Ads by Google Ads by Google

To’atolu leoleo maua faailoga taualoa Matagaluega o Leoleo

E to’atolu leoleo sa latou mauaina faailoga taualoa mai le Matagaluega o Leoleo i le vaiaso nei, ina ua filifilia i latou e avea ma leoleo o le kuata lona lua na se’i mavae atu nei a le Matagaluega.

O leoleo e toatolu sa faamanuiaina e aofia ai Det. Gaui Seanoa ma Det. Lt. Sili Sea mai le Vaega Su’esu’e a le Ofisa o Leoleo (CID), ma le susuga ia PSO II Mareko Fale mai le vaega a le Traffic Division.

O Det. Lt Sea sa ia mauaina fo’i le faailoga o le Leoleo Suesue pito sili ona maualuga ma tulaga lelei lana tautua i le vaega a le CID i le tausaga na te’a nei, ae na aofia ai foi o la igoa ma PSO II Fale i leoleo e toa 40 ia na sii o latou tulaga, ina ua siitia lona tulaga i le Lutena, ae o Fale i le PSO II.

O se sauniga faapitoa sa faia i le potu fono a le matagaluega o leoleo i Fagatogo i le aso Lua na te’a nei, na aloaia ai le tautua a i latou nei, ma tauaao atu ai e le afioga i le Komesina o Leoleo ia Tuaolo M. Fruean faailoa taualoa ua saunia mo i latou nei.

E le o se taimi muamua lenei ua faataunuuina ai lenei sauniga a le Matagaluega o Leoleo, ona o le faanaunauga lava ia taui galuega lelei a alii ma tamaitai leoleo o loo faatinoina mo le atunuu.

Saunoa le Sui Komesina ia Leseiau Laumoli, o le autu o lenei sauniga e le gata e taui ai galuega lelei sa faatino e le leoleo, ae o le aso foi e amanaia ai lana tautua faamaoni, ma momoli atu ai le agaga faafetai a le komesina ma le matagaluega atoa ia te ia.

O i latou ua faamanuiaina ua filifilia e avea ma leoleo o le kuata lua, lea na amata mai ia Aperila ae faaiu ia Iuni na te’a nei.

Na taua e le taitai o le CID ia Comdr Lavatai Taase Sagapolutele e faapea, e 160 mataupu tau solitulafono mamafa na galulue i ai leoleo suesue a le vaega o le CID i le kuata lona lua ua mae’a atu, ma o mataupu nei ua maea ona la galulue ai ma le sui taitai o le CID ia Det. Lt. Siaosi Aiono mo le tuu faatasia.

O vaega sa faavae i ai le filifilia o leoleo e avea ma leoleo o le masina, o lona ausia lea o mataupu tau solitulafono pito sili ona tele ua maea ona saunia ma ua tuuina atu i le Ofisa o le Loia Sili, aemaise ai o le tele o mataupu ua oo atu i le faamasinoga ma ua faamaonia solitulafono a i latou sa tuuaia ai.

E maua foi e leoleo pe afai e tele tusi saisai ma tusi samania e mafai ona ia tapena ma tuuina atu, aemaise ai o le toaga atu i le galuega, e le tia’i galuega e le tuai foi i le galuega, ae le tu mama ma faamaoni i ona tiute faaleoleo.

Saunoa Tuaolo, talu lava ona avea o ia ma Komesina, e na o le lua lava vaega a le matagaluega o loo ia maitauina o loo latou faia tulaga nei, o le CID ma le Traffic.

“O le faailoga lena e ta’u mai ai le mataala o ta’ita’i o vaega ia e lua, o la’u tatalo, tumau ai pea i le mataala ma faaauau galuega lelei mo le atunuu ma le matagaluega,” o le fetalaiga lea a Tuaolo.

Na faafetaia e le alii komesina leoleo na maua faailoga ona o le latou tautua maelega faapea ai ma le faamaoni i le faatinoina o latou tiute faaleoleo.

“Aua le taofiai galuega lelei a tatau ona outou faia mo le atunuu, o le tatou tiute tautua le atunuu, alofa i le atunuu ma ia outou ava i le atunuu i taimi uma tou te talanoa i ai, ae sili ai ia maua le faaaloalo ma le loto maualalo,” o fautuaga ia a le komesina i leoleo sa maua faailoga.

O le taitai o le CID ia Comdr Sagapolutele na faalauiloaina leoleo mai lana vaega ua ausia tulaga e pei ona faailoaina, ae o le taitai o le Traffic ia Cpt. John Cendrowski na faalauiloaina le alii leoleo mai lana vaega ua faamanuiaina, ma tauaao atu ai loa e le tofa Tuaolo faailoga mo i latou ua lautogia.