E to’atolu ni ali’i na taofia e leoleo i le fa’aiuga o le vaiaso na te’a nei, ona o mataupu e aofia ai le fa’ao’olima i isi tagata, ma tutula’i ai i luma o le fa’amasinoga faaitumalo i le taeao ananafi mo a latou ulua’i iloiloga.

O i latou e to’atolu e aofia ai Pati Solomona, Setu Talaimanu, ma se ali’i o lo o tu’uaia i lona fa’ao’olima lea i lona to’alua ma manu’a tigaina ai, ma o nei faalavelave uma e pei ona taua i faamaumauga a le fa’amasinoga, sa aafia ai le ‘ava malosi.

E ui i tulaga matuia o manu’a o lo o a’afia ai le to’atasi o i latou na aafia i nei faalavelave, peitai na faamaonia mai e le Sui Komesina o le Matagaluega o Leoleo ia Leseiau Laumoli e faapea, e leai se isi o i latou nei na aafia na maliu, po o le aafia fo’i i ni manu’a e ono latalata atu ai i se tulaga e ono ma’imau ai se soifua o se tasi.

Sa ia faamaonia mai fo’i i le Samoa News e faapea, o faalavelave uma nei e tusa ai ma ripoti ua oo atu i lona ofisa, sa aafia ai le ‘ava malosi, ma ua toe fautuaina ai le atunuu ina ia telegese le tagofiaina o le ‘ava malosi pe afai e iloa e ono tutupu mai ai ni faalavelave i se taimi mulimuli ane.

Sa ia fautuaina fo’i le atunuu o lo o fiafia e tagofia le ‘ava malosi, aemaise lava taimi o aso fiafia ma le faaiuga o le tausaga lea ua latalata mai, ina ia aua le soona tago tele i le ‘ava malosi.

O le ulua’i mataupu faaoolima na tali atu i ai leoleo, o le mataupu lea na tula’i mai i Aua ina ua faaoolima se alii i lona to’alua ma manu’a tigaina ai.

I faamaumauga a le faamasinoga o lo o taua ai e faapea, o le vevesi na tula’i mai ina ua ‘ona atu le ua molia i le po o le aso Faraile na te’a nei, ma amata ai loa se la vevesi ma lona to’alua.

O le vevesi na amata i se taugaupu, sosoo ai lava ma le alu atu o le ua molia ma po le fafine, ma i’u i lona faaoolima ai loa ia te ia e ala i le ta tu’i o foliga ma manu’a ai.

O aiga tuaoi na latou logoina leoleo mo se fesoasoani, ma aga’i atu ai leoleo ma taofia faapagota mai le ua molia, ma tula’i ai loa i luma o le faamasinoga faaitumalo i le taeao ananafi, lea na ia teena ai tuuaiga o le faatupu vevesi i totonu o lona aiga, a’o faatali ai suesuega a le malo o lo o faagasolo pea i le taimi nei, e iloilo ai moliaga faaopoopo e ono faia faasaga ia te ia.

O lo o taofia pea i le toese le ua molia e faatali ai le toe fofogaina o lana mataupu i le taeao nei.

O le mataupu lona lua na tula’i mai i Mapusagafou i le po o le aso Toona’i na te’a nei, ina ua logo e nisi o le aiga o le alii na manu’a le ofisa o leoleo mo se fesoasoani, ona o se alii o lo o i ai se manu’a tuga i lona tino, e mafua mai ina ua faaaoga ese isi tagata se mea maai e tui ai.

Na maua atu e leoleo se taavale a le EMS o lo o paka mai i luma o se faleoloa i Nuuuli, o lo o tau togafiti mai ai iina le alii na manu’a, lea na momoli mai ese taavale mai Mapusagafou ma fetaui ai iina ma le taavale a le EMS.

Na molimauina e leoleo se manu’a tele lava i le itu agavale o le ua o le alii na aafia, e foliga mai o se mea maai na faaaoga e tui ai, e le’i umi ona togafiti e sui o le EMS le na manu’a i le taimi lea ae matapogia loa o ia, ona o le tele o le toto o lona tino ua alu ese, e pei ona taua i faamaumauga a le faamasinoga.

Na faailoa e ni molimau i leoleo, o le alii o Solomona o lo o tuuaia i lona faaoo lea o manu’a i le alii ua manu’a.

Na taua e se molimau i leoleo e faapea, o le vevesi na mafua mai i se inugapia sa faia i le va o Solomona ma isi alii, e aofia ai ma le alii ua manu’a, ae i se taimi o le po ina ua latalata ina uma le inuga, sa tulai mai ai loa se vevesi ma faaaoga ai loa e le ua molia se atigi fagu ta’e e tui ai le ua o le na manu’a.

Ae ina ua fesiligia e leoleo ia Solomona e tusa ai o le mea sa tupu, sa ia taua ai e faapea, na pau le mea sa uu i lona lima i le taimi na ia tu’iina ai le alii na manu’a, o le afi penisini.

Na faamaonia e Dr. Annie Fuavai o le LBJ i leoleo e faapea, o le manu’a o lo o aafia ai le alii na aafia, e 5 inisi le lautele ae 4 inisi le loloto, ma e umi se taimi e ono taofia ai o ia i le potu tipitipi a le falema’i,

Ua molia nei Solomona i moliaga mama e lua o le faatupu vevesi i nofoaga faitele atoa ai ma le faaoolima i le tulaga tolu, ma le faamoemoe o le malo o se taimi o le vaiaso nei latou te failaina ai moliaga faaopoopo faasaga ia te ia.

E $500 le tupe lea ua faatulaga e tatala ai Solomona i tua i le taimi nei, ma le faamoemoe e mafai ona toe faaopoopo pe a maea ona faila e le malo moliaga faaopoopo faasaga ia te ia, ma o lo o taofia pea Solomona i le toese e faatali ai le taimi e faila ai e le malo ana moliaga faaopoopo.

O le mataupu mulimuli na tulai mai ina ua faaoolima se ali’i ‘ona i se faatauoloa, ma faaaoga ai loa e le faatauoloa se pate ‘baseball’ e sasa ai le ua molia.

I faamaumauga a le faamasinoga o lo o taua ai e faapea, o le faalavelave na tulai mai ina ua sese le sui a Talaimanu na tuu atu i ai e le faatauoloa, o lea na toe fo’i atu ai loa le ua molia ma faasea i le faatauoloa.

A’o finau le ua molia ma le faatauoloa i luga o le ‘counter’, sa aapa atu le ua molia ma po le faatauoloa, sosoo ai loa ma lona tu’iina o ia, ae na aapa le faatauoloa ua uu mai le pate ‘baseball’ o lo o taatia i le isi ona itu ma sasa ai le ua molia, ona oso lea o le alii ua molia i le isi itu o lo o i ai fata oloa, ma tago i se apa sa i luga o le fata ae togi ai le faatauoloa, peita’i sa misi.

O nei gaioiga uma sa mafai ona pu’eina i se masini pu’eata a le faleoloa, ma ua i aao nei o leoleo lea ata e fesoasoani ai i le faamasinoina o le latou mataupu.

Ua molia Talaimanu i le faatupu vevesi i nofoaga faitele ma le faamoemoe, o se taimi o le vaiaso nei e tatau ona faila ai e le malo moliaga faaopoopo faasaga ia te ia.