopoopo ni isi paka i le atunu’u, peita’i o le itu e mana’omia, e tatau ona fono afioaga mo le fa’amautuina o se fanua e fausia ai le paka, ona fa’atoa logo atu ai loa lea o le Ofisa ma fa’agasolo ai loa fuafuaga mo le fausiaina o se galuega, pe afai ae maua se vaega tupe e fa’atino ai.

Saunoa le Faipule mai Fagatogo ia Vailiuama S. Leasiolagi, talu ai le matagofie o le malae taalo fou a le afioaga lea na fa’atoa tatalaina i le fa’aiuga o le tausaga na te’a nei, o ai lava e nofoia le nofoa o Fagatogo i le maota o sui, e palota ioe pea lava i soo se taimi e tu’uina mai ai le suafa o Tamaaiga mo le fa’amaoniaina i le tofi Faatonusili.